8
ती दीहुच यरूशलेमेहे ऐ मोंड्ली पोओ वोडो दोमिलाआ सुरवात उवी आना प्रेरीताहा सोडीत आखो ने आखो यहूदीया आना सामरिया देसोमेहे वेरा सेर ओत गोये 2 किबी भाक्तीकोओता स्तेफनाआ कब्रेमेहे मेक्ल्ये आना त्यांकोअता वोडो शोक कोल्योओ 3 शौलाआ मोडलील हैरान कोईत आपिलू ओते , आना कोको जात माहाआ आना बोअयीही तोईत जेलूम टोकीत ओतु 4 जे साका अलग उवे ओते ते सुवार्ता प्रचार कोल्यो फिरीत ओतु 5 आना फिलीप्प शोमरोनीई नगरामे जात मांहुंमे ख्रिस्ताआ प्रचार कोहू लाग्यू 6 जी गोठी फिलीप्प कोल्यी त्याहा माहुंहु उनाईत आना जे चिन्ह तो हिकाडीत ओतु त्याहा पालीत एकमतोवाही मोन लागाडले 7 काहाके झाअकामरोत अशुद्ध आत्माआ वोडा शब्दावाही आयडीत निहित गोल्यो आना खूप जोओ लाखवाउवल्यू आना लुले एहलाहा पण हाजो कोल्यु जात ओते 8 आना तियाअ नगरामे वोडू आनंद पोयो 9 त्याआ पहीले तियाअ नगरामे शिमोन नावाआ एक मांहु ओतु तो जादू कोईत शामरोनी माहुंहु चक्क कोईत आना आपाआ स्वतःहा एक वोडू माहु कोल्यो ओतु 10 हानापोरोत ताहा मोदापोरोत तिया सन्मान कोईत ओते , ओ मांहु देवाची महाशक्ती होय जो महान कोतलू 11 तिये खूप दिहीआ त्याहा आपाआ तियाअ जादूउ कामोम थक्क कोईत मेक्ल्ये ओते यकोअता ते त्याआ जास्तीज मोनामे ओते 12 पण जेव्हा तिये फिलीप्पाआ विश्वास कोल्योओ जो देवोओ राज्य आना येशूउ नावाआ सुवार्ता कोल्यो ओतु ताहा माहे किबी माहु, किबी बोई बाप्तिस्मे लेऊ आवे , 13 तेहालाम शिमोन लेतजा स्वतः पण विश्वास कोल्योओ आना बाप्तिस्मे घेऊन फिलीप्प आरी रोंहु लाग्यू ते चिन्ह आना वोडो -वोडो सामर्थ्याचे काम उवनारा पालीत थक्क पोयो 14 जेव्हा प्रेषित जो यरुशलेम ओतु उनाअयो का शोमरोन देवोओ वचन होमजीत लेधलो होय ताहा पेत्र आना योहानाआ त्याआ जागे मोक्ल्यीत 15 तिये जात त्यांकोअता प्रार्थना कोअयी का पवित्र आत्माआ मिळूहुजोवे 16 काहाके तो ओमेजा त्यामेरोत कोदापो उतरीलो घेता तिये ताहा फक्त प्रभू येशूउ नावामेहे बाप्तिस्मे लेदो ओतु 17 तेहालाम तिये त्याआपो आथे मेकअलू ओतु आना तिये पवित्र आत्माआ मिलव्यू 18 जेव्हा शिमोन लेतजा पाल्लये का प्रेषिताआ आरी रोविलाआ पवित्र आत्माआ आप्यू जात्लू ताहा त्याजागे पोशा लेतआवीत कोल्यो 19 ओ अधिकार माहु पण दया का ज्यापो आथे मेकीत त्याहा पवित्र आत्माआ जोडीत 20 पेत्राई त्याहा कोल्यो , तांआ पोशा तोअआरी नाश ओवो, काहाके तू देवोओ दान पैस्यांनी वेसातो लेअले फूस कोल्योओ होय 21 आव गोठीमेहे नाहा ताआ वाटा होय नाहा भाग काहाके तांआ मोन परमेश्वराआगाडी हीदू नाहा 22 याकोता आपाआ आव खाराबकोअता मोन फेरवित प्रभूहु प्रार्थना को अवश्य होय ताआ मनांआ फूस क्षमा कोल्यु