12
ताहरुहू यीशु वल्हादनाहा पेल्लू सोव दीह बैथनीई मेहे आव्यू ओतु 2 तीइही तिये त्याआ याकोअता रोटू तीयार कोल्यु; आना मार्था सेवा कोईत ओती, आना लाजरस त्याआ मायारोत एक ओतु जो त्याआ याकोअता रोटू कोइला याकोअता बोहू ओतु 3 तेहालाम मरीयाई बाल मासिई आर्दू शेर कीमतीवालो हाजलावास तेल घेऊन येशूउ गुडापो टाक्ये, आना आपाआ सिज्यावाही त्याआ गुडाहा नुसल्यो; आना हजुबास तेलोवांही को हाजलावास होतगोयो गोये 4 पोन त्याआ चेलाप्रत यहूदा एस्कारीया नावाआ एक शिष्य जो त्याहा तोईत आपी ओतु, कोहू लाग्यू 5 ऐ हजुबास तेल तिनहोव रुपये माय वेसेत गोरब्योहो काहा आप्यू गोल्यो नाहा? 6 तिये ए गोठी याकोअता कोल्यी नाहा का चिंता ओती परंतु याकोअता तो बाड ओतु, आना, त्याआ जागे त्याआ खोतली रोत ओती आना तीयाम जे किबी टाक्ये जाहो ते काढीत लेत ओतु 7 येशूने कोल्यो'' त्याहा रोंहुद्या त्याहा माआ पुऱ्या जाला दिहोकोअता रोहू आपा 8 काहाके गरीब ताहा तुमाआ आरी कायम रोतलू परंतु आय तुमाआ आरी सर्वकाल रोही नाहा'' 9 जाहा यहुदियानाआ वोडी गोर्दी मोलुम उवे का तो तिही होय , ते नाहा केवळ येशूउ कारनोकोईत आव्ये परंतु याआ याकोअता का लाजराहा पालीही ज्याहा तिये मोअल्या त्यमेरोत' जीवतु कोल्यु ओते 10 तेहालाम प्रधान याजकावाही लाजरस ला देउलाकोअता याकोअता षड्यंत्र तीयार कोल्योओ 11 काहाके का त्याआ करणावाही जाअखो यहुधी निहित गोये आना येशू उपो विश्वास कोल्योओ 12 बिहीरा तेदीही जाअखो माहु जे पूर्वी आव्ये ओते ओ उनाअयो ओते का यरूशलेम माय आवीत होय 13 याकोअता तिये खजुराआ लोगी लेदिओलो आना त्याहा भेट आपिला याकोअता निकलीलू, आना ओरडाय ला लागाडीत , होसांन्ना धन्य इस्राईल चा राजा , जो इस्राईल च्या नावोवांहि आवीत होय '' 14 जाहा येशुहू गोदडीइ गोदडापिलू मिल्यू; ताहा तो त्याआ उपो बोहित गोल्यो; जेहलो लेखिलो होय , 15 ऐ सियोनाच्या पोऱ्यी, बित नाहा; पाला , ताआ राजा गोदडीइ शिंगरापो बोहीतरोल्यु आवीत होय '' 16 त्याआ शिष्य ए गोठी पहीले होमज्ये नाहा, परंतु जेव्हा येशूचे गौरव प्रगट उवे ताहा त्याहा ओर का ए गोठी तिया विषया माय लेखल्यी ओती आना माहु तिया आरी याज प्रकारचा व्यवहार कोल्योओ ओतु 17 तेहालाम गोर्दी च्या तियाअ माहु साक्ष आप्यी , जे तियाअ वेले त्याआ आरी ओते तिये लाजराहा कबरा मायारोत हादीत मोल्यामरोत मायारोत जिवंत कोल्यु 18 याज कारनोवाही माहु त्याहा भेट आपिलाकोअता आव्ये ओते काहाके तिये उनाअयो ओते का तिये आश्चर्य कर्म देखादये 19 तेहालाम परुश्यांहि आपसामेहे कोल्यो,'' फूस ताहा को का तुमाआ त्यापोरोत किबी नाहा उवहू सेकेहे पाला , जगत माहे त्याआ फासाडी चालते होय '' 20 जे माहे आगाळी उपासना कोइलाकोअता आव्ये ओते याहा मायारोत किबी हेल्लेनी ओते 21 तिये गालीलामेहे तियाअ बेथसदाआ रोणारे फिलीप्प जागे आवीत त्याआ जागे विनंती कोअयी,'' महाराज; आमुहू येशुहू भेट आपुहू पालोहा'' 22 फिलीप्प आवीत आंद्रियास ला कोल्यो, तोये आंद्रियास आना फिलीप्प लेतजा आवीत येशुहू कोल्यो 23 याआ वरून येशूने कोल्यो,'' ती वेल आवीत गोयी होय , का माहाहा पोऱ्याआ गौरव होय 24 आय तुम्हामे खोरो- खोरो कोतलू का जेव्हा पर्यत गोवोओ दाणु धरतीमे मेकीत मोईत नाहा जात तो एखल्यू रोतलू; परंतु जेव्हा मोईत जात्लू, तेहालाम जाअखो फोल आपोहो 25 जो आपाआ जीवोहो प्रिय मोनोहो, तो त्याहा अरवाईत आपोहो; आना जो आव जगुमे आपाआ जीवोहो नेगोमनारू होमजीत्लू तो सार्वकालिक जीवनाकोअता तिया होंबाला कोअही 26 केधी कोडु माआ सेवा कोअही, ताहा माआ फासाडी आव; आना जीही आय होय , तीही माआ पावर पण होय केधी