15
आमुच खोरू द्राक्षा आ वेलु होय आना माआ आबुहू किसान होय 2 जी लोग मामेहे होय आना फोल आपित नाहा तीही तो वाडीत टाकोहो आना जी लोग फोल आपोहो तियाअ लोगिई तो सिंजेकातरीले कोअत्लू 3 तुमु ताहा तिया वचनावांही जे आय तुम्हामे कोल्यो ओमे तुमु शुद्ध होय 4 तुमु मामेह बोणीत रो आना आय तुम्हामे रोही जेहलो लोग जर वेलुमे नेशेय ताहा स्वतः ती फोले आपुहू शकत नाहा तेहलूज तुमुभी मामेहे रोही नाहा ताहा फोल आपुहू शकत नाहा 5 आय द्रक्षाआवेल होय , तुमु लोगी होय जो मामेहे रोतलू आना आय त्यामे तो खुपुच फोल आपोहो काहाके मामेरोत अलग ओतगोल्यु किबी कोहू शकत नाहा 6 जर कोडु मामेहे रोही नाहा ताहा तो लोगीहीहोस टाकी आपिला आवत्लू आना उणवीत जात्लू आना मांहे त्याहा एखटो कोईत आगीम टाकीत जातेहे आना ते पेटाडीत जातेहे 7 जर तुमु मामेहे रोही आना माआ वचन तुम्हामे रोही ताहा जे जोवे ते मांगा आना ते तुम्हामे मिलीलो 8 माआ बाहाआ गौरव तीयेज ओते का तुमु जाखो फोल घेऊन आवे; तोयोज तुमु माआ शिष्य ठराविलो 9 जेहलो आबहे मापो प्रेम कोल्यु तेहलूज आय तुमापो प्रेम कोल्यु होय ; माआ प्रेमाम बोणीत रो 10 जर तुमु माआ आज्ञाहां मानणारु ताहा माआ प्रेमाम बोणीत रोही ; जेहलो आय आपाआ आबहाआ आज्ञाहां मान्ये होय आना त्याआ प्रेमाम बोणीत रोतलू 11 आय याआ गोठी तुम्हामे याकोअता कोल्या होय का माआ आनंद तुम्हामे बोणीत रोही आना तुमाआ आनंद पुरो उवे 12 माआ आज्ञा ए होय का जेहलो आय तुमापो प्रेम कोअयो होय तेहलूज तुमुभी एक बिहीरापो प्रेम को 13 यांपोरोत वोडू प्रेम कोडाआ नाहा का कोडु आपाआ दोस्तांकोअता आपाआ जीव आपित आपी 14 जी आज्ञा आय तुम्हामे आपोहो जर तुमु मानणारु ताहा तुमु माआ हेगांति होय 15 ओमोरोत आय तुम्हामे पावर कोअही नाहा काहाके पावरोहो मोलुम कायनाओतो का तिया मालक नाहाकोत कोअत्लू; आय तुम्हामे हेगांति कोल्यो होय काहाके ज्या गोठी आपाआ आबापोरोत उनाइतल्या आखे तिया तुम्हामे कोत आप्या 16 तुमु माहु निवडील्ये नाहा ताहा आय तुमु निवडील्ये होयेआने ठेरव्यो का तुमु जात फोल घेऊन आव आना तुमाआ फोल टीकित रोंहु जोवे का तुमु माआ नावामेहे जे किबी माआ आबापोरोत मागहू तो तुम्हामे आपे 17 आव गोठीइ आज्ञा आय तुम्हामे यकोअता आपोहो का तुमु एकाबिहीरावे प्रेम कोईओलो 18 जर जग तुमाआ द्वेष कोअत्लू ताहा तुम्हामे मोलुम होय का तुमाआ आगाडी माआरी पण द्वेष कोल्योओ 19 जर तुमु जगोआ रोल्या ओते ताहा जग आपापो प्रेम कोल्यु ओते पण यामुळे का तुमु जगोआ नाहा पण आय तुम्हामे जगोमरोत निवडील्ये होय त्यापोत जग तुमाआ द्वेष कोअते 20 जी गोठी आय तुम्हामे कोल्यी ओती पावर आपाआ मालापोरोत वोडू नाहा याहा ओर मेका जर तिये माआ शळ कोल्योओ ताहा तुमाआ पण द्वेष कोअनारू ; जर तिये माआ गोठी मान्या ताहा तुमाआ पण मानणारु 21 पोन ऐ आखे किबी माआ नावोवाही तुम्हाआरी कोअनारू काहाके ते माहु मोकलीनाराहा ओळखीतल्यो नाहा 22 जर आय आवयू नाहा आना तुमाआ आरी बोलतुल्यो नसते ताहा ते पापी ठेरव्यो कायनाओतो; पण ओमे त्याआ कोड्लाज निमतीवाही पापोकोअता नाहा 23 जो माआरी द्वेष कोअत्लू तो माआ आबाआरी पण दुश्मोनी ओलखिणारा 24 जर आय त्यामे ते काम कोल्यु कायनाओतो जे कोडु कोल्यु नाहा ताहा ते पापी ठरव्येहे कायनाओतो; पण ओमे तिये माहु आना माआ आबहाहा बेनुहू पालील्यो आना बेनुआरी द्वेष कोल्योओ 25 ओ यकोअता उवे का ते वचन पुरो उवूंहू जोवे जे त्याआ पवित्र शास्त्रात लेखिलो होय त्याआ माआरी बिनकामो द्वेष कोल्योओ 26 पोन जाहा अतो मदतकोअनारू आविलो ज्याहा आय तुमापोओ आबापोरोत मोकलीही म्हणजे खराआ आत्माआ जो परमेश्वारापोरोत आवत्लू ताहा तो माआ साक्ष होय 27 आना तुमु पोन माआ साक्ष होय काहाके तुमु पेलेरोत माआरी रोल्या होय.