Càn wá yí Yɩzərayɛlə jɩjə tɩ̀án tə, də ləzwənfaran tə
6
1 Càn wá yí á mʋ̀ lɩ̀à tə, á nə nə̀ń á ywánɩ́, Siyon paan tə yuu wa,də ba tə nə bʋŋa də yoo wàrɩ̀ ba kʋ yí, Samari paan tə yuu wa.
Á mʋ̀ lʋʋ nii tə nə yɩ təntən lʋʋ nii, lʋʋ níə́ tə wa,
yá á mʋ̀ nə yɩ kʋ ləzwənfaran,
Yɩzərayɛlə lɩ̀à tə nə vəli á con.
2 Á yàá swɩ̀n á lʋʋ lɩ̀à tə con, á wʋ́:
«Á vələ á ywàń Kaləne,
sə á zɩgɩ lá, á lɛ á va Hamatə tɩfarʋ tə wa.
Á nə nan lá, sə á va Gatə, filisi tɩ̀án lʋʋ nii tə waa.
Á ywàŋá tɩan təntə á jə́n,
tə kʋ́kwà nə payun bələ tə naaa?
Á ywàŋá tə lʋʋ nii tə á jə́n,
kʋ dáá kʋ doni nə lʋʋ nii tə naaa?»
3 Á bʋŋa də yobɩbɩlʋ dɩɩn tə yáá nə nə, á cɩ̀,
yá kʋ yɩ càn máŋá tə nə, á vaŋa, á kəni á tɩ̀àn nə, lala.
4 Á yɩ lɩ̀à tə, á nə tígə́ gədərən yuu,
ba nə nàn də won,
kʋ nə yɩ ndə tuu yelə yɩra nə.
Á tɩɩn á tígə́ ganpurə yuu,
á ma də́ pəbii, tə yɩra nə zurə,
də nabii, ba nə kúrí najɩrɩ wa.
5 Á dɩ gwaran nədʋra,
á nuŋə də banʋ, ndə Davidə nə.
6 Á nywɩn divɛn wùrú zwɩɩn nəfaran wa,
á tùrì á yɩra də nʋga nədʋn,
yá Zʋzɛfə dwíí tə nə wá cʋ̀gʋ̀ tə mʋ̀ yoo ba aba yɩ̀.
7 Kʋ mʋ̀ nə pɩn, sɩ́ʋ́n nə, á mʋ̀ nə wá ya lɩ̀à tə yáá,
ba nə wá ja va yongaʋ tə.
Yá á mʋ̀ yayɩnyɩna-ba cànɩ̀ tə diŋə dàń wá zwɛ̀.
Yɩɩ wá cʋ̀gʋ̀ Samari tɩʋ tə
8 Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə.
Yuu-Tiu Ba-Yígúrə́-Jə-Tiu dùə̀ də ʋ tətə, ʋ swɩ̀n, ʋ wʋ́:
«À waa nan Zwakɔbə dwíí tə fwìə́ tə,
à ga culi ba padii tə.
À wá kə Samari tɩʋ tə,
də won tə mama nə wulə kʋ wa, dʋŋa jɩɩn wa.
9 Yá lɩ̀à fugə də tətə nə ga dìə̀ wa,
ba də tə wá tɩ.
10 Tɩgɩ tə dwíí tíú dàń nə twi, sə ʋ tì tɩgɩ tə, ʋ ja va ʋ sʋ̀rɩ́,
ʋ wá bwe lìù tə nə ga dìə̀ tə də̀ń con, ʋ wʋ́:
«Lìù don tə wulə n con naaa?»
Yá lìù təntə wá le, ʋ wʋ́:
«Ɔɔn ɔɔn, lìù tə̀lə́ yəbə!»
Yá tɩgɩ tə dwíí tíú tə dàń wá swɩ̀n, ʋ wʋ́:
«Kʋ nə yɩ nətʋ, sə pú n nii!
Dàn ká sɩnɩ, n bon Ba-Yígúrə́-Jə-Tiu yɩrɩ, máŋá ka tə wa!»
11 Cɩ́gá, Ba-Yígúrə́-Jə-Tiu wá pa nii,
yá difaran tə wá buburi duən yuu,
dibii tə də ga tʋ tə mumuni.
12 Səsen yàá dəri pɩ̀ràn yuu wa naaa?
Ba yàá ja nɩan ba ma vàrà pɩ̀ràn yuu naaa?
Bɛ̀ɛ̀ dàń nə pɩn, á lwàń kʋ tə nə yɩ cɩ́gá Yɩɩ yáá con,
á pa kʋ jì ndə lagʋrɩ won nə,
á ga lwàń cɩ́gá, á pa ka jì càn, ndə kala nə?
13 Á jwɛ á nə dí dɩ̀àn Lodebarəb tɩʋ tə yuu wa yɩrɩ, kʋ nə yɩ tʋtʋ,
á ga swɩ̀n, á wʋ́: «Kʋ yɩ nə tətə dɩ̀àn nə, nə ma ta Karənayiməc tɩʋ tə, nə də́.» 14 Yá Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə.
Ʋ swɩ̀n, ʋ wʋ́:
«Kʋ mʋ̀ yɩrɩ, Yɩzərayɛlə lɩ̀à-ba,
à wá pa lʋʋ nii don lɩ̀à zàn ba zɩgɩ á nəd.
Ba wá zɩgɩ Lebo-Hamatə nə, ba kə aba càn wa,
ba va ba yí Araba nacoru təe.»