Setshwaniso sa mogashi
8
Ka morago ga hone, Jesu a thoma go yetela metji le metjana a sepela a gowelela le go rera Taba ye Butji ya mmusho wa Modimo. Ke ho a sepela le barutiwa bage ba lesomepedi. 2 Ba bangwana ba basadi bo a rakiyeng memoya ye mebe ga bona le bo a ba fodisiyeng malwele le bona ke ho ba sepela naye. Magareng ga bona ke ho go na le Maria Magadalena, ye Jesu a rakiyeng mademone ya shupa go tjwa gage, 3 Jowanna, mosadi wa Kusa ye ke ho yele molawodi ye mogolo wa dikgwebo tsa Herode, Susana le ba bangwana ba go tlala. Basadi bo, le ba bangwana, ke ho ba thusha Jesu le barutiwa bage ka dilo tso ke ho ba le natso.4 Ho mashaba ya magolo a gatlhanne go tjwa metjing le metjaneng, Jesu a ba botsa setshwaniso so: 5 A re: “Molemi wo tjwele a ya go gasha pewu yage. Ho a gasha, ye nngwana ya wela tseleng, batho ba ye gatela, dinonyana le tsona diya ye kota diya yedya. 6 Ye nngwana pewu ya wela mobung wa matlapa, ho ye mela, dimelana diya pona diya hwa ka ho di se na monola. 7 Ye nngwana pewu ya wela magareng ga mootlwa, dimelana diya gola goshi le mootlwa, mootlwa wa petegetsa dimelana. 8 Ye nngwana pewu ya wela mobung wa go nona. Pewu ya mela, dimelana diya gola diya tjweletsa diyengwa tse lekgolo le go fetisa ka ho pewu ye gashiwuweng ka gona. Ka morago ga ho a bolabodiye so, a re: “Ye a nang le tsebe ya go kwa, a kwe a kwesise.”
“Tjibo ya diphiri tsa mmusho wa Modimo di neyiwe lune, mara ga ba bangwana ke bolabola ka ditshwaniso, gore:
“Le ho ba bona, ba sa bonisise, le ho ba yekwa, ba sa kwesise.”
11 Setshwaniso so se ra gore: “Pewu ke lentsu la Modimo. 12 Pewu yo ye weleng tseleng ke lentsu la Modimo lo batho ba le yamogeleng, ke moka diyabolose a tla a yamoga lentsu lone dipelong tsa bona, gore ba sa dumele ba sokologa. 13 Pewu ya go wela mobung wa lekgwara ke lentsu la Modimo lo batho ba le yamogeleng ka go djabola, mara ka ho lentsu le sa tseka dipelong tsa bona, ba dumela lebakanyana, mara ho meleko ya lefase ye tla ba yakgoswa ba kgeloga 14 Pewu ya go wela gare ga mootlwa ke lentsu la Modimo lo batho ba le yamogelang la mela dipelong tsa bona, mara ho ditshekelo, mahumo le menate ya lefase di segela, di petegetsa lentsu la Modimo ba sa gole moyeng. 15 Mara ho yele pewu ya go wela mobung wa go nona, ke lentsu la Modimo lo le yamogelang ke batho ba go loka le dipelo tse di butji, ba le tshwara ka go kgotlhelela, ba yengwa diyengwa.
Llampa setlhomelong sa lona.
16 “A go na motho ye a tjhubang llampa a le ribegetsa ka kotana kela a le beya ka tlase ga mpete. Llampa ba le tlhomela setlhomelong sa lona gore le kgone go bonegetsela ka moka bo ba kenang ka ntlong. 17 Ka gore a gona so se wutamisiwuweng se ka sa wutulugeng kela se sa nyareleng pepeneneng. 18 Ka gona, tlhokomelaneng gore le theyetsela byang. Ka moka bo ba kwang ditjhutiso tsaka, ba ko neyiwa go kwesisa ka maatla. Mara bo ba sa theyetseleng, le tso ba naganang gore ba di kwesisa di ko yamogiwa.
