युहानो 18

यीशु ते गोठ्यु कोईत आपाआ चेले आरी किद्रोंन खाडीई पार गोये तीही एक मोलू ओतु त्यामे ओ तो आना त्याआ चेले गोये 2 त्याहा तोईत आपणारो यहूदा पण ती जागू मोलुम ओती, काहाके येशू आपाआ शिष्यांवाही आरी तीइही जात ओतु 3 जाहा यहूदा, शिपायाआ एक पलटण ला आना मुख्य याजक परुसी त्यापोरोत लोगीही घेऊन, फणस आना मशाली आना मअनारे लेत तीइही आव्ये 4 तेहालाम येशू, तिया आखे गोठीकोता जी त्याआपो आविलो ओती होमजीत, निघाल्यू आना त्याहा कोल्यो , "कोडाआ होदित होय ?'' 5 तिये त्याहा उत्तर आपिलू, "येशू नासरेथला'' येशू त्याहा कोल्यो , "आय होय '' त्याहा तोईत आपणारो यहूदा पण त्याआ आरी उबु ओतु 6 तो एहलो कोतेहे, "आय होय ,'' तो फासाडी होरकावीत धरतीपो पोडीत गोये 7 तेहालाम त्याआ फासी त्याहा फ़ुस्ल्याआ, "तुमु कोडाआ होदित होय '' ते कोल्यो , "येशू नासरेथला'' 8 येशुनी उत्तर आपिलू, "आय ताहा तुम्हामे आखीत आपिलू का आयुच होय , जर माहु होदित होय ताहा याहा जाऊ दया'' 9 ओ याकोअता उवे का ते वचन पुरो ओवो जे तिये कोल्यो ओते : ज्याहा तुयें माहु आपिलू त्यामेरोत मिती एकाहभी नाहा आरवात्गोल्यो'' 10 तेहालाम शिमोन पेत्राई तलवार , जी त्याआ जागे ओती, आपक्यी आना प्रमुख याजकाआ दासोपो लाडीत तिया हुडू कान वाडीत टाक्यू तियाअ पावरोअ नाव मल्ख ओते 11 तेहालाम येशू पेत्राहा कोल्यो , "आपाआ तलवार म्यानोम मेका जो पिदो पितकोइत माहु आप्यू होय , नाहाकोत आय त्याहा नाहा पीईअलो?'' 12 तेहालाम शिपाई आना सरदार आना यहुदियाआ पलटणती येशुहू तोईत बांधीत लेधलो, 13 आना पहीले त्याहा हन्नाही लेत गोये , काहाके तियाअ तो वोऱ्ही प्रमुख याजक कयफाआ होवरुहुहू ओतु 14 ओ तोज कयफा ओतु, जिये यहुदियाहा मसलत आप्यी ओती का आम्हा माआहुकोअता उनाआ एद्म्याहा मरण हाजू होय 15 शिमोन पेत्र आना एक बिहरु शिष्य पण येशूउ फासाडी गोये ओ शिष्य प्रमुख याजकाआ ओलखीइ ओतु, याकोअता तो येशू आरी प्रमुख याजकाआ वाडामे गोल्यो, 16 पोन पेत्र बारथे बाअणाम उबु रोला तेहालाम तो बिहरु शिष्य जो प्रमुख याजकाआ ओलखीइ ओतु, बारथे निघाल्यू आना द्वारपालिकेला कोत पेत्राहा ओमे माय लेत आवयू 17 तिया दासीने जी द्वारपालीका ओती, पेत्राहा तेकोहे , "नाहाकोत तू पण आव माहाहा चेलामरोत ताहा नाहा ने ? तो कोल्यो , "आय नाहा होय '' 18 दास आना पलटण हेलावांहि कोल्ये पेटाडीत उभे शेक लेत ओते , आना पेत्रस पण त्याआ आरी उबु शेक लेत ओतु 19 तेहालाम प्रमुख याजकाने येशुहू त्याआ चेलाओ विषयी आना त्याआ शिक्षण विषयी फूस नुस कोअयी 20 येशुनी त्याहा उत्तर आपिलू, "आय जगोआगाडी उघडी गोठी कोअयी; मिती सभास्थानात आना मंदिरोम जीही आखे यहूदी एकठे उवनारा ओते नेहमी शिक्षण कोईत आना एखलाम किबी नाहा कोल्यो 21 तू माहु काहा फुसीत होय ? उनानाराहा फूस का आय त्याहा नाहाकोत कोल्यो पाला , त्याहा मोलुम होय का मिती नाहाकोत- नाहाकोत कोल्यो 22 तिये जेव्हा ओ कोल्यो , ताहा शिपाई यामरोत एकाने जो जागे उबु ओतु, येशुहू थापाडे माईत कोल्यो , "नाहाकोत तू प्रमुख याजकाहा एहलो प्रकारे उत्तर आपोहो?'' 