YIƏN TƏ, AMƆSƏ NƏ NƖ, Ʋ PANDWƖA WA
Amɔsə təntən ʋ na jə̀rə̀n
7
1 Nə̀ń kʋ tə Yuu-Tiu Ba-Yígúrə́-Jə-Tiu nə bɩrɩ nə nɩʋn wa.Ʋ yà wulə ʋ fwa jə̀rə̀n, máŋá tə wa, gaʋ tə nə pìí kʋ twè,
ba nə gɩan kʋ, ba pa pɩ̀ʋ́ nə, kwa nə.
2 Yá jə̀rə̀n tə dàń yà nə wulə lʋʋ nii tə gaʋ tə, tə də́ tə zwɛ̀,
à swɩ̀n à wʋ́: «Yuu-Tiu Ba-Yígúrə́-Jə-Tiu,
à lòrì sə n kwɛn n lɩ̀à tə cʋna, n lɩ n də ba pwə́rə́ wa!
Kʋ nə tà nətʋ, Zwakɔbə dwíí tə wá tɩ ba zwɛ̀!
Cɩ́gá, ba mun zənzən!»
3 Ba-Yígúrə́-Jə-Tiu dàń pìí ʋ lwàń pubʋŋa, ʋ ga swɩ̀n, ʋ wʋ́: «Kʋ bá ya nətʋ!»
Bələ nii nə, Amɔsə nɩ mən
4 Kʋ kwa nə, Yuu-Tiu Ba-Yígúrə́-Jə-Tiu pɩn à na yoo kʋ tə:
Yuu-Tiu Ba-Yígúrə́-Jə-Tiu yà jə mən, ʋ ma bʋ̀rɩ̀ bʋra.
Yá mən tə lɩŋɩ yà pɩn bʋʋ nəfarʋ tə kʋ də̀ń nə lu* nɩ́á tə wʋ,
tə ga də́ Yɩzərayɛlə lʋʋ nii tə mama.
5 À dàń swɩ̀n, à wʋ́: «Yuu-Tiu Ba-Yígúrə́-Jə-Tiu,
à lòrì sə n yá nətʋ!
Kʋ nə tà nətʋ, Zwakɔbə dwíí tə wá tɩ ba zwɛ̀!
Cɩ́gá, ba mun zənzən!»
6 Yuu-Tiu Ba-Yígúrə́-Jə-Tiu dàń pìí ʋ lwàń pubʋŋa,
ʋ ga swɩ̀n, ʋ wʋ́: «Kʋ də bá ya nətʋ!»
Batwa nii nə, Amɔsə kʋ́ʋ̀ nɩ dìlwə̀rə́ ŋwənə
7 Ba-Yígúrə́-Jə-Tiu kʋ́ʋ̀ pɩn à na yoo kʋ tə:
À nɩ Yuu-Tiu, də ʋ zɩga bírə́ yɩra, ka nə yɩ mənəmənə,
ʋ ga jə dìlwə̀rə́ ŋwənə ʋ jɩɩn wa.
8 Yá Ba-Yígúrə́-Jə-Tiu dàń bwe nə, ʋ wʋ́: «Amɔsə, bɛ̀ɛ̀ nə n na?»
À ma le, à wʋ́: «Dìlwə̀rə́ ŋwənə!»
Yá Yuu-Tiu swɩ̀n, ʋ wʋ́:
«À ken dìlwə̀rə́ ŋwənə Yɩzərayɛlə lɩ̀à tə titəŋi wa,
ba nə yɩ à mʋ̀ lɩ̀à,
yá à kʋ́ʋ̀ bá yá ba tʋtʋ.
9 À wá cʋ̀gʋ̀ Yɩzakə dwíí culu dədwələn* tə,
də Yɩzərayɛlə lɩ̀à Yɩɩ wúlú bwálá tə,
à ga wá zàn à zɩgɩ Zwerobʋamə padiə tə nə, də kwatara sɩ̀ʋ́.
