3
1 Nəŋə kʋ tə Ba-Yígúrə́-Jə-Tiu nə le: «À wá tʋn à tʋntʋnʋ, sə ʋ kwɛn cwəŋə ʋ pa nə. Yá Yuu-Tiu tə á nə twarɩ, wá zʋ ʋ dìə̀ tə wa, ndə yii nə púə́ kʋ ga súrí nə. Nimarʋ tʋntʋnʋ tə á nə pɩ̀à nə ʋ bɩ̀àn! À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ!2 Wàà nə wàá ʋ túrí dɩɩn tə yáá nə ʋ zɩga? Wàà nə wá wànɩ́ yɩɩ nə ʋ zɩgɩ, máŋá tə wa, ʋ nə wá nan poni nə? Cɩ́gá, ʋ yɩ ndə cɩnayarʋ mən nə, ʋ ga yɩ ndə lɩ̀à tə sɩ̀ gànàn sɩpwalʋ nə.3 Ʋ wá jə̀ń ndə lìù tə nə, ʋ nə nyɩŋa səbiu lii mən wa, ʋ lɩ kʋ durən. Ʋ wá lɩ Levi dwíí tə durən wa, ʋ wá kwɛn ba ʋ lɩ durən wa, ndə ba nə nyɩnɩ sɩ́án də səbiu, ba lɩ tə durən nətʋ. Yá ba dàń wá ya lɩ̀à tə nə ja zìlə́ wiən ba twi, ba pɩn Ba-Yígúrə́-Jə-Tiu nə, kʋ twá cɩ́gá cwəŋə nə.4 Yá Ba-Yígúrə́-Jə-Tiu dàń wá sɛ̀ ʋ jon Zwida də Zwerizalɛmə tɩ̀án zìlə́ wiən tə, ndə dí yáá tə nə, bɩna tə wa tə nə kɛ̀ń.5 À wá yí á yɩra, à bʋ̀rɩ̀ á bʋra. Yá à wá bɩbarɩ, à swɩ̀n à zɩgɩ cɩra tə nə, də lɩ̀à tə nə, ba nə cwàrɩ̀, də lɩ̀à tə nə, ba nə dwì kʋ̀nkʋ̀n duri, də lɩ̀à tə nə, ba nə ba ba tʋ̀tʋ̀nà ŋwɩ́n, də lɩ̀à tə nə, ba nə fɩfɩn kadənə də bitara, də lɩ̀à tə nə, ba nə tʋŋa lwanɩ vərə yɩra, də lɩ̀à tə mama nə, ba nə ba à fən dəri. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ!»
Ka pìí ka bà Ba-Yígúrə́-Jə-Tiu con yoo
6 Ba-Yígúrə́-Jə-Tiu swɩ̀n, ʋ wʋ́: «Cɩ́gá, à mʋ̀ nə yɩ Ba-Yígúrə́-Jə-Tiu, yá à wà lwàń. Yá á mʋ̀ Zwakɔbə bɩ̀á tə, à wà pɩn ba cʋ̀gʋ̀ aba ba zwɛ̀ mɩ́ámɩ́án. 7 Kʋ nə zɩgɩ á nɩbara-ba máŋá wa, á vɩga à yìə̀n tə, à nə pɩn tə pʋ́pʋ́nɩ́, sə ba twá tə nə, á wà tə nə twá. Á pìrə́ á bà à con, yá à də wá pìí à bà á con. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! Yá á swɩ̀n, á wʋ́: “Nətə nə nə wá fwa, nə ma pìí nə bà n con?” 8 Ləzwənə wàá Yɩɩ ʋ gɩgɩrɩ naaa? Cɩ́gá, á mʋ̀ gɩgɩrɩ nə, yá á swɩ̀n, á wʋ́: “Bɛ̀ɛ̀ wa nə, nə gɩgɩrɩ mʋ́?” Kʋ yɩ fugə nii nyiən* tə, də zìlə́ wiən tə wa. 9 Zɩra wulə á yuu wa, yá á tə ga gɩgɩrɩ nə, á mʋ̀ lalʋʋ tə mama. 10 Á jana fugə nii nyiən tə mama, á bà à jɩjə wiən dìə̀ tə wa, sə wodiu dà ká mùrì à Dìə̀ tə wa. Á də́də́ŋə́ nə nətʋ á jə́n, də à nə ba súrí lanworu mimien tə, à pa aba, à ga fwa zəni á yɩra zənzən. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! 11 Á mʋ̀ yɩrɩ, à wá cɩ̀ wiən tə nə, tə nə cʋ̀gà kárɩ́ wiən, sə tə dàn ká cʋ̀gʋ̀ á kárɩ́ wiən, tə ga pa á divɛn tɩ̀án tə ba ləni. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! 12 Dwíə́ nəkaran* tə mama wá swɩ̀n də, á yɩ pupwən lɩ̀à, á lʋʋ nii tə wa yanʋ nə ywán yɩrɩ. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ!»
