Paturo kana i halalu hampepepoinalai
5
1 Ane mopaturoko hadua tobalilo au matinuwu hangko irio, ineeko makasara. Agina nukambaroa hai lolita au maalusu, nuimba umamu. Nodo wori i anantomoane, nuimbahe halalumu, 2 towawine au matinuwu nuimbahe inamu, hai towawine au mangura nuimbahe adimu; nupamaroa mpuu ope-ope babehiamu irihira.Kana i towawine au bemba
3 Ane arahe towawine au bemba, au meahi-ahi mpuu tuwonda, hangangaa tabila hai takadipura wohiraia. 4 Agaiana ane tobemba au ara anana ba ampuna, anana hai ampuna iti hangangaa nupaturoahe noumba rara mokadipura tosaenda bona mohurungihe kamaroana tosaenda. Lawi iti au mopamatana laluna Pue Ala. 5 Tobemba au tou-tou mpuu meahi-ahi tuwona, iami tobemba au tuwo sadudua pearai, bara ara au mokadipura. Batena pearai meharunga hai mekakae liliu i Pue Ala. 6 Agaiana tobemba au mohaoki peahe katana-tana, nuimbamohe mate nauri tuwo manihe, lempona matehe i lalu pepoinalainda. 7 Nupahawe ope-ope paturongku ide i halalunta hampepepoinalai bona bara masala babehianda. 8 Lawi ane ara hadua tauna au manguli maroho pepoinalaina i Pue Ala, agaiana bara mokadipura halaluna hai tinana, babehiana iti mosapuaka pepoinalaina. Melumbu kakadakena hangko i tauna au bara mepoinalai i Pue Ala.
9 Tobemba au peisa rapopesua hanganda i lalu sura poukia hanga-hanga tobemba bona ratulungi hangka topepoinalainda, batena pea tauna au node: tinuwunda bara makura hangko i ini pulona parena hai au hadua pea tobalilona.a 10 Hangangaa au manoto babehianda, pandirina: hangkoia mokadipura maroamohe ananda, matanahe modoko torare i sounda, motulungihe halalunda hampepepoinalai, mokadipurahe tauna au i lalu kapari, hai mobabehihe hinangkana bago au maroa.
11-12 Ane tobemba au mangura mani, inee rauki hanganda i lalu sura poukia hanga-hanga tobemba. Lawi ane ara mani peundeana lalunda motambi, batenda ina motambi. Kahopoana masalahe lawi moliungihe dandinda i Kerisitu. 13 Mewali, ane mangura manihe, inee rauki hanganda i lalu sura poukia hanga-hanga tobemba. Lawi biasana lohehe mampopolumao bagonda au hintoto i lindona Pue, hai mesonda-sonda pea bagonda. Hai bara pea iti, agaiana moanti-anti worihe lolita i ranganda. Raunde peami mampesuaki urusiana ranganda, hai mopahawe liliuhe lolita au bara hintoto rahowara. 14 Ido hai kuuli, tobemba au mangura manihe, agina motambi hulehe, bona moanahe, hai mokadipura maroahe tauna au i lalu sounda dati ara raranda iwalinta mokakabosaike. 15 Lawi ara tobemba au barapohe mampeulai peundeana Kerisitu, mampeulai pearaihe peundeana Datu Tokadake.
16 Ane arahe to Sarani hai ara tinanda au bemba, agina ihira au mokadipurahe datihe mopamantimi jumaa au mokadipurahe tobemba iti. Lawi jumaa hangangaa mokadipura worihe tobemba ntanina au meahi-ahi mpuu tuwonda au barapohe ara mokadipura.
Paturo ntanina
17 Penatua au maroa pobagonda, hintoto mpuuhe rawei peadai au rombela hangko i tauna ntanina, pelumbunami penatua au mepaturo hai au mopahawe Ngkorana Pue. 18 Lawi i lalu Sura Malelaha teuki node:
“Ane japi au tangana rapopobago
inee raboke humena.”b
Hai teuki wori: “Topobago hangangaa molambi sarona.”*
19 Ane ara hadua penatua au rasalai tauna, inee hoholiga nudoko pesalainda. Ane arami rodua ba talu sabi au mopakanoto katouna kamasalana, hangko peisari nudoko. 20 Ane ara mpuu salana, nukambaroa i lindonda jumaa bona au ntanina langahe mampeulai babehiana. 21 Kuweiko lolita ide Timotiu bona nupeulai mpuu ope-ope hawangku, hai ineeko mampopontani tauna. Pue Ala hai Kerisitu Yesu hai malaekaNa au tepilei mampetiroke.
22 Ineeko hoholiga moangka tauna mewali penatua, nuparesa hampai babehianda bona dati oio au mohuru ane mobabehihe dosa. Maroa-roako bona manoto liliu babehiamu.
23 Inee owai bula pea au nuenu agaiana hangangaa nugalo wori haodi hai anggoro, lawi kuisa doko mahai taimu.
24 Arahe tauna, au kehapiri bara mani rapohuda-hudaa kara-karanda, tongawami kamadosanda. Ara worihe tauna au bara mani taisa dosanda. Ane roorai rapohuda-hudaa kara-karanda, hangko taisari. 25 Nodo wori, arahe tauna au tongawa kamaroana babehianda. Hai ara worihe tauna au bara raisa ranganda kamaroana babehianda, agaiana i alo au ina mai babehianda au maroa iti ina tongawa.