Yɩɩ nii sʋ̀sʋ̀nʋ̀ tə dɩga lúə́ pucʋnɩ gwaran
5
1 Yɩzərayɛlə lɩ̀à-ba, á cʋga sʋ̀ràn tə tə!Tə yɩ lúə́ gwaran, à dɩga á yɩrɩ.
2 Yɩzərəyɛlə yɩ ndə kacɩɩn nə tʋa, ʋ tɩ kʋ̀ʋ̀ wa.
Ʋ kʋ́ʋ̀ bá pìí ʋ zàn.
Nə̀ń ʋ nə, ʋ tígə́ ʋ tətə tɩa wa,
yá lìù mama tə̀lə́, sə ʋ zɩ̀n wá.
3 Cɩ́gá, nəŋə nii tə, Yuu-Tiu Ba-Yígúrə́-Jə-Tiu nə pɩn.
Ʋ swɩ̀n Yɩzərayɛlə dwíí tə yoo, ʋ wʋ́:
«Tɩʋ tə kʋ bara mʋ̀rʋ̀ nə yàá va kʋ̀ʋ̀,
bara bíí cɩcɩ nə wá pìí ba bà.
Yá tɩʋ tə də, kʋ bara bíí nə yàá va kʋ̀ʋ̀,
bara fugə cɩcɩ nə wá pìí ba bà.»
Ba-Yígúrə́-Jə-Tiu boŋə ʋ kəni ʋ lɩ̀à tə nə, sə ba lwàń ba tʋtʋnɛɛ
4 Cɩ́gá, nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n Yɩzərayɛlə dwíí tə con, ʋ wʋ́:
«Á nə pɩ̀à mɩɩ, à mʋ̀ nə, á mɛ sə á pɩ̀à!
5 Yá á nə dànà ká pɩ̀à nə, Betɛlə Yɩɩ wúlú bwálɩ́ tə wa.
Á dànà ká va Giləgalə Yɩɩ wúlú bwálɩ́ tə wa.
Á dànà ká dɩ á naa Bɛrəsweba Yɩɩ wúlú bwálɩ́ tə wa.
Cɩ́gá, ba wá pɛ̀ Giləgalə tɩ̀án mama, ba ja va yongaʋ.
Yá Betɛlə Yɩɩ wúlú bwálɩ́ tə wá jì cʋna bwálɩ́.»
6 Á nə pɩ̀à mɩɩ, Ba-Yígúrə́-Jə-Tiu nə á mɛ, sə á pɩ̀à.
Kʋ nə tà nətʋ, ʋ wá tʋn ʋ dɩ̀àn tə, Zʋzɛfə dwíí tə yɩra.
Kʋ wá ya ndə mən nə kwe,
yá lìù mama ga tə̀lə́ Betɛlə wa, ʋ dəŋi tə.
7 Á yɩ lɩ̀à tə, á nə lwànɩ́ cɩ́gá,
á pɩn ka jì càn, ndə kala nə,
á ga ja cɩ́gá yoo, á fwa tʋtʋ!
8 Yɩɩ tə nə fwa zara tə lanworu wa,
ʋ ga fwa yɩdɩɩn də tɩpwən mɩmɩnʋ lanworu wa,
ʋ mʋ̀ nə lwànɩ́ yikunu, ʋ pɩn jɩjʋ poni twi.
Ʋ mʋ̀ nə pɩn yɩcaʋ zwɩ, tɩtɩn ga twi.
Ʋ mʋ̀ nə boŋə mʋʋ nɩ́á,
ʋ pɩn tə naŋa tə lwɛ́ tɩa yuu wa.
Ʋ yɩrɩ nə yɩ Ba-Yígúrə́-Jə-Tiu.
9 Ʋ pɩn ladɩa jì labwanʋ,
ʋ ga pɩn ba tɛ dɩ̀àn dakuu bwálɩ́, ba cʋ̀gà.
10 Á culi lìù tə nə swɩ̀n cɩ́gá á con bʋra bwálɩ́ nə,
à ga ba dansɩa lìù tə nə swɩ̀n cɩ́gá swə.
11 Á yàá dɩ bwaan lalaŋʋ yuu wa,
á ma joŋə ʋ mɩna vàn don.
Kʋ mʋ̀ yɩrɩ, á kapana dìì tə, á nə lwə̀,
á bá ya tə wa.
Yá á divɛn tɩ̀án kárɩ́ nəzəŋə tə də, á nə cwɛn,
á bá nyʋn tə divɛn.
12 Cɩ́gá, à yə̀ə́ á yolwana tə nə dáá nətʋ,
à ga yə̀ə́ á cʋna tə nə dù zənzən nətʋ.
Á kəni cɩ́gá tíú càn wa,
á ga joŋə vwiŋə lɩ̀à con.
Yá bʋra bwálɩ́ nə, zʋrʋ nə swə, ʋ jə cɩ́gá də,
á mʋ̀ yàá ba wá cɩ́gá pɩn.
