Babehia au hintoto i penatua
3
1 Tou mpuu lolita au manguli node: tauna au mampeinaohe mewali penatua, mohaokihe bago au maroa. 2 Ido hai hadua penatua hangangaa au bara ara kamasalana. Hangangaa hadua pea towawinena, hai hangangaa nabuku morempeki peundeana laluna au kadake. Hangangaa manoto laluna hai maroa adana. Hangangaa matana modoko torarena. Hangangaa naisa mepaturo. 3 Bara peisa au malangu-langu ba au paka mobungka-bungka. Hangangaa au maalusu poantina, au mohintuwu hai rangana, hai au bara mohaoki pea doi. 4 Hangangaa naisa mokadipura maroa tauna au maida i lalu souna, hai anana hangangaa mengkoruhe i tosaenda hai mebilahe. 5 Lawi ane ara hadua tauna au bara naisa mokadipura tauna i lalu souna, noumbami kanabukuna mokadipura halaluna hampepepoinalai. 6 Ane ara hadua tauna au hangko mepoinalai i Pue Yesu, ia bara peisa raangka mewali penatua, dati mampemahile, alana molambi pehuku nodo au rahukua Datu Tokadake. 7 Kaliliuana, hadua tauna au mewali penatua hangangaa au bara wori ara kamasalana i peitanda tauna au barahe to Sarani dati nakelo Datu Tokadake alana manawo hai kahopoana ina rakakabosai tauna.Babehia au hintoto i diaken
8 Tauna au rapilei mewali diaken hangangaa nodo wori poantinda. Hangangaa manoto babehianda hai au hintotohe rabila. Barahe au mobatantimali ba au malangu-langu ba au mohaoki peahe doi. 9 Hangangaa modoko mpuuhe paturo kana i pepoinalai au napahaweake Pue Ala, hai mampeulaihe paturo iti hangko i kamalelahana lalunda. 10 Ane ara hadua tauna au mampeinao mewali diaken, nipeita hampai babehiana, ane bara masala, hangko peisari raangka mewali diaken.
11 Nodo wori towawinenda,a hangangaa manoto babehianda hai au hintotohe rabila. Barahe topoanti-anti lolita. Hangangaa raisa morempeki peundeana lalunda au kadake, hai hangangaa rapoinalaihe i paka-pakana.
12 Hadua au mewali diaken, hangangaa au hadua pea towawinena, hai hangangaa raisa mokadipura maroa ananda hihimbela hai tauna au maida i lalu sounda. 13 Ane maroa pokingkinda bagona Pue, ina rabilahe tauna, hai ina tetambai kapebainda mampololita kana i pepoinalainda i Kerisitu Yesu.
Tunggaiana Paulu mopakatu sura i Timotiu
14 Timotiu, ara mpuu tunggaiaku lao mosondakiko. Nauri nodo, kupakatuako sura ide, 15 bona ane rapana mahae manina pane hawe irio, nuisa babehia au hintoto i ope-ope taunana Pue Ala. Lawi ikita ide, menombake i Pue Ala au tuwo i hae-haena. Ikita au mokingki paturo au tou au hangko i Pue Ala. Maroho mpuu pepoinalainta i paturo iti, hai takampai paturo iti bona dati ara au mobaliki. 16 Maroa ntepuu paturo au tapeulai anti pengkorunta i Pue Ala. Hangkoia paturo iti bara raisa tauna, agaiana ide-ide natudungiamoke Pue Ala. Lawi idemi au tapoinalai kana i Yesu Kerisitu:
Iami
au mewali manusia,b
au napakanoto Inao Malelaha,
hai au raita malaeka.
BambariNa rapahawe i tauna au bara manihe moisa Pue Ala,
hai Ia rapoinalai tauna i humalele dunia,
hai naore Pue Ala lao i suruga i lalu peawaNa.