Bonu nii nə, Amɔsə nɩ də Yɩɩ wúlú bwálɩ́ tə cʋ̀gʋ̀
9
1 À nɩ Yuu-Tiu, də ʋ zɩga Yɩɩ joŋi bwálɩ́ tə yuu con,yá ʋ pɩn nii, ʋ wʋ́:
«Mà Yɩɩ dìə̀ tə ywəŋə tə yuu kirən tə,
sə tə dəkurən tə sisigi!
Kɛ́n tə n dɩ lɩ̀à tə mama yuu nə!
Yá lɩ̀à nə ga ba wa, à wá pa ba gʋ ba də kwatara sɩ̀ʋ́.
Ba wa lìù mama bá wànɩ́ ʋ dəri,
yá ba gɩganɩ tə wa lìù mama bá jɛ́n.
2 Ba nə swə ba va ciru* də,
à wá van ba, à lɩ lá.
Ba nə kʋ́ʋ̀ dɩ̀gà lanworu tə wa,
à wá pa ba pìí ba cú.
3 Ba nə səgə Karəmɛlə paan tə yuu wa,
à wá twarɩ ba lá nə, à ja.
Ba nə kʋ́ʋ̀ fan ba tʋ mʋʋ də̀ń nə, sə ba jɛ́n à yáá nə,
à wá pa nii, sə dən dɩŋa ba, lá nə.
4 Ba dʋŋa nə ja ba, ba va yongaʋ,
à wá pa nii, sə ba dʋŋa tə gʋ ba lá nə, də kwatara sɩ̀ʋ́.
À wá fin à yɩ́á ba yuu,
à pa ba də́ càn,
à bá pa ba də́ ywánɩ́.»
5 Yuu-Tiu Ba-Yígúrə́-Jə-Tiu, ʋ nə yɩ kwatara Yɩɩ,
dwen tɩa tə yɩra, ka ga vɩvaga.
Ka yuu lɩ̀à tə mama wulə lúə́ pucʋnɩ wa.
Ka mama fʋ̀lɩ́, ndə Nilə mʋnaa tə nə,
ka ga pìí ka tʋ duən yuu, ndə Ezwipətə Nilə mʋnaa tə nə.
6 Yɩɩ lwə̀ ʋ sàń lanworu tə wa, tɩa tə yuu con.
Ʋ mʋ̀ nə boŋə mʋʋ nɩ́á,
ʋ pɩn tə naŋa tə lwɛ́ tɩa yuu wa.
Ʋ yɩrɩ nə yɩ Ba-Yígúrə́-Jə-Tiu.
Càn tə nə wá yí Yɩzərayɛlə lɩ̀à
7 Ba-Yígúrə́-Jə-Tiu nii sʋgʋ nə.
Ʋ swɩ̀n, ʋ wʋ́:
«Yɩzərayɛlə lɩ̀à-ba, á ba funə jə á pa nə,
ndə Kuswəa tɩ̀án tə nə naaa?
Kʋ tà à mʋ̀ nə pɩn á dwíí tə nan ba yá Ezwipətə lʋʋ nii tə,
ndə à nə pɩn Filisi tɩ̀án tə nan ba yá Kafətɔrə,
à ga pa Siiri tɩ̀án də nan ba yá Kirə nətʋ naaa?»
8 Yuu-Tiu Ba-Yígúrə́-Jə-Tiu fin ʋ yɩ́á
Yɩzərayɛlə payuu tə yuu wa, kʋ nə tʋn cʋna,
yá ʋ swɩ̀n, ʋ wʋ́:
«À wá cʋ̀gʋ̀ kʋ, à pa kʋ jɛ́n tɩa yuu wa.
Yá à dàń nə bá cʋ̀gʋ̀ Zwakɔbə dwíí tə mʋ̀ mama,
à pa kʋ jɛ́n tɩa yuu wa.
À mʋ̀ Ba-Yígúrə́-Jə-Tiu nii sʋgʋ nə.
9 Cɩ́gá, à wá pa nii,
sə dwíə́ nəkaran* tə mama vuvugu Yɩzərayɛlə dwíí tə,
ndə ba nə zəzəga wobɩa də cwasɩʋn,
yá wobiu nədʋ mama ba tɩa twɩ.
10 Ba wá gʋ à lɩ̀à tə wa cʋna lɩ̀à tə mama, də kwatara sɩ̀ʋ́.
Ba mʋ̀ lɩ̀à tə nə swɩ̀n də, càn bá yí ba,
tə ga bá bólí ba yɩra də tətə.»
Yɩɩ kàn nii, də ʋ wá kwɛn ʋ lɩ̀à tə, càn tə kwa nə
11 Ba-Yígúrə́-Jə-Tiu swɩ̀n, ʋ súrí lá, ʋ wʋ́:
«Kʋ dɩɩn təntə nə, à wá pìí à zɩ̀n Davidə diboo tə.
À wá sun kʋ lulwərən tə,
à ga lwà kʋ bírí tə.
À wá pìí à lwà kʋ à zɩgɩ, ndə kʋ dí yáá nə.
12 Yá Yɩzərayɛlə lɩ̀à tə dàń wá pìí ba jon
Edomə tɩ̀án payuu tə gɩganɩ tə,
də dwíə́ nəkaran* tə, ba yà nə yɩ à mʋ̀ nə tɩ.
À mʋ̀ Ba-Yígúrə́-Jə-Tiu nii sʋgʋ nə,
à ga wá tʋn kʋ, à pa kʋ nii sú.»
13 Ba-Yígúrə́-Jə-Tiu nii sʋgʋ nə.
Ʋ kʋ́ʋ̀ swɩ̀n, ʋ wʋ́:
«Á nəŋə, máŋá don bɩ̀àn,
ba nə wá tʋn fʋʋ wuuu,
kʋ va kʋ yí vanʋ máŋá.
Yá ba wá pʋ̀rɩ́ divɛn tɩ̀án lənə də wuuu,
kʋ va kʋ yí dipɛn mɩna dwiu máŋá.
Kʋ máŋá tə wa, divɛn nədʋn tə wá pàlɩ̀ pɛɛn tə yuu wa,
yá kʋ wá sú pɛɛn tə mama yuu.
14 À wá pìí à ja Yɩzərayɛlə dwíí tə, ba nə yɩ à mʋ̀ lɩ̀à,
à nan yongaʋ tə wa, à bà.
Yá ba wá pìí ba lwà tɩan tə, dʋŋa nə cʋ̀gʋ̀,
ba ya tə wa.
Ba wá cwɛn divɛn tɩ̀án kárɩ́,
ba ga wá nyʋn tə divɛn.
Ba wá vàrà dəŋə kárɩ́,
ba ga wá də́ tə lənə.
15 À wá pìí à jə̀ń à lɩ̀à tə, ba lʋʋ nii tə wa,
yá ba dʋŋa kʋ́ʋ̀ bá zɩ̀n ba, lʋʋ nii təntə wa,
à nə pɩn ba.
À mʋ̀ Ba-Yígúrə́-Jə-Tiu, à nə yɩ á Yɩɩ nə swɩ̀n kʋ nətʋ.»