Ba-Yígúrə́-Jə-Tiu dùə̀ súú Yɩɩ joŋwana tə nii nə
2
1 Sɩ́ʋ́n nə, à dàń dwì súú kʋ tə á mʋ̀ Yɩɩ joŋwana tə nii nə, à wʋ́: 2 «Də á nə ba cʋga, á nə ba dun à yɩrɩ tə nə pɩn, də á waa mama, à wá pa zɩra ja aba. À wá yàlà á jɩjə wiən tə. Cɩ́gá, à pɩn nii sə á jɩjə wiən tə yàlà, á nə ba dun à yɩrɩ tə nə pɩn, də á waa mama yɩrɩ. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! 3 Nə̀ń à nə, à càgà á dwíí tə nii nə, sə à cʋ̀gʋ̀ kʋ. À wá mɩ́n bàń á yáá wa, tə nə yɩ vàná tə, á nə ma fwa jwəŋə á cànɩ̀ tə máŋá wa bàń, yá ba wá ja aba ba kɛ̀ń, də á yɩra bàń tə mɛ. 4 Á dàń wá lwarɩ də à dùə̀ súú á nii nə, sə kʋ pa à nimarʋ tə, à nə tún də Levi dwíí tə ya lá wuuu. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ. 5 À nimarʋ tə yɩn də ba, kʋ yɩn mɩɩ də sìə́ nimarʋ. À pɩn mɩɩ də sìə́ Levi dwíí tə nə, sə ba ma dəri à fən, yá ba dàń dəri à fən, ba ga vɩvaga à yɩrɩ tə yáá con. 6 Yɩɩ nii yìə̀n* tə nə yɩ cɩ́gá yà nə naŋa ba nii wa, kʋ̀nkʋ̀n yoo mama wà ba nii wa nan. Ba twá à nə də sìə́ də pùə́ nədʋ, yá ba pɩn lɩ̀à kapʋpʋ yá yolwan fwaŋʋ nə. 7 Cɩ́gá, yənu sʋ̀ràn wulə Yɩɩ joŋwanʋ nii wa, yá ʋ mʋ̀ nə ba mɛ sə ba bwe, ba ma lwarɩ Yɩɩ nii yìə̀n tə. Cɩ́gá, ʋ yɩ Ba-Yígúrə́-Jə-Tiu, ʋ nə yɩ kwatara Yɩɩ tʋntʋnʋ. 8 Yá á mʋ̀ yori, á dʋgʋ cwəŋə. Á kàrà tə pɩn lɩ̀à kapʋpʋ mà ba nɛɛ. Á cʋ̀gʋ̀ nimarʋ tə yà nə wulə à də Levi dwíí tə pwə́rə́ wa. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! 9 Yá à mʋ̀ wá pa ba fʋfʋlɩ aba, ba ga mun aba lalʋʋ tə mama yáá con, á nə ba à coŋi tə nə twá, á ga jələ lɩ̀à, á doni ba duən, à bʋra wa yɩrɩ.»Yìə̀n bələ, tə nə cʋ̀gà Yɩɩ nimarʋ tə
10 Nə mama tà nyɩna nədʋ nə nə jə naaa? Kʋ tà Yɩɩ nədʋ tə nə fwa nəba naaa? Bɛ̀ɛ̀ dàń nə pɩn nə ma gɩgarɩ duən, nə ma cʋ̀gà nimarʋ tə nə wulə nə nɩbara-ba, də Yɩɩ pwə́rə́ wa? 11 Zwida lʋʋ lɩ̀à tə wà nimarʋ tə nii zìlí. Ba tʋn yobalwaran Yɩzərayɛlə lʋʋ nii tə wa, də Zwerizalɛmə wa. Cɩ́gá, Zwida lʋʋ lɩ̀à tə tʋn durən yìə̀n Yɩɩ wúlú bwálɩ́ tə wa, kʋ nə yɩ Ba-Yígúrə́-Jə-Tiu cɩcɩ nyiən, ʋ nə swə kʋ. Ba swe dwíə́ nəkaran* tə nə jʋnɩ woŋwanan bwɩ̀ɩ́. 12 Ba-Yígúrə́-Jə-Tiu wá lɩ bɛɛ tə nə tʋŋa yoo təntə yiri, Yɩzərayɛlə lɩ̀à tə wa. Ʋ wá lɩ bɛɛ təntə dìə̀ lɩ̀à də tətə, Zwakɔbə dwíí tə wa. Yá ʋ wá lɩ lìù tə də mama, ʋ nə wá ja zìlə́ won ʋ bà, ʋ pa Ba-Yígúrə́-Jə-Tiu nə, ʋ nə yɩ kwatara Yɩɩ, sə ʋ ma lòrì wá, bɛɛ təntə yuu yɩrɩ. 13 Nə̀ń kʋ tə á nə tʋŋa bələ nii nə: Á yàá kwi, á sisigə, á yinɩa vi Ba-Yígúrə́-Jə-Tiu joŋi bwálɩ́ tə, kʋ pa Ba-Yígúrə́-Jə-Tiu kʋ́ʋ̀ ba á zìlə́ wiən tə con taŋa, yá ʋ ba sɛ̀ ʋ joŋə won mama, á jɩ̀àn wa. 14 Yá á swɩ̀n, á wʋ́: «Bɛ̀ɛ̀ nə pɩn kʋ yɩ nətʋ?» Cɩ́gá, Ba-Yígúrə́-Jə-Tiu yɩn dansɩa lìù, á mʋ̀ də á zandʋan kan tə pwə́rə́ wa, á nə vɩga á dʋgʋ. Yá kan təntə nə yɩ á twadon, ʋ yɩ á nimarʋ kan. 15 Lìù mama bá tʋn yoo təntə, də ʋ nə jə pubʋnzəŋu ʋ waa con. Lìù nədʋ cɩcɩ nə tʋn kʋa, yá bɛ̀ɛ̀ nə pɩn ʋ ma tʋn kʋ? Kʋ yɩ dwíí tə, Yɩɩ yà nə kàn nii də ʋ wá pa wá, nə ʋ yà pɩ̀à. Á cɩa á tɩ̀àn nə zəni, lìù mama dàn ká vɩ ʋ zandʋan kan, ʋ dʋgʋ. 16 Cɩ́gá, Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ swɩ̀n də ʋ culi lìù tə nə tʋŋa wʋlʋŋʋ kan yɩra, sə ʋ ma dɩŋa wá ʋ dʋgʋ. Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n kʋ! Á cɩa á tɩ̀àn nə, á dànà ká ya níə́ bələ tɩ̀àn.
Ba-Yígúrə́-Jə-Tiu wá tʋn ʋ tʋntʋnʋ
17 Á wʋwalɩ Ba-Yígúrə́-Jə-Tiu də á sʋ̀ràn tə, yá á swɩ̀n, á wʋ́: «Nətə nə nə wʋwalɩ wá?» Kʋ yɩ á nə swɩ̀n, á wʋ́: «Lìù tə mama, ʋ nə tʋŋa lwanɩ, ziən Ba-Yígúrə́-Jə-Tiu yáá con, yá mə ləzwənyirə təntə nə, ʋ swə.» Nə à yə̀ə́ á nə swɩ̀n, á wʋ́: «Yɩɩ tə nə bʋ̀rɩ̀ bʋra, kʋ twá cɩ́gá cwəŋə nə tə, wulə yə̀n nə?»