13
वल्हाडण तीवारोओ पेल्लू एहलो उव्यो का यीशु ई दुनिया मेहेरोत ओमे आबहाआ जाआलोआ आपाआ वेल आवित गोइही का ओ जोग सोडित आबहाआ इही जाहो ते माआ माहे ऐ जे जगामे ओ जेहलो प्रेम मेलतू ओतु शेवटी जाआ ऐहलोच प्रेम मेलतू रोयु 2 हाजेपोर्यो रोटू कोईत ओते सैतान ओमेजा शिमोन इस्कोर्योत चा पोऱ्या यहुदा याआ मोनामे टाक्ये ओते का येशुहू धोक्यात घेऊन तोईत आपल्यु 3 येशु ओ ओळखीतल्यो ओतु का माआ आबहे आखे किबी त्याआ आथे होफहोपिन आपिलू होय आना तो परमेश्वरपोरत आवयू होय आना पर्मेश्वराअरी फासी जात होय 4 त्याकोता रोटू सोडीत उबु रोला तिये आपाआ बारथे आंगडे काढ्ये आना एक रुमाल आपाआ कोमरेहे बांध्यू 5 फासाड़ी उनाआ गंगाळाम पाई ओतीत आपाआ शिष्यांआ गुडू तुवूहू लाग्यू आना तियाअ कमरुहू बांधीत मेकल्या रुमालावांही नुसहू लाग्यू 6 फासाड़ी जाहा तो शिमोन पेत्राआ जागे गोल्यो तेहालाम पेत्राई कोल्यो , प्रभू नाहाकोत तू माआ गुडू तुवीत होय 7 उत्तर आपित येशु कोल्यो , ओमे ताहु मोलुम नाहा का आय नाहाकोत कोईत होय , फासाड़ी ताहु मोलुम उवे 8 पेत्राई त्याहा कोल्यो , 'तू माआ गुडू केधीज तुव्ही नाहा, येशु लेतजा उत्तर आपिलू, जर आय तुव्ही नाहा ताहा ताहु माआहने जागू मिले नाहा 9 शिमोन पेत्राई त्याहा कोल्यो, 'प्रभू फक्त माआ गुडूच नाहा ताहा माआ आथे आना माआ मुंडको पण तोवीत आप ' 10 येशूने त्याहा कोल्यो , जीआ उगालीलो कोअयी होय त्याहा आपाआ गुडाआ व्यतिरिक्त किबी तुविला आवश्यकता नाहा ताहा तो पुरो शुद्ध ओतू तुमु माहे शुद्ध होय पण आखेज नाहा 11 येशु त्याहा ओळखीतल्यो ओतु जो त्याहा धोक्यात तोईततापे ओतु त्याकोता तिये कोल्यो ओते , तुमु आखे शुद्ध नाहा", 12 फासाड़ी जाहा त्याआं गुडू तुण्यो गोये तेहालाम तिये आपाआ बारथे आंगडे फासी कालीत लेधलो आना आपाआ जाग्तली फासी आविलो बोहू नाहाकोत तुमु ओळखीतल्यो होय का आय तुम्हाकोअता नाहाकोत कोल्यु? 13 तुमु माहु गुरु आना प्रभू कोतेहे आना तुमु योग्य होय काहाके आय तो होय 14 त्याकोता जर आय प्रभू आना गुरु ओमेत तुमाआ गुडू तुण्यो ताहा तुमु पण एकमेकाआ गुडू तुवूहुं हवे आय तुमाआगाडी आय एक उदाहरण आपिलू होय 15 काहाके आय तुमुह नमूनों देखाडीत देद्लू होय का जेहलो आय तुमाआ आरी कोल्यो होय तुमु बी तेहलोज कोअते रोआ . 16 आय तुम्हामे खोरो कोतलू एक पावर आपाआ मालिकापेक्षा वोडू नाहा आना न संदेश आपणारो वोडू होय जीआ ताहु मोक्ल्यीत होय 17 जर तुमु याआ गोठी ओळखीतल्यो होय आना त्याहोस सालतेहे ताहा तुमु सुखी होय 18 आय तुम्हाआ आखाविषयी कोल्यो नाहा आय त्याहा ओलखीतलु ज्याहा आय निवडिले होय (आना ओ पण का यहुदा विश्वास घातकोअनारा होय ) परंतु आय त्याहा याकोअता निवडिले होय का शास्त्राआ वचन खोरो उवे आना जीआ माआ भाकर खादल्यी तो माविरुध पोयो 19 ओमे ए घटना घाडीलाआगाडी आय तुम्हामे याकोअता कोतलू का तो आय होय 20 आय तुम्हामे खोरीज कोतलू