Guru-guru au mepakanawo
4
1 Inao Malelaha manguli i kanoto-notoana: i alo au ina mai, arahe tauna au ina mousuli hangko i pepoinalainda i paturo au tou. Ina mengkoruhe i kuasa au menawo-nawo hai mampeulaihe paturo au hangko i seta, 2 au rapahawe tauna au mepakanawo. Lolitanda bara himbela hai babehianda. Lalunda makaindi; barapi raisa maea ane mobabehihe babehia au kadake. 3 Mopaturohe tauna bona ineehe motambi hai mopaliahe bahangkia pakana paande. Katouana ope-ope paande iti napopewali Pue Ala bona raande. Ikita tauna au mepoinalai i Kerisitu hai au moisake paturo au tou peisake moande paande iti, asala tapekakaea hai tauli ngkaia kamaroana i Pue Ala. 4 Lawi hinangka au napopewali Pue Ala maroa, hai bara ara au rapalia ane tadoko hai tauli ngkaia kamaroana i Pue Ala, 5 lawi Ngkorana Pue Ala* hai pekakae mopamalelaha ope-ope iti.Hawina Pue Yesu au maroa pobagona
6 Ane ope-ope paturo ide nupaturoahe halalunta hampepepoinalai, ina mewaliko hawina Kerisitu Yesu au maroa. Hai ina maroho mpuu lalumu anti Ngkorana Pue Ala au tapoinalai hai paturo au maroa au nupeulaimi. 7 Ineeko motende tempomu lao mampehadingi lolita au bara tou hai au moanti peake mampeulai peundeana lalunta au kadake. Agina nupakaroho lalumu mengkoru i Pue Ala. 8 Lawi ane mopakarohoke watanta, haodi pea pobunduana. Agaiana ane lalunta tapakaroho mengkoru i Pue Ala, pobunduana ngkaia, lawi pengkoruta i Pue Ala moanti pewati i katuwonta, maroa i dunia ide maroa i alo au ina mai. 9 Lolita ide tou hai hangangaa tapoinalai mpuu. 10 Ido hai hangangaa mobago mantimike, lawi mepoinalaike i Pue Ala au tuwo i hae-haena hai au mohorema ope-ope tauna, ihira au mepoinalai Iria.
11 Ope-ope au kuuliangaako ide, hangangaa nupaturoahe hai nuhawaahe bona rapeulai. 12 Nauri mangura maniko, hintotoko rabila tauna. Hangangaa mewaliko pandiri i halalunta hampepepoinalai i lalu pololitamu, babehiamu, kamaahimu i hangka rangamu, pepoinalaimu i Pue, hai i lalu katuwomu au malelaha. 13 Hangko damanina hawe, Sura Malelaha hangangaa nubasaa liliuhe halalunta hampepepoinalai. Hangangaa nupakaroho liliu lalunda hai nupaturohe. 14 Ineeko mokabaha bagomu au hangangaa nupopolumao moula kapande au naweiko Inao Malelaha. Kapande iti raweiko i temponda penatua moona taienda hangkoia i tanoanamu mopahawe lolita hangko i Pue Ala kana irio. 15 Ope-ope bagomu hangangaa nupopolumao mpuu hangko i lalumu bona tongawa i ope-ope tauna kamaroa-roangari pobagomu i Pue.
16 Poantimu hangangaa nukampai, hai paturomu hangangaa manoto. Nupobago liliu ope-ope iti bona molambiko katehorema, hihimbela hai tauna au mampehadingi paturomu.