रोमन 14

जो विश्वस्मेहे कमजोर होय त्या हा आपाआ संगती मेहे लेत लेवा पोन त्याआ निर्णीय लेहु कोअता नाहा 2 एकाहा विश्वास होय का आखे किबी खायलो उचित होय परंतु जो विश्वासामेहे दुर्बल होय तो शोक कोय्लोज खाहोव 3 जो खाहोव तिये न खाणाराआ तुच्छ मानह कायना, आना जो खायलो नाहा तिये खाणाराआ तुच्छ मानह कायना काहाके देवूही आखे किबी बोनाडहि होय 4 तू कोडू होय जो बिहीरा पावरोहो दोष देखाड्लिजे ? त्याआ स्थिर रोहिलो किंवा पोडीत जालो त्याआ स्वामीई संबध मेकोहो, परंतु ते स्थिर कइदेद जानारू काहाके प्रभू त्याहा स्थिर रोहू शकतो 5 कोडु उनाआ दिह्याहा बिहीरा दिहारोत जाखा महत्व आपोहो आना कोडु आखे दिहीहो एक एकहरको मोनोहो हरएक जनाने आपाआ मोनामे खात्री कोईत ल्या 6 जो कोडु दिह्याहा पालनारू, तो प्रभूहु मानतेहे, जो खाहोव तो प्रभुकोअता खाहोव, काहाके तो देवोओ धन्यवाद कोअत्लू 7 काहाके आपामेहे कोडु स्वतः कोअता जगत नाहा आना कोडु स्वतः कोअता मोईत नाहा 8 जर आमु जिवंत होय ताहा प्रभुकोअता जीवित होय आना जर मोईत होय ताहा प्रभुकोअता मोईत होय आखरी आमुहू जगू का मोओ , आमु प्रभूचेच होय 9 काहाके ख्रिस्त यकोअता मरण पाव्यू आना जिवंत पोयो का तो मोल्याआ आना जिवंताआ बेनोहो प्रभू होय 10 तू आपाआ पाहीपो काहा दोष लागाडीत? किंवा फासी तू आपाआ पायहोहो काहा तुच्छ मोनोहो? आमुहू आखे देवोओ न्यायासनासमोर उभे रोही होय 11 काहाके लेखिलो होय , 'प्रभू कोतलू आय जिवंत होय ताहा माआगाडी हरएक जोओ गुडघे तेकीजाये, आना हरएक जीभ देवोहो अंगीकार कोअही' 12 यकोअता आमु मायारोत हरएक जोओ देवोहो आपाआपा हिशोब आपी 13 आखरी, तीयाकोता आपु याआगाडी एकाबिहीरावे दोष लागाडहु नाहा पोन तुमु ठेरवीत ल्या का कोडु आपाआ पायोहकाजे ठोकायू किंवा ठोकर खाअला काहाके बोनहू कायना 14 माहु मालूमे होय आना प्रभू येशुमेहे माहु खात्री होय का कोंडली वस्तू स्वतः हाजो नाहा परंतु जो त्याहा अशुद्ध उल्लासीत तीयाकोते अशुद्ध होय 15 जर ताआ पाही ताआ रोटू कोइलाआ कारनोवाही नाराज ओतू , ताहा तू प्रमोवाही चालते नाहा याकोअता ख्रिस्त मोल्यु त्याहा तू आपाआ खालोज कारनोवाही नष्ट कोहू नाहा 16 आखरी, तुम्हाकोअता जे हाजो होय त्याआ निंदा कोहू नाहा 17 काहाके देवोओ राज्य खायलो किंवा पिईलो यामे नाहा ताहा नितीमत्व, शांती आना आत्म्याद्वारे मिलनारू आनंद होय , जो पवित्र आत्मावांहि मिललू 18 जो कोडु आव रीतीवाही ख्रिस्ताची सेवा कोअत्लू तो देवोहो पालत्लू आना माहामे पोटल्यो होय 19 यकोअता आमुहू तियाअ गोठीमेहे रमून रोअलो त्याआरी भेटी गोडो आना एक बिहराआ हुधारीलो उवे 20 रोटाकोअता देवाच्या कामाकोता बिगाडीलो नाहा, आखे किबी शुद्ध ताहा होय पोन तिया मांहाकोअता वाईट होय जो माहुहू त्याहा अडखळण आवे एह्लाप्रमाणे खाहोव 21 हाजो ताहा ओ होय का नाहा मांस खाही आना न द्राक्षरस पीही , आना किबी एहलो कोहू नाहा ज्याआपोरोत ताआ पायहोहो ठोकर लागे 22 ताआ जो विश्वास होय त्याहा देवोरी आपाहाच मोनामे मेका, धन्य होय जो तियाअ गोठीमेहे ज्याहा तो ठीक उल्लासीत, आपाआ स्वतःहा दोषी ठरावीत नाहा, 23 पोन जो संशय तोईत खाहोव तो दोषी ओलखिणारा काहाके विश्वासा खायलो नाहा आना जे किबी विश्वासा नाहा ते पाप होय.