Ineeke mampopontani tauna
2
1 Halalu-halalungku! Amputa, Pue Yesu Kerisitu, meawa mpuu tuwoNa. Mewali, ane tou-toukau mepoinalai i Pue Yesu, ineekau mampopontani tauna. 2 Rapana ara rodua tauna au hawe i pogulu-guluanta, hadua mesisikale bulawa hai mehampi makara, hai hadua meahi-ahi tuwona hai mehampi magenta-genta. 3 Ane melumbu pebilami i tauna au makara hampina, pane niuliangaa, “Maike mohuda i pohudaa au maroa inde,” agaiana i tauna au meahi-ahi tuwona niuli: “Meangkamoko inditi,” ba niuliangaa: “Mohudamoko i lanta,” 4 lempona, mampopontanimokau hangka rangami, hai mampelenggekau tauna moula tunggaiami au kadake.5 Halalungku au kupokaahi! Nipehadingi maroa: tauna au meahi-ahi tuwonda i dunia ide napileihe Pue Ala bona mewalihe pebuku i pepoinalainda. Ina molambi sosoranda i lalu poparentaNa moula dandina Pue Ala i tauna au maahi Iria. 6 Agaiana ikamu mokakabosairikau tauna au meahi-ahi iti hai moadaikau topebuku. Bara pae tauna au pebuku itimohe au moewakau hai moantikau i lindona topoparenta? 7 Bara pae ihirami au mopapakoi hangana Pue Yesu au tebila hai au mewali Amputa?
8 Maroa babehiami ane mampeulaikau hawana Datunta au i lalu Sura Malelaha au manguli, “Nipokaahi hangka rangami nodo pampokaahimi watami haduduami.”* 9 Agaiana ane mampopontanikau tauna moula tuwonda ba lenggenda, madosamokau. Tongawami kamadosami, lawi moliungimokau Aturana Pue Ala.
10 Hema au moliungi hampaka pea hangko i ope-ope Aturana Pue Ala, himbela pea hai moliungimi ope-ope Atura iti. 11 Lawi nauli Pue Ala, “Inee mebualosi.” Hai Nauli wori, “Inee mepapate.” Mewali, kehapirikau bara mebualosi, agaiana mepapatekau, batena moliungi manikau Aturana Pue Ala. 12 Ido hai hangangaa nipamaroa-roa pohohowarami lolita hai babehiami. Lawi kara-karanta ina rabotusi moula Aturana Pue Ala au mokabahake hangko i huku dosanta. 13 Lawi hema au bara ara kamaahina i rangana ina rahuku, hai i karahukuna iti, bara ina ara kamaahina Pue Ala iria. Agaiana tauna au ara kamaahina i rangana, Pue Ala ina motudungia kamaahiNa iria i alo pebotusi.
Pepoinalainta hai babehianta
14 Halalu-halalu! Apami bunduna ane tauli mepoinalaike i Pue, agaiana babehianta bara moula peundeaNa. Ane nodo pepoinalainta, barake ina tehorema. 15 Pandirina, ara hadua halalunta au moparaluu pehampi, hai bara wori handa paandena alo-alona, 16 hai niuliangaa node, “Maroa-roako i rara! Kuharunga molambiko badu au maroa hai maandeko hawe mabuhu!” Agaiana ane bara niwei apa au naparaluu, apami bunduna? 17 Nodo wori hai pepoinalainta. Ane tauli mepoinalaike i Pue, agaiana babehianta bara moula peundeaNa, pepoinalainta iti mate, lempona pepoinalainta mbero-mbero pea.
18 Manoto ara au ina manguli node, “Hadua tauna meharunga i pepoinalaina, hai tohaduana meharunga i babehiana au maroa.” Agaiana kuuli: ane bara maroa babehiamu, bara ina raita pepoinalaimu iti. Hangko i babehiangku au maroa, ina kupopaitaa woriko pepoinalaingku i Pue. 19 Ba nipoinalai hadua pea Pue Ala? Tou mpuu diti. Agaiana ane noiti pea, bara handa! Lawi mogalorihe seta, mampoinalai worihe kahaduana pea Pue Ala. Ido hai moradahe anti kalanganda. 20 Ntuli mpuukau? Ba niuli handami pepoinalaimi i Pue Ala nauri bara ara babehiami au maroa? Ane nodo pepoinalaimi, bara ara pobunduana! 21 Hangangaa nikatuinao tuntukana Burahima: ia naimba Pue Ala tauna manoto anti kamaroana babehiana, lawi ia masilolongami ina mampopenomba Isaki anana, i Pue Ala i wongko watu pohuwea popenomba. 22 Hangko i tuntukana iti, pepoinalaina Burahima tongawa i babehiana. Mewali, anti babehiana au maroa, bara ara kamakurana pepoinalaina. 23 Ido hai tepabukeimi apa au teuki i lalu Sura Malelaha au manguli:
“Burahima mepoinalai i Pue Ala,
ido hai naimba Pue Ala tauna au manoto.”*
Mewali, Burahima rauli himadana Pue Ala. 24 Mewali taisami, tauna au maroa babehianda naimbahe Pue Ala manoto i peitaNa, agaiana tauna au mepoinalai pea hai bara maroa babehiana bara Naimba manoto i peitaNa.
25 Nodo wori tuntukana Rahab hangkoia, hadua towawine au bara maroa adana. I temponda bahangkia surodado to Yahudi ratudu lao mependenga, napopehupehe Rahab i souna hai natulungihe padu moliu i rara ntanina. Anti babehiana iti, ido hai naimbami Pue Ala tauna au manoto.
26 Mewali, ane ara hadua tauna au barapi moinao, lempona matemi. Nodo wori, pepoinalainta i Pue, ane bara tongawa i babehianta, lempona matemi pepoinalainta, barapi ara pobunduana.