कोडु माआ सेवा कोअही, तिया आबहु तिया आदर कोअही 27 ओमे माआ जीव कासावीस होय याआ याकोअता आय नाहाकोत कोलु?' ओ आबहा, माहु आव घटके पोरोत वासाड?'' नाहा, काहाके आय याज कारनोवाही आव घटके पर्यत पोचुज होय 28 ऐ आबहा, आपाआ नावोओ गौरव को'' तेहालाम ए जुग वाणी उवी ,'' आय त्याआ गौरव कोल्यु होय , आना फासाडीभी कोअही'' 29 तेहालाम माहे उभूरोत उनाईत ओते तिये कोल्यो का वादलो आअडेए बिहरा कोल्यो, कोडु एक स्वर्ग दूत बोलतुल्यो'' 30 याआ वरून येशूने कोल्यो, ओ शब्द माआ याकोअता नाहा परंतु तुमाआ याकोअता आवयू होय 31 ओमे आव जगाआ न्याय उवनारा होय , ओमे जुगाआ सरदारहा काढीत टाक्ये जाय; 32 आना आय केधी धरतीपोन उसकोल्यू जाइअलो, ताहा आखाहा मांही खेचीत लेही'' 33 आपु कोडला मोईलावाही मोअनारू ओ सुचविलाकोअता तो एहलो बोलतुल्यो 34 याआ वरून माहु त्याहा कोल्यो, आमुहू नियम शास्रामे ए गोठी उनाई होय का ख्रिस्त आखीवेल रोही, फासाड़ी तू नाहाकोत कोअत्लू का माहाहा पोऱ्याहा उसापो सोढविलो जाअलो गरजेए होय ! ओ माअहा पुत्र कोडू होय '' 35 येशूने त्याहा कोल्यो,'' प्रकाश ओमे थोडो टायमोआ पर्यंत तुम्हामे होय जो पर्यंत प्रकाश तुमाआ जागे होय तो पर्यंत साला निहित जाहू एहलो उवहू कायना का आंधार आवीत लेय ; जो आदाराम चालीलो तो नाहा होमाजाडीत का जात होय '' 36 जो पर्यंत प्रकाश तुमाआ आरी होय , उजवोडापो विश्वास को काहाके का तुमु उजवाडामे पोऱ्ये बोनल्यो'' ए गोठी कोत येशू निहित गोल्यो आना त्यापोरोत निकाईत रोला 37 तिये त्याआ आगाडी अहलो चिन्ह देखादये, तेबी तिये त्याआपो विश्वास कोल्योओ नाहा; 38 तेबी यशया भविष्यवक्ता त्याआ वचन पुरो उवे जे त्याआ लेखिलो ओते कोल्यो ओते '' ओ प्रभू आम्हा सुवार्तेए कोडु विश्वास कोल्योओ होय ? आना प्रभूआ भूज कोडापो प्रगट पोयो होय '' 39 याज कारनोवाही ते विश्वास कोहू सेकेले नाहा, काहाके यशयावाही ओ पण कोल्यो होय : 40 तिये त्याआं डोआं आंधली , आना त्याआं मोन कठीण कोईत आपिलू होय ; केधी एहलो नाहा उवे का ते डोआवाही पालीही, आना मोनोवाही होमजीत्ले, आना फिरहा, आना आय त्याहा हाजो कोअही'' 41 यशयावाही ए गोठी याकोअता कोल्यी का तिये त्याआ गौरव पालील्यो , आना तिये त्याआ विषया माय गोठी कोअल्यो 42 तेबी अधिकाऱ्याआ मायारोत जाअखो जानोतांहि त्याआपो विश्वास कोल्योओ, परंतु परुश्याआ कारनोवाही प्रगताट नाहा मानीत ओते , केधी एहलो न ओवो का ते उपासनाम काढीत टाक्ये जाय: 43 काहाके का महांआ ची पोरोत प्रशंसा वाहवा अपेक्षा जाखा प्रिय लागेहे 44 येशू जोरा कोल्यो ,'' जो मापो विश्वास कोअत्लू, तो मापो नहाते माआ मोकलीणारा उपो विश्वास कोअत्लू 45 आना जो माहु पालत्लू तो माहु मोकलीनाराहा पालत्लू 46 आय जगाआ प्रकाश बोणीत आवयू होय , काहाके का जो कोडु मापो विश्वास कोअत्लू तो आंदाराम रोहू कायना 47 केधी कोडु माआ गोठी उनाईत पण पालीत नाहा, ताहा आय त्याहा दोषी ठरावीत नाहा; काहाके आय जगाला दोषी ठेरविल्यो याकोअता नाहा ताहा, परंतु जगाआ उद्धार कोइलाकोअता आवयू होय 48 जो माहु तुच्छ मोनोहो आना माआ गोठी ग्रहण कोईत नाहा त्याहा दोषी ठेरविनारू ताहा एकुच होय : अर्थात जे वचन आय कोल्यो होय , तोच फासाडीई दिहोम त्याहा दोषी ठेरवीही 49 काहाके आय मापोरोत गोठी कोल्या नाहा का; परंतु आबहाही जीयाहा माहु मोकल्ये होय तीयेज माहु आज्ञा आप्यी होय का नाहाकोत -नाहाकोत कोहू आना नाहाकोत- नाहाकोत गोगू ? 50 पाच आना माहु मोलुम होय का त्याआ आज्ञा सार्वकालिक जीवोन होय याकोअता आय जे किबी गोगत्लू, ते जेहलो आबहाही माहु कोल्यो होय तेहलूज गोगत्लू''.