जानारू 23 काहाके आय पालत्लू का तू पित्तसारखे कोड्वो आना अधर्माआ बंधनात पोड्ल्ये होय 24 शिमोन लेतजा उत्तर आपिलू तुमु माकोअता प्रभू येशुहू प्रार्थना को का ज्या गोठी तुमु कोल्यो त्यामोरोत किबी मापो नाहा आविलो पोडी 25 यास्तव ते साक्ष आपित आना प्रभूऊ वचन उनाईत यरुशलेमो निहित गोयेएने शमरोअत जास्तीज गावामेहे सुवार्ता प्रचार कोल्यो गोये 26 फासाड़ी प्रभूआ एक स्वर्ग्दूतोवाही फिलीप्प ला कोल्यो , उठ , आना दक्षिणेकडे जा जे यरुशलेमा गज्जाकडे जात्लू ओ रेगीस्तानी मार्ग होय 27 तो उठित निघाल्यू आना पाल्लये, कुश देशाआ एक मांहु आवीत ओतु जो षंढ आना कुश ची राणी कंदचे हिया अधिकारी आना भंडारी ओतु जो आराधना कोइलाकोअता यरुशलेमेत आवयू ओतु 28 तो आपाआ रथावर बोहू ओतु आना यशया संदेष्टाआ पुस्तक वाचेहे आवीत ओतु 29 तेहालाम आत्मावाही फिलीप्पाआ कोल्यो , जागे जात आव रथाआरी जा 30 फिलीप्प त्यांही गुगदिलो आना त्याहा यशया संदेष्टाआ पुस्तक वासात्लूताहा उनाअयो , आना फ़ुस्ल्याआ तू जे वाचेहे होय सोमजाहेका ते मोलुम होय ? 31 इतो कोल्यो , जोपोरोत कोडु माहु होमाजाडीत नाहा तोपोरोत माहु केहलो होमजोणारो आना तिये फिलीप्पाआ विंनती कोअयी का तो त्याजागे सोडवीत जात बोहजी 32 पवित्र शास्त्रात तो जे वाचेहे ओतु ते ओ होय का तो मेढराहोस माईलाकोता मोकल्यु गोल्यो आना जेहलो कोकरू आपाआ तियाअ कातरीला आगाडी ठावकु ओते, तेहलूज ते पण आपाआ सोब उगड्यो नाहा 33 त्याआ लीन अवस्थाम त्याहा न्याय मिल्यू नाहा तियाअ टायमोमें महुअ वर्णन कोडू कोअनारू ? काहाके धोरतीपो तिया जीव विशिलो जात्लू 34 यापोरोत षंढाने फिलीप्पाआ फ़ुस्ल्याआ, आय ताहु विनंती कोअत्लू आव गोठीई संदेष्टा ओ कोढाकोअता कोतलू, आपाआ किंवा बिहीरा विषयी? 35 तेह्लाम फिलीप्पाआ आपाआ सोब उगड्यो आना आव शास्त्रामेहे आरंभ कोईत त्याआ यीशु प्रचार होमलावल्यो 36 ताहा वाटे जातले तेहलामेहे ते पायो जाग्ये आवे ताहा षंढ कोयो पाल ओ पाई होय माहू बाप्तीस्मा की हरकत नाहा . 37 फिलीप्प कोयो जार तू पूरा मोनो वाही विश्वास कोअतु ते लेत सके है ''. तो उत्तर आप्यु आय विश्वास कोहो यीशु मसीह परमेस्वर पुत्र होय". 38 तेह्लाम तिये रथ उभे कोअला आज्ञा कोअयी आना फिलीप्प आना षंढ बेन पाअयोम उतरीलो आना तिये षंढला बाप्तिस्मे आप्यू 39 जाहा ते पाअयोपोरोत निहित उसे आव्ये तेहालाम प्रभूआ आत्माआ लेतजा फिलीप्पाआ विसित लेधलो आना षंढाने त्याहा फासी नाहा पाल्लये, आना तो आनंद कोईत आपाआ सोडकोपो निहित गोये 40 फिलीप्प गावून अजोत आविलो गोल्यो आना जोपोरोत कैसरीयांहा नाहा फ़ुस्ल्याआ, तोपोरोत नगरा नगरामे सुवार्ता प्रचार कोहू लाग्यू.