Sura au nauki
Yakobu
1
1 Tabea hangko iriko, Yakobu, hawinana Pue Ala hai Pue Yesu Kerisitu. Sura ide kupakatuakau to Isaraeli au hampulo hai rontina au mahawukau i humalele dunia.Pepoinalai hai kanoto lalu
2 Halalungku ope-ope! Ane narumpake mampopengaa kapari hai pekelo, inee masusa lalunta. Aginari tapokatana. 3 Lawi taisa: ane pepoinalainta rapetandaka hangko i kanarumpata kapari, mewalike mantaha. 4 Hai hangangaa mantaha liliuke duuna i kahopoana bona maroho ntepuu pepoinalainta hai barapi ara kamasalanta ba kamakuranta.
5 Ane arakau au bara moisa rara mokadipura tuwomi, agina niperapi kanoto lalu hangko i Pue Ala, hai batena Naweikau. Lawi apa au Nakira, Nakiraiahe ope-ope tauna hangko i kabulana laluNa, barahe Nawei ngkahunda-hunda. 6 Agaiana ane merapike i Pue Ala, hangangaa mepoinalai mpuuke. Bara peisa bata-bata lalunta. Lawi hadua tauna au bata-bata laluna, peisa rapandiri nodo balumba au nawui himburu node hou node mai. 7-8 Lawi tauna au nodo, morompenga lalunda, bara tetida pampekirinda. Ido hai barahe peisa moharunga apa pea hangko i Pue.
Paturo i topeahi-ahi hai i topebuku
9 To Sarani au meahi-ahi tuwonda, hangangaa matanahe, lawi nauri nodo, batena napaiwongkohe Pue Ala anti pepoinalainda. 10 Nodo worihe to Sarani au pebuku, hangangaa matanahe, ane tempona tuwonda napaiwoi Pue Ala. Lawi tauna au pebuku hampalai pea katuwonda nodo bunga. 11 Lawi ane nasimbaki alo au makere, liliu malau, alana maoru bungana hai matantami peraena. Nodo wori tauna au pebuku: ina matehe tanganda mourusi peawanda.
Pampetandaka hai pekelo
12 Morasihe tauna au mantaha i lalu kapari hai pampetandaka. Lawi ane pepoinalainda mantaha i pampetandaka iti, ina molambihe katuwo au bara mokahopoaa au nadandimi Pue Ala i tauna au maahi Iria. 13 Ane arake au rakelo bona mobabehi dake, inee tapehangu pekelo iti hangko i Pue Ala. Lawi Pue Ala bara peisa rakelo bona mobabehi dake, hai Ia bara wori mokelo tauna. 14 Agaiana ope-ope tauna tekelo i temponda nadii peundeana lalunda au kadake. 15 Ane mampeulaike peundeana lalunta, batena mobabehike dake. Hai ane iti au tababehi liliu, kahopoana ina naantike i kapate.
16 Halalungku au kupokaahi! Ineekau rapakanawo! 17 Ope-ope au maroa hai au bara ara kamakurana tahumba hangko i Pue Ala. Iami au mampopewali ope-ope au mewangka i langi. Ope-ope au mewangka iti, ara katebaliana. Agaiana Pue Ala, bara ara katebaliaNa, hai Iria bara wori ara kamakaindi. 18 Napopewalimoke anaNa moula peundeaNa haduduaNa melempo i Ngkora Marasa, au bara ara kamasalana, bona hangko i ope-ope au Napopewali, ikitami au Napokatana ntepuu.
Hangangaa mampeulaike Ngkorana Pue Ala
19 Halalungku au kupokaahi! Nipailalu maroa lolita ide: ikita ope-ope hangangaa manaki talinganta mampehadingi lolitana tauna, hai ineeke sosa mololita hai ineeke hoholiga rumpu. 20 Lawi tauna au rumpu, barahe peisa mobabehi apa au hintoto moula peundeana Pue Ala. 21 Ido hai hangangaa nikabaha ope-ope babehia au kedai hai babehia au kadake au rapobiasa tauna i dunia ide. Hangangaa modoko maroakau Ngkora au nahawuka Pue Ala i lalumi, lawi Ngkora iti au makuasa mohoremakau hangko i huku dosami.
22 Mewali, ane mohadikau Ngkorana Pue, hangangaa nipeulai. Inee nipehadingi mbero pea. Lawi ane nodo, mopakanawomokau watami haduduami. 23 Tauna au mampehadingi Ngkorana Pue hai bara napeulai, peisa rapandiri nodo hadua tauna au mampewao. 24 Karoona mampeita lenggena, padu hai barapi nakatuinao ba noumba lenggena. 25 Ido hai hangangaa nipailalu maroa Ngkorana Pue Ala hai nipeulai liliu. Lawi Ngkorana Pue bara ara kamakurana, hai ara kuasana mokabahake hangko i dosa. Mewali, inee nipehadingi pea Ngkora iti hai naliu inaomi. Hangangaa nipeulai Ngkora iti, lawi ope-ope tauna au mobabehi nodo, batena nawatihe Pue Ala i apa pea au rapobago.
Posarani au tou i peitaNa Pue Ala
26 Ane ara hadua tauna au manguli ia mosarani mpuu agaiana bara naisa mokampai pohumena bona maroa polololitana, mopakanawomi watana haduduana. Posaranina iti bara mobundu. 27 Ane mampeinaoke mewali tauna au maroa posaraninta hai au bara ara kamakuranta ba kamasalanta i peitana Pue Ala Umanta, idemi au hangangaa tababehi: motulungike anangkoi au ilu hai tobemba au meahi-ahi tuwonda, hai ineeke moula babehianda tauna au barahe moisa Pue Ala.