का जो कोडु माहु मोकलील्यांहा ग्रहण कोअत्लू तो माहु ग्रहण कोअत्लू आना जो माहु ग्रहण कोअत्लू तो त्याहा ग्रहण कोअत्लू जीआ माहु मोक्ल्यीत होय 21 ऐ कोल्याफासाडी येशु आत्म्यात कासावीस पोयो आना साक्षी आप्यी आय तुम्हामे खोरो कोतलू, तुमामेहेरोत एक एहेलू होय का तो माहु धोका आपित तोईततापे 22 तेहालाम त्याआ शिष्य एक बिहराहा देखाडहु लागाडीत त्याहा निच्शीत उवनारा नाहाआत्लू का तो कोढाकोअता गोगीत होय 23 तिया एक शिष्य त्याआ जागे बोहू ओतु त्याहा येशु जाखो प्रेम कोईत ओतु 24 तेहालाम शिमोन पेत्राई इशारु कोल्योओ का फुसा का तो कोडू ओवुहू शकतो ज्यावीरूढ येशु गोगीत ओतु 25 येशूउ गोमाणाऱ्या शिष्याने त्याहा सहज त्याआ सातीपो टूगुवोलीत त्याहा फ़ुस्ल्याआ, “ओ प्रभू तो कोडू होय ?” 26 येशु लेतजा उत्तर आपिलू, रोटाहा बोटकु वाटकामेहे बुडालीत ज्याहा आय आपी तोज होय फासाड़ी येशूने रोटाहा बोटकु वाटकामेहे बुडाळयु आना तो विसित शिमोन इस्कोर्योत चा पोऱ्या यहुदाहा आप्यू 27 ज्याहबी यहुदाने रोटाहा बोटकु लेदो तीयाम सैतानाने वास कोल्योओ फासाड़ी येशूने त्याहा कोल्यो , जे तू कोअला निघाल्यू होय ते वेगु को 28 पोन तिया जागापो खाअलाकाजे बहितरोल्यामे कोडोबी ओ होमजे नाहा येशूने ओ काहा कोल्यो 29 काहीही फूस कोल्योओ का पोशाआ खोत्ली रोत ओती त्याकोता येशु त्याहा कोल्यो होय का वल्हाडन तिवार याकोअता किबी आवश्यक साधन घेऊन आवे किंवा कोत ओतु का गोरब्योहो किबी आपित आपिलो त्याकोता यहुदाने रोटाहा बोटकु लेदो 30 रोटू कोईलानंतर तो तत्काळ निहित गोल्यो ए रातीई वेल ओतु 31 तो निहित गोयेनतर येशूने कोइतलु , “माअहा पोऱ्या ओमे गौरवात आवयू होय आना त्याआ त्यापोरत परमेश्वराआ गौरव पोयो होय ” 32 जर तियाद्वारे परमेश्वराआ गौरव पोयो होय ताहा परमेश्वर आपाआद्वारे त्याहा गौरव आपी आना त्याहा गौरव लग्गेज ए आपी 33 ओ माआ गोमाणाऱ्या पोरयां, आय ओमे थोडोज वेल तुम्हाआरी होय तुमु माहु होदहा आना जेहलो आय यहुदी अधिकाऱ्यांना कोल्यो ओते , तेहलूज तुमु तियाअ जागापो आवहू शकत नाहा तियाअ जागापो आय जात होय , तेहलूज तुम्हामे पण कोतलू 34 आय तुम्हामे नवो आज्ञा आपोहो का तुमु एकमेकाआरी प्रेम को जेहलो आय तुम्हामे प्रेम कोल्यु होय तेहलूज तुमुबीही एकमेकाआरी प्रेम को 35 जर तुमु एकमेकाआरी प्रेम कोअनारू तेहालाम हरएक जोओ ओलखीत लेही का तुमु माआ शिष्य होय 36 शिमोन पेत्राई त्याहा फ़ुस्ल्याआ, ओ प्रभू, तू कोठे जात होय ? येशूने त्याहा उत्तर आपिलू, "तू ओमे माफासाडी आवहू शकत नाहा परंतु फासाड़ी तू माफासाडी आविलो 37 पेत्राई त्याहा फ़ुस्ल्याआ, "ओ प्रभू, ओमे आय ताआ ताआफासाडी काहा आवहू शकत नाहा? आय ताहा ताकोअता माआ जीव पण आपित आपी 38 येशूने उत्तर आपिलू, “तू खुदाआ जीव आपी? आय ताहु खोरो कोतलू का जो पर्यंत तू माहु तीन टायमोआ नकार आपी नाहा तो पर्यंत कुकडू सोड्विनारू नाहा.”