Pepopainga i topebuku
5
1 Idemi paturongku i tauna au pebuku. Aginami moteriakau, lawi ina narumpakau kapari. 2 Matalami peawami. Hampimi natatami alimpepi. 3 Bulawami hai salakami, tagarami. Tagara iti mopakanoto kamasalami i lalu pampopobundumi kapebukumi. Ido hai ina rahukukau nodo tauna au naande api. Morampukau anu-anu i dunia, agaiana barapi mahae ina hawemi kahopoa dunia ide! 4 Ikamu barakau mobaiari saronda tauna au mobagohe i bondemi. Ide-ide nipehadingi peraroanda! Tauna au meparehe i bondemi, meraroahe merapi tulungi hai peraroanda napehadingimi Pue Ala au makuasa. 5 Mampopeawamokau tuwomi hai matana-tana pearaikau i dunia ide; nodokau binata au mopakarudu watanda sadudua duuna hawe temponda rasambale! 6 Mohuku hai mopapatemokau tauna au barahe masala, hai barahe meewa.Hangangaa sabarake i lalu kapari
7 Halalu-halalu! Hangangaa sabarakau mampegia kahaweNa hule Pue. Nipeita noumba kasabaranda topobonde mampegia powuana tuda-tudanda. Sabarahe mampegia uda i temponda mantuda hawe i powuana. 8 Nodo wori ikamu, hangangaa sabarakau. Hangangaa nipatetida lalumi, lawi barapi mahae ina hawe mpuu Amputa.
9 Halalu, ineekau mohume-hume hai mombesasalai datikau narumpa pehuku. Lawi ara hadua topebotusi au hungkumi, hai barapi mahae ina hawemi!
10 Halalungku ope-ope! Nikatuinaohe nabi hangkoia au mobambari Ngkorana Pue. Sabarahe hai mantahahe mantodiha kapari. Maroa ane tapeulai kasabaranda. 11 Tauna au mantaha i lalu kapari, ihirami au rauli morasi. Niisami tuntukana Ayubi au mantaha i lalu kapari. Hai kahopoana, ia nawati Pue Ala. Lawi Pue Ala maroa laluna hai maahi ntepuu.
Ineeke mosumpa
12 Halalu-halalu! Hangko i ope-ope paturongku, idemi au paraluu ntepuu: ineekau mosumpa mokabelai langi ba tampo ba apa pea au ntanina. Ane tunggaiami manguli io, niuli “Io.” Ane tunggaiami manguli bara, niuli “Bara,” datikau narumpa pehuku.
Hangangaa mekakaeke i Pue Ala
13 Ane ara i olomi au molambi kapari, agina mekakae. Ane ara au matana, hangangaa monani motoia Pue Ala. 14 Ane ara au mahai, maroa ane mokakiokau penatua, bona penatua iti peisahe mampekakaea hai morirohi tomahai iti hai lana i lalu hangana Pue. 15 Ane pekakae iti tou-tou mpuu hangko i pepoinalai, tomahai iti batena maoha. Hakina ina napakaoha Pue Ala, hai dosana teampungi worimi. 16 Ido hai hangangaa mangaku salakau i hangka rangami, hai mombepekakaeakau bona maohakau.
Tauna au manoto babehianda pemoso mpuu pekakaenda. 17 Nikatuinao tuntukana nabi Elia hangkoia. Nabi Elia iti, tauna biasa himbela hai ikita. Ia mekakae hangko i laluna mpuu dati keuda. Hai bara mpuu keuda i lalu talu parena hai ini wulana. 18 Roo indo, ia mekakae hule bona langi mopaara uda, hai mowuami tuda-tuda.
19 Halalu-halalu! Ane ara i olomi hadua au morara ntani hangko i paturo au tou, hai ara wori hadua au monini mesule i Pue, 20 nikatuinao lolita ide: hema au moanti hadua tauna au madosa menoso hangko i babehiana au masala, ia mohorema rangana iti hangko i kapate, hai dosana rangana au ngkaia iti, teampungi.
Hangko iriko
YAKOBU