रोमन 15

ओमे आमू जे बलवानो जोवे का कोमजोररो ओ कोमजूरि सहन कोईत सेकताहा ने कोडू आपाआ आपुह प्रासन कोआ 2 आमापोरोत हरएक जागऱ्याहा त्याआ हाजा कामाकोअता प्रसन्न को का त्याआ उन्नती उवे 3 काहाके का ख्रिस्ताने आपाआ स्वतःहा प्रसन्न कोल्यु नाहा पण जेहलो लेखिलो होय , “ताआ निंदकांची निंदा मापो आवयी होय ” 4 जेतेहे गोठी पाल्या पोरोत लेख्यअ गोयी होय , ती आमाखाकाजे लेखी गोयी होय का आमुहू धीर आना पवित्र शास्त्राआ हाजो आशा मेकही 5 धीर आना शांती आपणारो परमेश्वर तुम्हामे ओ वरदान आप का ख्रिस्त येशूउ नुसार परस्पर एक मोन ओतगोल्यु रोअलो 6 काहाके का तुमु एक मोन आना उनाआ स्वरात आम्हा प्रभू येशू ख्रिस्ताआ परमेश्वर याहा स्तुती कोईली 7 याकोअता जेहलो ख्रिस्ताने परमेश्वराआ गौरवकोअता तुम्हामे ग्रहण कोल्यु होय तेहलूज तुमु पण एक दिहीराहा ग्रहण को 8 याकोअता आय कोतलू का जी प्रतीक्षा आगलाडायाहा आप्यी गोयी ओती त्याहा दृढ कोइलाकोअता ख्रिस्त परमेश्वराआ हाजोपोन प्रमाण आपिलाकोअता सुंता कोईओलो महुअ पावर बन्यो 9 आना बिहरे जाती पण विसारोओ कारनोवाही परमेश्वराआ स्तुती केहेलोकोल्ये लेखिलो होय , “याकोअता आय जातीई-जातीई माय ताआ धन्यवाद कोअनारू , आना ताआ नावाआ भजन गावीही ” 10 फासी कोल्यो , “ओ जाती-जातीइ आखे माहु, त्याआ प्रजे आरी आनंद को” 11 आना फासाड़ी , “ओ जाती-जातीइ आखे माहु, प्रभूऊ स्तुती को, आना ओ राज्य राज्यआ माहु, त्याआ स्तवन को” 12 आना फासाड़ी यशया कोतलू, इशयाचा अंकुर फुटे , आना बिहरे जाती या अधिकारी उविलाकोअता एक उठी, त्याआपो बिहिरीजाती आशा मेकीत 13 परमेश्वर जो आशेमेहे दाता होय तुम्हामे विश्वास कोइलाकोअता आखे प्रकारोअओ आनंद आना ठावकुजे पुरोओत कोअही का पवित्र आत्म्याआ सामर्थ्यावाही तुमाआ आशा वोद्तो जाइअलो 14 ओ माआ पाहीही, आय स्वतः तुमाआ विषयाला निच्शीत ओलखीतलु, का तुमु पण स्वतःआ हाजाकोते पोअल्ये ईश्वरीय ज्ञानांनी जाअखो होय , आना एक बिहराहा बोध कोहू सेकतेहे 15 तेबी आय केधी- केधी ओर आपिलाकोअता तुम्हामे जे जाअखो धैर्याने लेखिलो होय ओ तियाअ कृपेच्या कारनोवाही उवे जे परमेश्वराने माहु आपिलू होय 16 का आय बिहरे जाती याकोअता ख्रिस्त यीशु पावर ओतगोल्यु परमेश्वराआ सुवार्तेची सेवा याजका एकहरको कोहू , ज्याआपोरोत बिहरे जाती या अर्पण कोअल्यो जालो पवित्र आत्मावांहि पवित्र बोणीत ग्रहण कोल्यु जाइअलो 17 याकोअता तिया गोठीइ विषया माय जे परमेश्वराआरी संबध मेकोहो, आय ख्रिस्त येशू माय माहु अभिमान वाटतो 18 काहाके तिया गोथिहिई सोडीत माहु फासी कोडला गोठीइ विषया माय कोअंलाअ धैर्य नाहा जे ख्रिस्ताने बिहरे जाती याहा अधिनतेसाठी वचन आना कर्म, 19 ई पवित्र आत्म्याआ सामर्थ्यावाही माआजे त्यापोरत कोल्यु इहिंजा का आय यरुशलेमेमधून चारू आरी इलुरीकामा पर्यंत ख्रिस्ताच्या सुवर्तेची पुरो- पुरो घोषणा कोअयी 20 पोन माआ मोनाआ इच्छा ए होय का जीही- जीही ख्रीस्ताचे नाव नाहा गोये तिही पर्यंत सुवार्ता उनाजे एहलो न ओवो का बिहीरा बांधीत मेकल्या गुडापो को बानदेहे 21 पोन जेहलो लेखिलो होय तेहलूज ओवो, 'ज्या माहु पर्यंत त्याआ सुवार्ता पोताद्ल्यु नाहा ते पालिलो आना ज्याहा उनाअले नाहा ते समाज ' 22 याकोअता आय तुमाही आवता फासी- फासी अडथळा आवयू 23 पोन ओमे आव देशामेने माआ कार्याकोता फासी जागू रोली नाहा आना जाअखो वोराम माहु तुमाआ जागे आविलाआ उत्कंठा होय 24 याकोअता जेव्हा आय स्पेनला जाइताहा तुमाही आविलो जाइअलो काहाके का माहु आशा होय का माहु तीही आवता तुमाआ आरी भेट उवे आना जेव्हा तुमाआ होबती उवे माआ मोन पोईत आवे तेहालाम तुमु माहु किबी सेटे पर्यंत पोताडीन आपा 25 पोन ओमे ताहा आय पवित्र मांहाहा सेवाकोअता यरुशलेम ला जात होय 26 काहाके का आय मासेदोनिया आना अखयाच्या माहुंहु ओ हाजो वाटेम का यरुशलेमामे पवित्र माहुंमे गरिबांकाजे किबी मदतकोतु कोअत्लू 27 त्याहा हाजो ताहा वाटेम, परंतु ते त्याआं कर्जदार होय , काहाके का बिहिरिजाती केधी आध्यात्मिक गोठीमेहे गोवाद्या ओयताहा त्याहा पण उचित होय का शारीरिक गोठीमेहे त्याआ सेवा को 28 याकोअता आय ओ काम पुरो कोईत आना त्याहा ए आर्थिक मदत आपित तुमाही आविलो स्पेन ला जाइअलो 29 आना आय ओलखीतलु का जेव्हा आय तुमाही आवे तेहालाम ख्रिस्ताचे पुरो आशीर्वादा आरी आवे 30 ऐ पाहीही, आम्हा प्रभू येशू ख्रिस्ताच्या जागे पवित्र आत्माआ प्रेमाआ स्मरण आपित आय तुम्हामे विनंती कोअत्लू का माकोअता परमेश्वराही प्रार्थना कोईलामे माआ आरी आग्रहावाही रो 31 का आय यहुद्यांचे अविश्वासणाऱ्या आरी वासित रोही आना माआ जी सेवा जी यरुशलेमेसाठी होय पवित्र माहुंहु पोइलो 32 आना आय परमेश्वराआ इच्हावाहि तुमापोओ हाजो आविलो आराम पावेल 33 शांतीचा परमेश्वर तुमाआ आखासामने राहो आमेन.