Malaswi
Yɩzərayɛlə nə Ba-Yígúrə́-Jə-Tiu kúrí
1
1 Bwə̀rə́. Kʋ tə yɩ Ba-Yígúrə́-Jə-Tiu nii sʋgʋ, ʋ nə twá də Malaswi, ʋ ma swɩ̀n Yɩzərayɛlə lɩ̀à con. 2 Ba-Yígúrə́-Jə-Tiu swɩ̀n á mʋ̀ ʋ lɩ̀à tə con, ʋ wʋ́: «À swə aba!» Yá á bwe wá, á wʋ́: «Bɛ̀ɛ̀ nə bɩrɩ də n swə nəba?» Ba-Yígúrə́-Jə-Tiu bwe, ʋ wʋ́: «Ezayu tà Zwakɔbə nubiu naaa? — À mʋ̀ Ba-Yígúrə́-Jə-Tiu nii sʋgʋ nə! Yá Zwakɔbə nə à sóní, 3 à ga culi Ezayu. À cʋ̀gʋ̀ Ezayu pɛɛn nagwanɛɛ tə, à ga pa ʋ lʋʋ nii tə, kasɔɔ lanworu cirəkuri nə. 4 Də Edomə tɩ̀án nə swɩ̀n, ba wʋ́: “Ba cʋ̀gʋ̀ nəba, yá nə wá pìí nə lwà nə dibwərən tə!” À mʋ̀ Ba-Yígúrə́-Jə-Tiu, à nə yɩ kwatara Yɩɩ swɩ̀n, à wʋ́: Ba lwiə, yá à wá gwɛrɩ tə. Yá ba wá dɩ ba yɩrɩ “wʋlʋŋʋ lʋʋ nii,” də “lalʋʋ tə Ba-Yígúrə́-Jə-Tiu lɩŋa nə zaŋa ba yuu wa wuuu.” 5 Á yɩ́á wá na kʋ nətʋ tə, yá á tətə wá swɩ̀n, á wʋ́: “Ba-Yígúrə́-Jə-Tiu nə dwə tə mɛ, də lʋʋ níə́ tə də tətə wa, tə nə tà Yɩzərayɛlə lʋʋ níə́!”»Ba-Yígúrə́-Jə-Tiu swɩ̀n ʋ zɩga Yɩɩ joŋwana tə nə
6 Ba-Yígúrə́-Jə-Tiu, ʋ nə yɩ kwatara Yɩɩ swɩ̀n Yɩɩ joŋwana tə con, ʋ wʋ́: «Bìú yàá zìlí ʋ nyɩna, yá tʋtʋnʋ də yàá zìlí ʋ yuu-tiu. Də à nə yɩ Nyɩna, dun tə wà yə̀n nə, á nə pɩn nə? Də à nə yɩ Yuu-Tiu, zìlə́ tə wà yə̀n nə, á nə jə á pa nə? Á mʋ̀ Yɩɩ joŋwana tə fʋfʋlɩ à yɩrɩ tə, á ga swɩ̀n á wʋ́: “Nətə nə nə fʋfʋlɩ n yɩrɩ tə?” 7 Á yàá ja durən wodirən á ja twi à joŋi bwálɩ́ tə yuu wa, á ga swɩ̀n, á wʋ́: “Bɛ̀ɛ̀ durən yìə̀n nə nə tʋn n yɩra?” Kʋ yɩ á yàá nə swɩ̀n, á wʋ́: “Yɩɩ joŋi bwálɩ́ tə mɛ sə ba zʋ̀nɩ̀ kʋ!” 8 Á nə jɩn vànɩ́ liliu á ja ba sə á ma fwa joŋi kʋ tà lwanɩ naaa? Á nə jɩn vànɩ́ kʋ nə yɩ gwànʋ́, nə à yə̀ə́ kʋ yɩra nə ba zurə, á ja ba, kʋ tà lwanɩ naaa? Á pɩan tə á lʋʋ nii tə yáá tíú tə nə, á jə́n ʋ pùə́ wá ya ywánɩ́ á yuu wa, ʋ ga sɛ̀ ʋ jon á zìlə́ wiən təntə naaa? À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ!» 9 Sɩ́ʋ́n nə, á dàń lòrə́ Yɩɩ, sə à fwa pubwanʋ nə yɩra. Kʋ yoo tə nan də aba. Á bʋŋa də ʋ wá sɛ̀ ʋ jon á zìlə́ wiən tə, kʋ tə á nə tʋn tə kwa nə naaa? Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n kʋ! 10 Ba-Yígúrə́-Jə-Tiu swɩ̀n, ʋ wʋ́: «Á wàà nə wá sun Yɩɩ dìə̀ tə mimien tə, sə á dàn ká sʋ̀rɩ́ mən à joŋi bwálɩ́ tə yuu wa tʋtʋ? Cɩ́gá, á ba fɩra mama jə á pa nə, yá à ba sɛ̀ à jon á zìlə́ wiən tə á jɩɩn wa! 11 Cɩ́gá, kʋ nə zɩgɩ yɩɩ yipɩan con, kʋ va kʋ yí yɩɩ yizwɩa con, à yɩrɩ tə na dun dwíə́ nəkaran* tə wa. Yá bwálɩ́ mama nə, ba sʋ̀rɩ́ wusinə ba ma pɩn dun à yɩrɩ tə nə, ba ga janɩ zìlə́ wiən tə nə yɩ parɩ, ba twi ba pɩn nə. Cɩ́gá, à mʋ̀ yɩrɩ tə nə wulə tə mɛ yuu wa, dwíə́ nəkaran tə titəŋi wa. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! 12 Yá á mʋ̀ cʋ̀gà à yɩrɩ nə, á ga swɩ̀n, á wʋ́: “Yuu-Tiu joŋi bwálɩ́ tə zʋa durən, yá kʋ yuu wodiu tə mɛ sə ba zʋ̀nɩ̀ kʋ.” 13 Á swɩ̀n, á wʋ́: “Bɛ̀ɛ̀ tʋtʋncaran nə nətən!” Yá á yáá tə̀lə́ də nə. À mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! Á janɩ vàná á nə ŋʋan, nə à yə̀ə́ tə nə yɩ gwànán, nə à yə̀ə́ tə yɩra nə ba zurə, á ja twi á pɩn nə, ndə zìlə́ wiən nə! Nətə nə à wá sɛ̀ à jon tə á jɩɩn wa? À mʋ̀ Ba-Yígúrə́-Jə-Tiu nə swɩ̀n kʋ. 14 Zɩra wulə gɩgɩrɩnyiən yuu wa, ʋ nə jə vàná nəzəŋə ʋ vàná wa, ʋ ga lɩ vanbɩa tə nə wà cé, ʋ ma fwa nipoli* joŋi, ʋ pa Yuu-Tiu nə. Cɩ́gá, à yɩ pɩ̀ʋ́ nəfarʋ, à mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n kʋ! Yá à yɩrɩ tə ba kamandon jə, dwíə́ nəkaran tə titəŋi wa.»