Banɩa nii nə, Amɔsə nɩ tɩ̀án lənə fɩyaa
8
1 Yuu-Tiu Ba-Yígúrə́-Jə-Tiu kʋ́ʋ̀ pɩn à na fɩyaa,də ka wa tɩ̀án lənə, tə nə bɩga.
2 Yá ʋ bwe nə, ʋ wʋ́: «Amɔsə, bɛ̀ɛ̀ nə n na?» À ma le, à wʋ́: «Fɩyaa də ka waa tɩ̀án lənə, tə nə bɩga.» Ba-Yígúrə́-Jə-Tiu ma swɩ̀n à con, ʋ wʋ́:
«Yɩzərayɛlə lɩ̀à tə, ba nə yɩ à mʋ̀ lɩ̀à, yígúrə́ yí,
ndə tɩ̀ʋ́ lənə nə bɩga,
yá à kʋ́ʋ̀ bá yá ba tʋtʋ.
3 Kʋ dɩɩn təntə nə, lúə́ kwirə nə wá ya padiə tə wa gwaran.
À mʋ̀ Ba-Yígúrə́-Jə-Tiu nii sʋgʋ nə!
Ba wá dɩlɩ tɩga kapʋpʋ, tɩa mama,
kʋ ga wá ya səgisəgi.»
Baywələ wʋliru tə wá kə càn ba nə
4 Á cʋga sʋgʋ kʋ tə zəni,
á mʋ̀ lɩ̀à tə, á nə nɩŋɩ zʋra, ndə tɩa pùrú nə,
á ga pɩn yinənyɩna nywɩn tɩa, lʋʋ nii tə wa!
5 Á yàá swɩ̀n, á wʋ́:
«Candʋan tə wá kɛ̀ń dɩɩn doo,
sə nə wànɩ́ nə yoli nə wobɩa?
Sìə́ dɩɩn* tə wá zwɛ̀ dɩɩn doo,
sə nə pìí nə súrí nə pulən nii nə?
Nə wá mun wiən tə nə kəri wobɩa,
nə ga súrí tə kwənə.
Nə wá ja ŋwɩ̀rɩ̀ səkəri,
nə ma gɩgɩrɩ lɩ̀à wiən, kəru wa.
6 Nə wá yə̀ lalaŋa, ba nə wàrɩ̀ ba jɩŋɩ ba ŋwɩ́n yɩrɩ,
nə ga yə̀ zʋra natɩra kwənə yɩrɩ.
Yá nə wá yoli mɩpulə tə də tətə.»
7 Ba-Yígúrə́-Jə-Tiu tə, Zwakɔbə dwíí tə nə ma fwa fwiə, dùə̀, ʋ wʋ́:
«À bá swɛ̀ɛ́ ba tʋtʋnɛɛ tə nədʋ də tətə, abada!»
8 Kʋ mʋ̀ nə pɩn, tɩa tə wá vuvugu lʋʋ nii tə wa,
yá kʋ lɩ̀à tə mama wá ya lúə́ pucʋnɩ wa.
Lʋʋ nii tə mama wá fʋ̀lɩ́, ndə Nilə mʋnaa tə nə,
yá kʋ wá pìí kʋ tʋ duən yuu, ndə Ezwipətə Nilə mʋnaa tə nə.
9 Yuu-Tiu Ba-Yígúrə́-Jə-Tiu nii sʋgʋ nə.
Ʋ swɩ̀n, ʋ wʋ́:
«Kʋ dɩɩn təntə nə, à wá pa yɩcaʋ tə zʋ, yɩcaʋ gùlú máŋá wa,
à ga pa tɩa yì, yɩcakʋrʋ wa.
10 À wá pa á cànɩ̀ tə diŋə pupwən tə lwàń ka jì lúə́,
à ga pa á gwaran tə mama lwàń tə jì lúə́ kwirə.
À wá pa lɩ̀à tə mama vwa ganlwaran, ba tàŋɩ́ nəa,
à ga pàrɩ́ ba yun tə mama yukolən.
À wá pa ba kwi, ndə lìù bidʋa nə tɩga,
yá yìə̀n tə nə wá tʋn kʋ kwa nə, wá ya ndə pucʋnɩ dɩɩn nə.»
11 Yuu-Tiu Ba-Yígúrə́-Jə-Tiu nii sʋgʋ nə.
Ʋ kʋ́ʋ̀ swɩ̀n, ʋ wʋ́:
«Á nəŋə, máŋá don bɩ̀àn, à nə wá pa niən bà lʋʋ nii tə wa.
Niən də nanyʋnɩ wá ja lɩ̀à tə,
yá kʋ tà wodiu niən, də nɩ́á nanyʋnɩ.
Yá kʋ dàń nə yɩ à sʋ̀ràn tə niu niən, də tə nanyʋnɩ nə wá ja ba.
12 Ba dàń wá ywan,
ba nan jɩgwiə saparʋ con, ba va yɩɩ yizwɩa con,
ba nan jɩzən saparʋ con, ba va yɩɩ yipɩan con,
ba tətəli, ba ma pɩ̀à à mʋ̀ Ba-Yígúrə́-Jə-Tiu sʋgʋ tə, sə ba cʋgʋ,
yá ba bá na kʋ.
13 Kʋ dɩɩn təntə nə, nanyʋnɩ wá pa kabwanbii tə, də balandʋra tə jɛ.
14 Ba mʋ̀ lɩ̀à tə nə dwì də Samari tɩ̀án wolwan tə,
ba ga swɩ̀n də, Dan dwíí tə woŋwanʋ tə nəŋə!
Nə à yə̀ə́ ba dwì də, joŋi tə nə wulə Bɛrəsweba nə, jə dɩ̀àn!
Ba mʋ̀ lɩ̀à təntə wá tʋ, yá ba kʋ́ʋ̀ bá pìí ba zàn.»