13 Kʋ mʋ̀ nə pɩn, zə̀n máŋá ka tə lɩ̀à tə,
ba nə yɩ wʋbʋnyɩna, pú ba nii.
Cɩ́gá, kʋ yɩ máŋá ka nə lwara.
14 Á twara kʋ tə nə ziən,
á ga yá kʋ tə nə lwara,
sə á mɩɩ wànɩ́ kʋ ya lʋʋ wa.
Yá kʋ nətʋ wá pa, Ba-Yígúrə́-Jə-Tiu,
ʋ nə yɩ kwatara Yɩɩ cɩ́gá ya də aba,
ndə á nə swɩ̀n də ʋ wulə də aba nətʋ.
15 Á dànà ká sóní kʋ tə nə lwara,
á swə́nə́ kʋ tə nə ziən.
Á pɩan cɩ́gá ya á bʋra bwálɩ́ nə,
dɩɩn don, kʋ nətʋ wá pa,
Ba-Yígúrə́-Jə-Tiu, ʋ nə yɩ kwatara Yɩɩ,
dəri Zʋzɛfə dwíí gɩganɩ tə yinəgə.
16 Kʋ mʋ̀ nə pɩn, Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ ma pa nii kʋ tə, ʋ wʋ́:
«Tɩʋ tə kanpwərən tə mama wa,
kʋ wá ya lúə́ pucʋnɩ gwaran.
Coŋi tə mama yuu wa, kʋ wá ya woyii woyii!
Ba wá bon vala, sə ba kwi lúə́,
ba ga bon lɩ̀à tə nə yə̀ə́ lúə́ pucʋnɩ gwaran,
sə ba dɩ lúə́ gwaran.
17 Divɛn tɩ̀án kárɩ́ tə mama wa,
ba wá dɩ lúə́ pucʋnɩ gwaran,
máŋá tə wa, à nə wá twá á titəŋi wa, à lɛ.
Ba-Yígúrə́-Jə-Tiu nə swɩ̀n kʋ nətʋ.
Ba-Yígúrə́-Jə-Tiu dɩɩn tə yoo
18 Càn wá yí lɩ̀à tə, ba nə dànɩ̀ Ba-Yígúrə́-Jə-Tiu dɩɩn tə!
Bɛ̀ɛ̀ yozəŋu nə á dànɩ̀ sə á na, Ba-Yígúrə́-Jə-Tiu dɩɩn tə nə?
Kʋ wá ya yikunu dɩɩn, kʋ bá ya poni dɩɩn.
19 Kʋ wá ya ndə lìù nə dəri gəru yáá nə,
ʋ va ʋ jəri kənyenkuru.
Nə à yə̀ə́ ʋ nə vəli ʋ zʋ ʋ dìə̀,
ʋ zi ʋ jɩɩn bírə́ yɩra, dən ga dɩŋa wá.
20 Ba-Yígúrə́-Jə-Tiu dɩɩn tə cɩ́gá tà yikunu dɩɩn,
kʋ yɩ poni dɩɩn naaa?
Cɩ́gá, kʋ yɩ yikunu dɩɩn, kʋ tà poni dɩɩn!
Yɩɩ culi Yɩzərayɛlə lɩ̀à jwəŋə tə
21 À culi á canfaran dɩan tə,
à ga culi á jə́rə́ nəfarʋ dɩan tə.
22 À vàrʋ́ calɩ jwəŋə* tə, də jwəŋə tə á nə sʋ̀rɩ́*, á pɩn nə,
fɩra ba nə jə.
À yáá tə̀lə́ də á nimarʋ jwəŋə* tə,
á nə fwa də nɩan tə nə jə nwɩɩ.
23 Á yágá á gwaran tə zizigu tə nə, à zɩan wa.
À ba á banan gwaran tə cʋga.
24 Á yágá, sə cɩ́gá cwəŋə pwin ka nan, ndə nabuliyii nɩ́á nə,
sə cɩ́gá ga pàlɩ̀ ndə nacwəŋə nə, ka nɩ́á nə ba kwe.
25 Yɩzərayɛlə lɩ̀à-ba, bɩna sapwɩlə tə, á nə yɩn kasɔɔ lanworu tə wa,
à pɩn á fwa jwəŋə, nə à yə̀ə́ zìlə́ wiən á pa nə naaa?
26 Sɩ́ʋ́n nə, á dàń tìə̀ á woŋwanʋ Sikutə, kʋ nə yɩ á pɩ̀ʋ́,
də á woŋwanʋ Kiyunə, kʋ nə yɩ á woŋwanʋ tə kacɩlacɔɔ,
á tətə nə fwa, á zɩn.
27 Yá à wá ja aba à va yongaʋ, Damasə kwa con.»
Ba-Yígúrə́-Jə-Tiu nə swɩ̀n kʋ nətʋ.
Ʋ yɩrɩ don nə yɩ Kwatara Yɩɩ.