Mmane wa Jesu le bo bhute ba Jesu
19 Byalo mmane wa Jesu le bo bhute ba Jesu ba tla ba nyaka go mmona, ba shitega go ka shutela thina gage ka taba la leshaba. 20 Ye mongwana a botsa Jesu a re: “Mmane wago le bobhute bago ba yemme ka kuwa tawong, ba nyaka go go bona.”
21 Jesu a fetola a re: “Mmane waka le bobhute ke bo ba kwang lentsu la Modimo ba le maka.
Jesu wo kgalema ledimo.
22 Ka letjatji le lengwana Jesu a re ga barutiwa bage: “Ko riyeng mosekola wela wa lewatle.” Ke moka ba kena ka sekepeng ba tshelela ka mosekola. 23 Ho ba kene ba thala ka sekepe lewatleng, Jesu a yetsela. Ka go yakgoswa, ledimo le legolo la tsoga, sekepe sa tjutlatjutlisa ke ledimo, meetji a kena ka sekepeng, barutiwa ba ba kotsing.
24 Barutiwa ba ya ba tsosa Jesu, ba re: “Morena, Morena, re nyoko nwelela!” Jesu a tsoga, a kgalema ledimo le lewatle lo ke ho le kwatiye. Ka go yakgoswa ledimo la homolela la re tuu! Lewatle la boyela mayemong ya lona.
25 Jesu a botsisa barutiwa bage a re: “Tumelo ya lune ye kaye?” Ka go tjhoga le go makala barutiwa ba botsisana, ba re: “Ke mang yene? Wo kgalema ledimo le lewatle, di ya mo theyetsela.”
Jesu wo fodisa monna wa go keniwa ke ledemone.
26 Ba segela tikologong ya Gerasine, mosekola wa lewatle la Galeliya. 27 Ho Jesu a yetjwa ka sekepeng, a gatlhanetsa ke monna wa hone motjing ye ke ho a keniwuwe ke ledemone. Ke ho ye shele ye le nako ye telele monna ye a sa tjware dikobo kela go dula ka ntlong, ke ho a dula mabitleng. 28 Ho a bona Jesu, a gowelela, a wela mawotong a Jesu, a gotla a re: “Ke ying taba wo nyaka go ntlhopa, Jesu, Morwayi wa Modimo wa ye Gedimodimo? Ke ya go kgopela, wo sa ntlhorisi!” 29 Jesu ke ho a shele a layele moya wone wo mobe go tjwa hone ga monna yene. Moya wo ke ho wo shele wo mo lawola, le ho ba mo tlemme ka diketane ba mo letiye, ledemone lo ke ho le mo maka gore a konolanye diketane a tjhabele tlhageng.
30 Jesu a mmotsisa a re: “Lebitso lago, ke wene mang?” A fetola a re: “Madira,” ka gore ke ho a keniwuwe ke mademone ya go tlala.
31 Mademone a tjwela pele a kgopela Jesu gore a sa a romele moleteng wa dihele.
32 Ke ho go na le motlhape wa dikolobe wo ke ho wo hula sethabaneng hone thina, mademone a kgopela Jesu gore a a dumelele a kene dikolobeng. Jesu a a dumelela. 33 Mademone a tjwa ga monna yene a kena dikolobeng, dikolobe ka moka di ya thewogela lewatleng ka lebelo diya kena diya nwelela.
34 Ho badisi ba dikolobe ba bona tso di makegiyeng, ba taboga ba ya motjing le metjaneng ya hone thina, ba sepela ba phatlalatsa ditaba tsone. 35 Batho ba ya go bona tso di makegiyeng. Ho ba segela ga Jesu, ba keraya monna yela mademone a tjwileng gage, a dule mawotong ya Jesu, a yapere gabutji, monagano wage wo le gabutji, ba tjhoga ka moka ga bona. 36 Ke moka, bo ba bonneng tso di makegiyeng, ba yanegela ba bangwana ka mokgwa wo monna ye ke ho a na le mademone a fodiyeng ka gona. 37 Batho ka moka ba tikologo ya Gerasine ba kgopela Jesu go tloga hone nageng ya bona, ka gore ke ho ba tjhogiye. Ke moka a kena sekepeng a tloga.
