4
याआकोअता ऐ माआ प्रिय पाहि ज्यामेहे माआ जिवालागित रोतलू होय जो माहू ख़ुशीई आना मुकुट होय ऐ प्रिय पाही प्रभु में एह्ल्यास प्रकारे स्थिर रोवा 2 आय युओदिया आना संतुखे याआ बेनुहू प्रोस्ताहीत कोअत्लू का तुमु प्रभू माय एकहारखे मोन बोणाडीत रो 3 माआ प्रिय दोस्ता ताहु पण आय आग्रह कटो का याआ बोअयीही मदत कराहे वेलेमेन्स तेहलूज माआ बिहरे सहकार्य सहित सुवार्ता प्रचार माय माआरी एकजूट होय त्याआ नावे जीवनाआ पुस्तकाम लेखिलो गोये होय 4 प्रभूमेहे आखुवेल आनंद रो आय फाशु कोहो आनंदीत रो . 5 ओ आय फासी कोतलू का आनंद कोईत रो तुमाआ सहनशील आत्माच ज्ञान आखे मांहुंमे रोअलाआवे प्रभू जागेज होय 6 कोडोबीही गोठीपो चिंता कोहू नाहा पोन हरएक परिस्थितीमेह धन्यवाद आपित प्रार्थना आना विनती कोईत आपाआ मागणी परमेश्वरा आगाडी कोआ 7 याज परमेश्वारापोरोत मिलविनारो शांती जी सामंजीलो तिवोल होयतुमाआ मोनाहा आना तुमाआ बुद्धीला ख्रिस्त येशुमेहे हाजूहोय मेके 8 ओ पाहीही तिया गोठीरी लक्ष्य दया जे खोरो होय जे वोडो होय , जे योग्य होय , जे पवित्र होय , जे खुशिमेरोत होय , जे श्रवणीय होय , किंवा किबी पण बिहरे गुण वा किबी प्रशंसा 9 जे तुमु मापोरोत हिकल्ये होय , जुळाविते होय , उनाअयो होय किंवा जे किबी कोअता माहु तुमु पालील्यो होय तिया गोटीविषयी अभ्यास कोईत रो शांतीचा उगेहे स्थान जो परमेश्वर तुम्हाआरी होय 10 तुमु माआ निच्शीत हाजाकोता फूस कोईत ओते परंतु ते देखाड्ल्याकोता तुम्हामे वेल मिल्यू नाहा परंतु ओमे आखरी तुम्हामे माबद्दल फासी चिंता जाग्तली उवी होय ह्याआरी आय प्रभूमे आय जास्तीज खुस पोयो होय 11 किबी आवश्यक होय कोईत कोल्यो आय नाहा काहाके आय ज्या पण परीस्तीतीम रोला होय आय त्याहाम संतोष रोलो सिकाहू लेधलो होय 12 दैन्यव्यवस्थेत रोहिलो माहु होमजे होय आना ओ पण मालूमे होय का संपन्नतेत केहलो रोल्या जोवे केहली पोन वेल आवयी होय आना एह्ली पण परिस्थिती, जेबी पेट पाअये होय किंवा फुकल्यो होय , जेबी जागे जाखो किबी ओईला किंवा जेबी जागे किबी नेओय आय याआ आखाम सुखी रोनाराआ भेद शिकायो होय 13 जो माहु शक्ती आपोहो त्यावाही आय आखे परिस्थिती आगाडी जाऊ शकतो 14 किबी पोन होय तुमु माआ मेहनतीमेहे आथे आपित हाजो काम कोल्यो होय 15 ऐ फिलपैकरांनो, तुम्हामे ताहा ठाऊकच होय सुवार्ता प्रचाराच्या पेल्लाठीच दिहोम जाहा आय डोडू दुनिया सोडये ओते तेहालाम लेनदेन माय तुमाआ मोडंली सोडीत बिहीरा मंडळ्यानी माकोअता आथे आगाडी कोल्योओ नेओतू 16 आय जाहा थीसलनुका माय ओतु तेहालाम माआ आवश्यकता पुरो कोइलाकोअता तुमु तोच -तोच माहु मदत मोक्ल्यीत ओते 17 एहलो नाहा का दानाहा अपेक्षा कोअत्लू परंतु आय ताहा ओ अपेक्षा कोअत्लू का तुमाआ जमेची बाजू वाळविलोओ एह्ली इच्छा कोअत्लू 18 तुमु इपफ्रुदितूस च्या ओतु कोईत दान मधुर गंध भेट माय माआहने मोक्ल्यीत होय ते एक एहलो तेईतले कोअला का योग्य बलिदान होय ज्याआपोरोत परमेश्वर प्रसन्न ओतू तियाअ दानांनी माआ गरजेदेखओ जाखो उवे होय माहु पुरो तर्हेने आपिलू होय ती वस्तु मधुर गंध रुपोमे भेटाने होय एहलो का ज्या भेटाने परमेश्वर खुश ओतू 19 माआ परमेश्वर तुमाआ आखी गोरोज ख्रिस्त येशुमेहे तुम्हामे आपाआ धनाने पुरो कोअही 20 आमुहू आबहू परमेश्वराआ कायम गौरव उवनारा रोहीजाआये 21 ख्रिस्त येशूउ हरएक भोक्तोहो नमस्कार, माआरी जे पाही होय ते तुम्हामे नमस्कार कोईत होय 22 तुम्हामे आखे भक्त आना विशेष कोईत कसर परिवाराआ माहे नमस्कार कोईत होय 23 तुम्हामे आखापो आमाआ ख्रिस्त येशुऊ कृपा तुमाआ आत्म्याआरी रोय आमेन.