Dɩɩn tə Ba-Yígúrə́-Jə-Tiu nə wá bɩrɩ ʋ cɩ́gá cwəŋə tə
13 Ba-Yígúrə́-Jə-Tiu swɩ̀n, ʋ wʋ́: «Á sʋ̀ràn tə yɩn dɩ̀àn, á nə swɩ̀n á zɩgɩ à nə, yá á swɩ̀n, á wʋ́: “Bɛ̀ɛ̀ sʋ̀ràn nə nə swɩ̀n duən pwə́rə́ wa, nə ma zɩgɩ n nə?” 14 Á swɩ̀n, á wʋ́: “Ka tʋn ka pa Yɩɩ nə ba də̀ń jə. Nə nə twá yìə̀n tə nə, Ba-Yígúrə́-Jə-Tiu nə pɩn nii tə yuu wa, yá nə wulə lúə́ pucʋnɩ wa Ba-Yígúrə́-Jə-Tiu yɩrɩ, ʋ nə yɩ kwatara Yɩɩ, kʋ nywarɩ nə yɩ bɛ̀ɛ̀? 15 Sɩ́ʋ́n nə, nə na də lɩ̀à tə nə swə yɩrʋ jə pupwən, yá wʋlʋnyɩna də yìə̀n kwɛn tə pɩn ba. Cɩ́gá, ba yàá dídə́n Yɩɩ, yá yoo ba ba yí!”»
16 Yá lɩ̀à tə nə dəri Ba-Yígúrə́-Jə-Tiu fən dàń swɩ̀n duən con. Ba-Yígúrə́-Jə-Tiu zuri ʋ yɩra ʋ cʋgʋ, yá ʋ nì ba sʋ̀ràn tə. Yá ba pʋ́pʋ́nɩ́ lɩ̀à tə yɩra, ba nə dəri Ba-Yígúrə́-Jə-Tiu fən, ba ga zìlí ʋ yɩrɩ tə, ba kə sagɩ wa, ʋ yáá con, sə ba ma lìí ba yoo. 17 Yá Ba-Yígúrə́-Jə-Tiu, ʋ nə yɩ kwatara Yɩɩ dàń swɩ̀n, ʋ wʋ́: «À mʋ̀ nə wá tɩnɩ ba, Ba wá ya à cɩcɩ nyiən, dɩɩn tə nə à nə tanɩ. À wá tʋn wʋywaŋʋ ba yɩra, ndə nyɩna nə yàá tʋn wʋywaŋʋ ʋ bìú tə, ʋ nə tʋŋa ʋ pɩn wá yɩra nətʋ. 18 Yá á kʋ́ʋ̀ wá na pwɩa tə nə wulə cɩ́gá tíú, də wʋlʋnyiən pwə́rə́ wa, də lìù tə nə tʋŋa ʋ pɩn Yɩɩ nə, də lìù tə nə ba tʋŋa ʋ pɩn Yɩɩ nə pwə́rə́ wa. 19 Cɩ́gá, nəŋə dɩɩn bɩ̀àn, kʋ nə lɩŋa ndə lii mənvwəsɩʋn nə. Lɩ̀à tə mama nə jə yɩrʋ, də lɩ̀à tə nə tʋŋa wʋlʋŋʋ wá ya ndə gaʋ nə. Dɩɩn təntə nə bɩ̀àn wá də́ ba mɩ́ámɩ́án ndə mən nə. À bá yá ŋʋnan, nə à yə̀ə́ naywalan à pa ba. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! 20 Yá cɩ́gá cwəŋə yɩcaʋ dàń wá pɛ́n kʋ pa á mʋ̀ lɩ̀à tə nə, á nə dəri à yɩrɩ tə fən, yá yazurə wá ya yɩcaʋ təntə yɩcayana tə də̀ń nə. Á wá nan, á fan ndə nabii nə, ba nə kʋ̀nɩ̀ tə tún nʋga. 21 Á wá nɩŋa wʋlʋnyɩna də nɛɛ. Cɩ́gá, ba wá ya ndə tʋnan nə, á nɛɛ də̀ń nə, dɩɩn təntə nə, à nə wulə à tanɩ. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ!»
Eli ka pìí ka bà yoo
22 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́: «Á lìə́ á tɩ̀àn à nii yìə̀n tə yoo, à nə pɩn à tʋtʋnʋ Moyizə nə, Ɔrɛbə paan tə yuu, Yɩzərayɛlə lɩ̀à tə mama yɩrɩ. Tə yɩ yìə̀n, à nə pɩn tə pʋ́pʋ́nɩ́, sə ba twá tə nə, də yìə̀n, à nə bɩrɩ sə tə tʋn. 23 Nəŋə, à tətə wá tʋn Yɩɩ nii sʋ̀sʋ̀nʋ̀ Eli á con, də à mʋ̀ Ba-Yígúrə́-Jə-Tiu dɩɩn tə tə wà yí. Kʋ yɩ dɩɩn nəfarʋ, kʋ nə ba kamandon jə. 24 Ʋ wá pa nyɩna-ba də ba bɩ̀á pìí ba kə duən yuu, ʋ ga pa sìə́ ya bɩ̀á də ba nyɩna-ba pwə́rə́ wa. Kʋ nə tà nətʋ, à wá bà à cʋ̀gʋ̀ lʋʋ nii tə mɩ́ámɩ́án*.»