38 Monna yela Jesu a rakiyeng mademone gage, a kgopela go sepela le Jesu. Jesu a mo romela gaye, a re gage: 39 “Boyela gaye, wo ba botse tse dikgolo tso Modimo a go makeleng tsona.” Monna yene a sepela le motji wone ka moka a botsa batho tse dikgolo tso Jesu a mo makeleng tsona.
Jesu wo fodisa mosadi le go tsosa ngwannyana bahung
40 Byalo ho Jesu a boyele morago mosekola wela wa lewatle, mashaba a mo yamogela, ka gore ke ho ba mo letele. 41 Byalo monna ye ke ho ba re ke Jairose, ye ke ho yele moyetapele wa senagoge, a tla a kgotama mawotong ya Jesu, a mo kgopela gore a tle lapeng lage. 42 Morwediya wage ye a belegiwuweng a le ntoshi, ye ke ho a na le mengwaga ye lesomepedi, ke ho a lwalela go hwa. Ho Jesu a sa ya, leshaba ke ho le mo petegetsa. 43 Ke ho gona le mosadi ye ke ho a tlhopa ke bolwele bya go falala ga madi mengwaga ye lesomepedi, go se na ye a kgonang go mo yalafa. 44 A tla ka morago ga Jesu a gogomela, a kgwata lephutho la kobo ya Jesu. Go falala ga madi gwa yema ka go yakgoswa.
45 Jesu a botsisa a re: “Ke mang a nkgwatiyeng?” Batho ka moka ba sa dumele gore ba mo kgwatiye, Peterose a re: “Morena, leshaba ka moka le ya go petegetsa.
46 Mara Jesu a re: “Ye mongwana wo nkgwatiye, ke kwele maatla ya go fodisa a tloga ho gaka.”
47 Ho mosadi yene a lemoga gore a ka sa fo wutama, a tla a tlhagasela a wela mawotong ya Jesu. A bolabola ho matlhong ya batho ka moka so se makiyeng gore a kgwate Jesu le gore wo napiye a fola ka go yakgoswa. 48 Ke moka Jesu a re gage: “Morwediya, tumelo yago ye go fodisiye. Ariye ka khutjo.”
49 Ho Jesu a sa bolabola le mosadi yela, ye mongwana wa batlhanka go tjwa lapeng la Jairose moyetapele wa senagoge, a segela. A bolabola le Jairose a re: “Morwediya wago wo hwile, wo sa sa tlhopa moruti.”
50 Ho Jesu a yikwa so, a bolabola le Jairose a re: “Wo sa tjhabe, dumela hela, ngwana wago wo nyoko fola.”
51 Ho a segela lapeng la Jairose, Jesu a sa dumelele motho go kena le yene ka ntlong, ho yese Peterose, Johanese, Jakobose le papa wa ngwana le mmane wage. 52 Ntlo ke ho ye tlele ka batho bo ke ho ba golola ba llela ngwannyana yene. Jesu a re: “Lesang go lla! Ngwannyana a a hwa, wo yetsele:”
53 Leshaba la mo tshega, ka gore ke ho le tjiba gore ngwannyana wo hwile. 54 Jesu a mo tshwara ka seyatla a re: “Morwediya, tsoga!” 55 Ka yona nako yone, moya wage wa boyela gage, ka go yakgoswa a napa a yemelela! Ke moka Jesu a ba botsa gore ba mo fe tsagodya. 56 Batswadi bage ba makala ba thabiye ka maatla, mara Jesu a ba laya gore ba sa botse motho ka so se makegiyeng.