Surana Suro Paulu au nguru-nguruna i
Timotiu
1
1 Sura ide hangko iriko Paulu, surona Kerisitu Yesu. Mewalina suroNa moula hawana Pue Ala au mohoremake hangko i huku dosanta, hai moula hawana Kerisitu Yesu au mewali peharunganta. 2 Sura ide kupakatu irio Timotiu au kupoanamoko lawi himbela pepoinalainta. Mekakaena i Pue Ala Umanta hai i Kerisitu Yesu Amputa bona Nawatiko, hai Natudungiako ahiNa, hai Naweiko roa ngkatuwo.Nukontohe guru agama au mepakanawo
3 Kuperapi bona oio maida liliuko i Epesu nodo au kuuli hangkoia i peangkaku, mai inde i Makedonia. Lawi inditi arahe bahangkia tauna au moanti paturo au sala, hai hangangaa nukontohe bona ineehe moanti liliu paturo au mepakanawo. 4 Nukontohe bona ineehe mampololita lolita au rabababehi ba au bara tou kana i ulu bubunda au bara mau hopo. Ope-ope iti mopaara pea pobungka-bungka, lawi barahe mampeulai tunggaiana Pue Ala au taisa hangko i pepoinalainta. 5 Tunggaiana paturongku ide bona ikita ope-ope mombepokaahike. Hangangaa mombepokaahike hangko i lalunta au malelaha, hangko i kabulana lalunta hai hangko i kamarohona pepoinalainta i Pue Ala. 6 Arahe bahangkia tauna au barapohe mampeulai rara ide. Morara ntanihe hangko i rara au manoto, hai mampombehanaingi liliuhe lolita au bara mobundu. 7 Rapeinao mepaturo kana i Aturana Musa, agaiana paturonda bara raisa apa lempona. Rauli, mapandehe mopakanoto lempona Aturana Musa, agaiana katouana bara raisa apa tunggaiana.
8 Taisa Aturana Musa iti maroa, asala tapopobundu hintoto hai tunggaiana. 9 Hangangaa takatuinao apa tunggaiana Aturana Musa bona kana katapopobunduna. Aturana Musa barake rawei bona mokambaroa tauna au manoto babehianda. Agaiana tunggaiana bona mokonto:
tauna au madosa
tauna au molingkai atura iti,
tauna au meewa,
tauna au barahe mengkoru i Pue Ala,
tauna au barahe moagama,
tauna au mohaoki pea peundeana laluna,
tauna au mopapate inana hai umana ba tauna ntanina,
10 tauna au mebualosi
hai tauna au mobabehi babehia au merikai
nodo au rababehi tobalilo hore tobalilo
ba towawine hore towawine,
tauna au motawani rangana bona rapohawi
tauna au mosabi dongko,
hai ope-ope tauna au mobabehi apa au bara hintoto hai paturo au tou.*
11 Paturo au tou iti talambi i lalu Ngkora Marasa hangko i Pue Ala au mahile tuwoNa hai au hintoto ratoia. Ngkora Marasa iti napoinalaiana Pue Ala bona kubambari i ope-ope tauna.
Paulu manguli ngkaia kamaroana anti kamaahina Pue i lalu katuwona
12 Kuuli ngkaia kamaroana i Amputa Kerisitu Yesu, lawi Naweina karoho, Napoinalaiana mampopolumao bagoNa, hai Naangkana mewali topobagoNa. 13 Hangkoia mopapakoina Yesu hai mampopeahi-ahihe tauna au mepoinalai Iria. Agaiana nauri nodo, Napokaahi mpuuna, lawi i tempo iti bara manina mepoinalai Iria hai bara mani kuisa lempona apa au kubabehi. 14 Nauri mahile dosangku, agaiana melumbu mani kamahilena ahina Pue Ala. Natulungina hangko i kabulana laluNa, alana mampoinalai hai mampokaahina Kerisitu Yesu.
15 Manoto mpuu lolita au manguli: “Kerisitu Yesu mai i dunia bona mohorema tomadosa hangko i huku dosanda.” Tou mpuu lolita iti hai hintoto tapoinalai. Hai hangko i ope-ope tomadosa, ikomi au melumbu dosangku. 16 Agaiana i lalu kamadosangku iti, napokaahina Pue Ala bona i lalu kamahilena dosangku iti, tongawa mpuu kasabarana Yesu Kerisitu. Mewali, i lalu katuwongku ide, tongawa mpuumi ahina Pue, pane peisana mewali pandiri i ope-ope tauna bona mepoinalai worihe i Yesu hai molambihe katuwo maroa au bara mokahopoa.
17 Pue Ala, Datu au poparentaNa bara mokahopoa,
hintoto mpuu rabila hai ratoia,
lawi Ia tuwo i hae-haena,
au bara taita,
hai au bara ara hasimbelana.
Tapomahile hai tatoia hangaNa
hawe i hae-haena. Amin.
Hawana Paulu i Timotiu
18 Timotiu, anangku! Kuperapi bona nupeulai paturongku au kupahaweako ide. Hangangaa nupailalu lolitanda tauna au motadulakoiko i lalu pepoinalaimu, au mopakaroho lalumu hai au mopaturoko. Nupailalu paturonda iti bona maroho pampopolumaomu bago au nukingki nodo hadua surodado au keate mombeala. 19 Mantahako i lalu pepoinalaimu, hai mobabehi liliuko babehia au maroa hangko i kabulana lalumu. Ara bahangkia tauna au mosapuaka ope-ope paturo ide, alana marugi pepoinalainda. 20 Arahe rodua au marugi pepoinalainda iami Himeneus hai Aleksander. Ihira iti kuhuhuhe i kuasana Datu Tokadake bona molambihe pehuku datihe mopapakoi kuasana Pue Ala.