Ineeke moula peundeana lalunta au kadake
4
1 Halalu, moapari pane ara pobungka-bungka hai pombehahanai i olomi? Bara pae hangko i peundeami haduduami au mombeala liliu i lalumi? 2 Mampeinaokau paka-pakana agaiana bara nihumba. Ido hai mepapatekau. Mahinakau i anu-anuna rangami, agaiana apa au nipokaelu iti, bara nihumba. Mewali, mombehahanai hai mobungka-bungkamokau. Apa au nihaoki iti bara nihumba, lawi bara niperapi i Pue Ala. 3 Nauri pae niperapimi, agaiana bara ina nilambi, lawi tunggaiami bara maroa. Lawi apa au niperapi iti, ina nipake pea mopabukei peundeana lalumi haduduami. 4 Halalu, bara hintoto ane mopalehike Amputa hai moulake babehia au kadake i dunia ide. Niisami halalu, ane mampeulaike babehia au kadake i dunia ide, batena mampopewalike watanta iwalina Pue Ala. Hambela mani kuuli: hema au mounde babehia au kadake, ia au mampoiwali Pue Ala! 5 Inee nipehangu bara ara tunggaiana au teuki i lalu Sura Malelaha node: i watanta ide, Pue Ala moweike inaonta, hai Pue Ala mohiri ane barake tetida Iria.a 6 Agaiana melumbu petulungina Pue Ala au Naweike hangko i kabulana laluNa pane kamahinana lalunta. Ido hai ara au teuki i lalu Sura Malelaha node:“Pue Ala moewahe tauna au mampemahile,
agaiana tauna au mengkaiwoi,
Natulungi anti kabulana laluNa.”*
7 Ido hai kuweikau lolita: mengkorukau i Pue Ala hai niewa Datu Tokadake hai batena meloho hangko irikamu. 8 Hangangaa hungkukau i Pue Ala bona Ia wori hungku irikamu. Ane ara dosami, hangangaa nipangaku hai nikabaha. Ane morompenga lalumi, hangangaa nipamalelaha. 9 Hangangaa moteriakau anti kamadosami. Ane niisa kamadosami, bara maroa ane nipokatanari, hangangaa nipenosoi hangko i kamasusana lalumi, 10 hai mengkaiwoikau i lindona Pue. Ane nodo, ina Napomahilekau.
Ineekau mopakadake rangami
11 Halalu, ineekau mombepakadake. Ane ara hadua tauna au mopakadake rangana ba mopakisala halaluna, lempona mopakadake hai mopakisala wori Aturana Pue Ala. Tauna au mopakadake halaluna, bara moula Aturana Pue. Anti babehiana au sala iti, ia peisa rapandiri nodo hadua topobotusi au mosalai Aturana Pue Ala. 12 Katouana hadua pea au hintoto mowei atura i manusia hai au mewali topobotusi, iami Pue Ala. Ia makuasa mohuku ba mokabahake hangko i huku dosanta. Mewali hemakau, pane pebaikau mosalai hangka rangami?
Hinangka tunggaiata hangangaa tapaisare i Pue
13 Idemi paturongku irikamu au manguli node, “Alo ide ba kahalo, ina meangkangkai lao i hambua wanua. Ina mobalu-balungkai inditi hampare kamahaena alana molambingkai rasi”, 14 moleri bara niisa apa au ina mewali kahalo i katuwomi! Katuwomi nodo pea rambu; sangka pea raita, hai roo indo, matanta! 15 Katouana hangangaa niuliri node, “Ane napokana Pue, ina tuwongkai hai ina mobabehingkai ide hai iti.” 16 Agaiana ide-ide mampemahilekau hai mantindorakau. Ope-ope babehia iti, masala.
17 Mewali, hema au moisa apa au maroa au hangangaa nababehi agaiana bara nababehi, tauna iti madosa.