Hangangaa mampekakaeake topoparenta hai ope-ope tauna
2
1 Nguru-nguruna, kuperapi bona ope-ope tauna au mepoinalai i Pue Yesu, moorehe pekakaenda, pamperapinda hai pangulinda ngkaia kamaroana i Pue Ala. Hangangaa mampekakaeake ope-ope tauna, 2 ope-ope datu hai ope-ope topoparenta. Hangangaa tapekakaeahe topoparenta bona maroa katuwonta hai bara ara tauna au mampopeahi-ahike bona peisake menomba i Pue Ala hai mobabehi liliuke babehia au hintoto rabila ranganta. 3 Itimi au maroa hai au naunde Pue Ala au mohoremake hangko i huku dosanta. 4 Lawi peundeaNa bona ope-ope tauna tehorema hangko i huku dosanda, hai moisahe paturo au tou. 5 Hadua pea Pue Ala, hai hadua pea wori au peisa mopahintuwu Pue Ala hai manusia. Topepahintuwu iti, manusia wori, iami Kerisitu Yesu. 6 Ia mohuhu wataNa rapapate mohuru dosa ope-ope tauna. Iti Nababehi i tempo au napakanoto Pue Ala bona tongawa irikita peundeaNa mohorema ope-ope tauna hangko i huku dosa. 7 Ido hai naangkamona Pue Ala mewali suroNa. Natuduna mopahawe bambari iti i tauna au barahe to Yahudi. Natuduna mopaguruahe paturo au tou bona mepoinalaihe i Yesu. Tou mpuu au kuuli ide, barana modongko.Paulu mopaturo Timotiu kana i poanti au hintoto i tobalilo hai i towawine i lalu paminggu
8 Peundeaku bona ane mamingguke iumba pea, tobalilo hangangaa mekakae i lalu kamalelaha, hai barahe peisa mosisala ba masodo. 9 Nodo wori towawine. Hangangaa mopakehe hampi au hintoto, moula ada au maroa. Ineehe mobubungai hampinda bona ratoiahe ranganda, ineehe mampopengaa-ngaa weluanda, ineehe mopake bulawa ba mutiara hai hampi au masuli-masuli. 10 Aginami towawine ratoia anti babehianda au maroa, hintoto hai poanti towawine au mengkoru i Pue Ala.
11 Towawine hangangaa mengkoru hai mandii-ndiihe mampehadingi paturo. 12 Towawine barahe kupaliu mopaturo ba moparentaihe tobalilo. Hangangaa mandii-ndii peahe. 13 Lawi au nguru-nguruna napopewali Pue Ala, iami Adama, hangko Hewari. 14 Bara Adama au naakalangi Datu Tokadake, agaiana Hewa au naakalangi, alana molingkai parentana Pue Ala, 15 ido hai towawine rahukumohe molambi pantodiha i temponda moana. Nauri nodo, batena molambi worihe katuwo maroa asala mepoinalai liliuhe i Pue, mampokaahi liliuhe hangka ranganda, hai malelaha tuwonda moula ada au maroa.