22
ऐ पाही आना डाया पोंचावाला आय जो ओमे तुमुहू प्रत्युत्तर कोओहो तो उनाआ 2 ते ओ उनाईत का तो आम्हाआरी इब्री भाषाम गोगीत होयफासी पण ठावकू ओतगोल्यु गोये तेहालाम तिये कोल्यो , 3 आय ताहा यहुदी मांहु होय जे का लीकीयातील तार्स माय जन्मला परंतु आव नगरामेहे गमतीयेलाच्या गुडू जागे आविलो हिकाडूअत गोयुएने परमेश्वराकोअता एह्ली धुंद लागाडयी ओती तेहलूज तुमु आखे आज लागाडले होय 4 आय माहु आना बोयोआ बेनुहू बांधीत बंदीगृहामे टाकीत आव पंथाला इहिंजा त्रास आप्यू का त्याहा मोईला शिक्षाम पण आप्यी 5 आव गोठीपो मुख्य याजक आना आखे आबहू वर्ग पण साक्षी होय का तिये माय पाहीही नावापो चिठ्या घेऊन दिमिश्काम निहित जात ओतु का जीही होय त्याहा पण दंड आपिलाकोअता बांधीत यरुशलेम ला जाऊ 6 जाहा आय सालता- सालता दमिष्काजागे पोतीतगोयू तेहालाम एहलो उवे का बिहीरा प्रहराआ आसेपासे एकुजवा खारो प्रकाश जुगाम माआ चारू सेटे सोमक्यू 7 आना आय धारतीपो पोडीअलोअने ओ शब्द उनाअलु, "ओ शौला, ओ शौला, तू माहु काहा त्रास आपोहो? 8 आय उत्तर आपिलू, 'ओ प्रभू, तू कोडू होय ? तिये माहु कोल्यो , आय येशू नासरी होय ज्याहा तू छळतोस 9 माआ हेंगातीवाही प्रकाश ताहा पल्यो, परंतु जो माआरी गोगीत ओतु तिया शब्द उनाअलु नाहा' 10 तेहालाम आय कोइतलु , 'ओ प्रभू, आय नाहाकोत कोहू ? प्रभूऊ माहु कोल्यो , उठित दिमिष्कात जा, आना जे किबी ताहु कोइलाकोअता ठेरवीही गोये होय कोल्यो जाइअलो 11 जाहा तिया उजवाडामे तेजावही माहु किबी देखायो नाहा हेगातीही आथे तोईत तो दिमिष्कात आवयू 12 तेहालाम हनन्या नावाआ नियमशास्त्राआ नुसार सालनारू एक भक्त मांहु जे तीइही रोणारे आखे यहुदी माहुंमे नाव लौकिक ओतमाआ जागे आवयू 13 आना उभे रोत माहु कोल्यो का, ओ पाही शौला, इही पाला , त्याआ वेळेला माआ डोए उगाडीत गोये आना आय त्याहा पालील्यो 14 तेहालाम तिये कोल्यो आम्हा पूर्वजाआ परमेश्वराने माहु याकोअता ठेरवीही होय का तू तिया इच्छेहा जाणू सेकेहे आना तियाअ धोर्मी माआहा पलणारू आना त्याआ सोबिवांही गोठी उनाआ 15 काहाके का तू त्याआ त्यापोरोत आखे माआहाहुमोर तियाअ गोठीई साक्ष होय ज्या तू पाल्या आना उनाइतल्या होय 16 ओमे काहा वेल लागाडीत? उठ , बाप्तिस्मे ले , आना त्याआ नाव घेऊन आपाआ स्वतःहा तोवीत टाक 17 जाहा आय फासी यरुशलेमो आविलो मंदिरोम प्रार्थना कोईत होतुताहा बेशुद्ध ओतगोल्यु गोल्यो 18 आना तिये पालील्यो का तो माहु कोतलू, वेगु कोईत यरुशलेम माय वेगु निहित जा काहाके का ते माआ विषया माय ताआ साक्ष नाहा मानणारु 19 आय ते कोल्यो , 'ओ प्रभू, ते ताहा आपा ओलखीत का आय तापो विश्वास कोआनाराहा बंदिकोओमे टाकोहो आना हरएक प्रार्थनेसभेत देयअलो कोईत ओतू 20 जाहा ताआ साक्ष स्तेफनचे रक्त वोहाडये जाअये ओते तेहालाम आय पण तीइही उबु ओतु आना याआ गोठीमेहे सहमत ओतु आना आय त्याआ घात कोअनाराआ आगडे सामालीत ओतु 21 आना तिये माहु कोल्यो , निहित जा काहाके का आय ताहु बिहरे जाती त्याही सेटे मेकलीही 22 ते आव गोठी पर्यंत त्याआ उनाईत रोल्या तेहालाम उचो शब्दामे आयडीअलो, एहलो मांहाआ अंत कोअत्याआ जीवित रोहिलो उचित नाहा 23 जाहा ते आयडीतल्ले आना आगडे फेकीलाआ आना जुगोमेरयो धूळ उड्डीन ओते 24 ताहा पलटण च्या सरदाराआ कोल्यो , याहा गढी माय घेऊन जा आना चाबूक माईत पारख का आय ओलखीतलु का माहे कोडला कारनोवाही त्याआ विरोद्धामे एहलो आअडित ओते 25 जाहा तिये त्याहा कवडकोअनारो बानदल्यो तेहालाम पौलाने तियाअ सुबेदार जो जागे उबु ओतु कोल्यो , नाहाकोत ओ उचित होय का तुमु एक रोमी मांहाहा आना तो पण बिना दोषी ठेरवीही, चाबूक माअये ? 26 सुबेदाराआ ओ उनाईत पोलटीला सरदाराआ जागे आविलो कोल्यो , तू ओ नाहाकोत कोअत्लू? ओ ताहा रोमी मांहु होय 27 तेहालाम पोलटीअला सरदाराआ त्याजागे आविलो कोल्यो , “माहु कोअलो, नाहाकोत तू रोमी होय ? तिये कोल्यो , होय ” 28 ओ उनाईत पोलटीअला सरदाराआ कोल्यो , आय रोमो ओनारो जागा जाखो रुपये आपित मिलन्ये होय पौलाने कोल्यो , “आय ताहा जन्मापोरोत रोमी होय ” 29 तेहालाम जे माहे त्याहा पारखीलापो ओते ते त्याआ जागेरोत सेटे होतगोयो गोये आना पलटणचा सरदार पण ओ जाईत का ओ रोमी होय आना आय त्याहा बानदल्यो होय , कोईत घाबरील्यो गोल्यो 30 बिहरा तेदीही तिये ठीक- ठीक जायअला इच्हावाहि का यहुदी त्यापोरोत काहा दोष लागाड, त्याआं बंधन उगाडीत आपिलू आना प्रधान याजक आना आखे महासभाम एकठे होऊला आज्ञा आप्यी आना पौलाहा निसे घेऊन जात त्याआ आगाडी उभे कोईत आपिलू.