23 येशुनी त्याहा उत्तर आपिलू, "जर आय वाईट गोगल्यू, ताहा तियाअ वाइटाआ साक्ष आप ; पण जर हाजो कोल्योओ, ताहा माहु काहा देत होय ?'' 24 हन्नानी त्याहा बाधाल्युज कयफा प्रमुख याजकाआरी मोकलित आपिलू 25 शिमोन पेत्रस उभे रोत शेक लेत ओते तेहालाम तिये त्याहा कोल्यो , "नाहाकोत तू पण तियाअ चेलामरोत ताहा नाहा?'' तो नाकारीत कोल्यो , "आय नाहा होय '' 26 प्रमुख याजकाआ पावरोमरोत एक, जो त्याआ परिवार मायारोत ओतु ज्याचा कान पेत्राई वाडीत टाक्ये ओते कोल्यो , "नाहाकोत आय ताहु त्याआ आरी मोलाम नाहा पाल्लये?'' 27 पेत्रस नि फासी नकार कोल्योओ, आना लागेज कुकडू आअडयु 28 तेहालाम ते येशुहू कयफा जागेरोत कचेरीम घेऊन गोये , आना वेगीई ची वेल ओती पण ते कचेरीआरी नाहा गोये काहाके अशुद्ध उवे कोईत पण व्हालांडनाआ खानारू कोहू सेकेहे 29 तेहालाम पिलात त्याआ जागे बारथे निहित आवयू आना कोल्यो , "तुमु आव मांहुंपो कोडला गोठीई आरोप लागाडीत होय ?'' 30 तिये त्याहा उत्तर आपिलू, "जर तो दुष्कर्मी नाहा ओतलू ताहा आमुहू त्याहा ताआ आथोमेहे नाहा होपित कोल्यु ओते'' 31 पिलात त्याहा कोल्यो , "तुमुज याहा घेऊन जात आपाआ रीतीनुसार तिया न्याय ठरवील्यु'' यहूदी त्याहा कोल्यो , "आमुहू अधिकार नाहा का कोडाआ जीव लेही '' 32 ऐ याकोअता उवे का येशुऊ ती गोठी पुरो ओवो का जी त्याहा ओ संकेत आपिलावेले कोल्यी ओती का तिया जीव केहलु जानारू 33 तेह्लाम पिलात फासी कचरीही गोल्यो, आना येशुहू हादीत त्याहा फ़ुस्ल्याआ, "काहाके यहुदीयाआ राजा होय ?'' 34 येशुनी उत्तर आपिलू, "नाहाकोत तू ए गोठी आपाआ त्यापोरोत कोल्यो होय का बिहीरावाही माआ विषयी ताहु ओ कोल्यो होय ?'' 35 पिलाताही उत्तर आपिलू, "नाहाकोत आय यहूदा होय ? ताआज जातीवाही आना मुख्य याजकावाही माहु ताहु झाझ्या आथे होपित कोल्यु होय , तुयें नाहाकोत कोल्यु होय ?'' 36 येशुनी उत्तर आपिलू, माआ राज्य आव जगोआ नाहा; जर वोडू देश आव जगाआ ओतु, ताहा माआ शिपायाआ लोढाई कोअते का आय यहुदियाहा आथे होपित नसते पोयो; पण माआ देश इही नाहा'' 37 पिलात त्याहा कोल्यो , "ताहा नाहाकोत तू राजा होय ?'' येशुनी उत्तर आपिलू, "तू कोतलू का आय राजा होय आय आव होआता जोल्मो लेदो आना याकोअता जगात आवयू होय का वाटेए साक्ष आपुहू जो कोडु खराआ होय तो माआ शब्द उनात्लू'' 38 पिलात त्याहा कोल्यो , "खोरो नाहाकोत होय ?'' ओ कोत तो फासी यहुदियाही निहित गोल्यो आना त्याहा कोल्यो , आय ताहा त्यापोरोत केधी दोष नाहा लेत 39 पोन तुमाआ ए रीतीरिवाज होय का आय वल्हांडनमे आय तुम्हाकोअता एक माअहुहू सोडीत आपोहो आखरी: नाहाकोत तुम्हामे मोलुम होय का आय तुम्हाकोअता यहुदियाचा राजाहा सोडीत आपुहू?'' 40 तेहालाम तिये फासी आयडीत कोल्यो , "याहा नाहा, पण आमच्यासाठी बरब्बाहा सोडीत आपा '' आना बरब्बा बाड ओतु.