Yɩɩ joŋwanʋ Amasɩa dɩŋɩ Amɔsə, ʋ lɩ Betɛlə wa
10 Yɩɩ joŋwanʋ Amasɩa, ʋ nə wulə Betɛlə nə, pɩn ba swɩ̀n Yɩzərayɛlə pɩ̀ʋ́ Zwerobʋamə con, ʋ wʋ́: «Amɔsə swɩ̀n ʋ zɩga n nə, Yɩzərayɛlə payuu tə wa. Lʋʋ nii tə lɩ̀à kʋ́ʋ̀ wàrɩ̀ ʋ sʋ̀ràn tə mama, ba pɩ́nɩ́. 11 Cɩ́gá, Amɔsə swɩ̀n də,
n mʋ̀ pɩ̀ʋ́ Zwerobʋamə wá tɩ kʋ̀ʋ̀ wa,
yá ba ga wá ja Yɩzərayɛlə lɩ̀à tə, ba va yongaʋ, lʋʋ nii wa, kʋ nə ŋʋ́ná də ba lʋʋ nii tə.»
12 Yá Amasɩa dàń swɩ̀n Amɔsə con, ʋ wʋ́: «Yɩɩ yinarʋ, dəri n va Zwida lʋʋ nii wa, n ya lá. N wá na n nii wodiu bwálɩ́ təntə wa, n ga swɩ̀n Yɩɩ nii sʋ̀ràn tə lá nə. 13 Yá n nə kʋ́ʋ̀ dàn ká swɩ̀n Yɩɩ nii sʋ̀ràn tə, Betɛlə mʋ̀ wa. Cɩ́gá, kʋ yɩ pɩ̀ʋ́ tə Yɩɩ wúlú bwálɩ́, kʋ ga yɩ payuu tə Yɩɩ dìə̀.»
14 Yá Amɔsə le Amasɩa, ʋ wʋ́: «À tà Yɩɩ nii sʋ̀sʋ̀nʋ̀, à ma tà Yɩɩ nii sʋ̀sʋ̀nà karbiu. À yɩ vàná à kʋ̀nɩ̀, à ga bɩ̀rɩ̀ kapɩrɩtoo lənə. 15 Yá Ba-Yígúrə́-Jə-Tiu lɩ nə, à vàná tə kwa, ʋ ga swɩ̀n à con, sə à va à swɩ̀n ʋ nii sʋ̀ràn, Yɩzərayɛlə dwíí tə con, ba nə yɩ ʋ mʋ̀ lɩ̀à. 16 Sɩ́ʋ́n nə, n mʋ̀ Amasɩa, n dàń cʋgʋ Ba-Yígúrə́-Jə-Tiu nii sʋgʋ.
N mʋ̀ lìù tə, n nə cɩ̀,
sə à dàn ká swɩ̀n Yɩɩ nii sʋ̀ràn Yɩzərayɛlə lɩ̀à tə con,
n ga swɩ̀n də, à dàn ká fwa zizigu Yɩzakə dwíí tə yuu wa!
17 Kʋ mʋ̀ yɩrɩ, nə̀ń yoo tə Ba-Yígúrə́-Jə-Tiu nə swɩ̀n, n con.
N kan tə wá cwàrɩ̀ tɩʋ tə wa,
ba wá gʋ n bɩ̀á tə, də n bwɩ̀ɩ́ tə də kwatara sɩ̀ʋ́,
ba wá man n tɩa tə, ba tara, ba pa lɩ̀à duən nə,
n tətə wá tɩ lʋʋ nii don wa, kʋ tɩ̀án nə yəri Yɩɩ.
yá ba wá ja Yɩzərayɛlə lɩ̀à, ba ja va yongaʋ,
lʋʋ nii wa, kʋ nə ŋʋ́ná də ba lʋʋ nii tə.»