Paturo i hawi
6
1 Halalunta hampepepoinalai au hawi tuwonda, nupaturohe bona mobilahe hai mampeulaihe ampunda i hinangkana dati ara hadua tauna au mopapakoi hangana Pue Ala ba mosapuaka paturonta. 2a Ane ampunda iti to Sarani, bara hintoto ane hadua hawi manguli node, “Bara paraluu kupeulai hawana, lawi ia halalungku i lalu hangana Pue.” Agina napamaroari kamampopolumaona bagona ampuna, lawi ampu au napobagoa iti iami halaluna hampepepoinalai au napokaahi.Kana i paturo au mepakanawo hai kana i doi
2b Ope-ope au kuuki ide, hangangaa nupaturoahe tauna bona maroho pepoinalainda.
3 Ane arahe au moanti paturo au mosisala hai paturonta, barahe mampoinalai paturo au tou hangko i Amputa, Pue Yesu Kerisitu hai bara worihe mampoinalai lolita au mopaturoke bona mengkoruke i Pue Ala, 4 tauna iti mengkamapande peahe, moleri baratohe moisa apa-apa. Peundeanda bona mombehehe liliuhe hai mohaoki peahe posisisala i lolita au mopaara kamahina, pobungka-bungka, pekakabosai, pesasalai, 5 hai pombembehehe. Pekirinda tauna iti barapi maroa, barahe moisa paturo au tou. Rauli, peisahe molambi rasi hangko i poagamanda.
6 Katouana, poagamanta moanti rasi au mahile, asala apa au ara irikita tapohandaka. 7 Lawi kahawenta i dunia ide, bara mai ara au taanti. Nodo wori i pesulenta, bara ara au ina taanti mesule. 8 Mewali, ane arami paandeta hai hampita, handami. 9 Agaiana tauna au mampeinaohe pebuku, mamurahe tekelo mobabehi dosa lawi teheahe hai peundeana lalunda au kadake. Peundeana lalunda iti bara mobundu, moanti peahe i kahurewu. Kahopoana manawohe i lalu dosa, alana molambi mpuuhe rugi. 10 Lawi ane mampokaelu peamoke doi, itimi au mopaara ngkaia pakana babehia kadake. Arahe tauna au nodo, au mohaoki liliu peahe doi, alana mopalehihe pepoinalainda, hai narumpahe mampopengaa kapari.
11 Agaiana oio Timotiu, hawinamoko Pue Ala. Nupakarao tuwomu hangko i ope-ope babehia au nodo. Nupari-pari mampeulai babehia au manoto hai mengkoruko i Pue Ala. Nupakaroho pepoinalaimu i Kerisitu hai kamaahimu i hangka rangamu, mantahako i lalu kapari hai Nupamaalusu poantimu i hangka rangamu. 12 Nupari-pari bona tuwoko hintoto hai apa au nupoinalai, hai nupakaroho pepoinalaimu au moantiko i katuwo maroa au bara mokahopoa. Lawi itimi tunggaiana Pue Ala mokakioko mewali taunaNa bona molambiko katuwo maroa au bara mokahopoa hai au nupangakumi i lindonda tauna bosa, kamepoinalaimu i Pue Yesu.
13 Mewali Timotiu, i lindona Pue Ala au mopatuwo hinangkana, hai i lindona Kerisitu Yesu au mopahawe notoNa i Pontiu Pilatu kuuliangaako: 14 hangangaa nupeulai ope-ope hawa ide i karoa-roakana dati ara kamasalamu duuna hawe hule Amputa Yesu Kerisitu 15 i tempo au napakanotomi Pue Ala moula peundeaNa. Batena pea Ia au makuasa hai au hintoto ratoia. Iami Datu hangko i ope-ope datu, Pue hangko i ope-ope pue. 16 Batena pea Ia au bara ina mate. Ia maida i lalu kamabaa au meawa ntepuu. Bara ara hadua au peisa mohungkuki ba moita, lawi Ia bara raita. Batena pea Ia au hintoto rabila hai au hintoto moparenta hawe i hae-haena. Amin.
17 I tauna au pebuku, nupaturohe bona ineehe mampemahile hai ineehe meharunga i anu-anu dunia, lawi anu-anu dunia batena pea marugi. Agina mepoinalaihe i Pue Ala au moweike ope-ope pewati au bara ara hokana. Iami au tapokatana. 18 Nuweihe lolita bona manoto liliu babehianda, maroa lalunda: motulungihe hangka ranganda hai ineehe bohi. 19 Lawi ane nodo babehianda, himbela peahe hai morampu anu-anu au maroa i lalu suruga, hai batena molambihe katuwo au maroa ntepuu.
Kahopoa sura
20 Oio Timotiu, napoinalaiamoko Pue Ala moanti paturo au manoto. Mewali, hangangaa nukingki maroa paturo iti dati ara au mobaliki. Karaohi lolita au bara mobundu hai paturo au bara manoto au rauli kapande agaiana bara tou. 21 Katouana tauna au mampeulai paturo iti, mopalehimohe pepoinalainda.
Pue mowatikau ope-ope.
Hangko iriko
PAULU