Càn tə nə wá yí Samari tɩ̀án kana tə nə yɩ jɩjə tɩ̀án
4
1 Á cʋga sʋ̀ràn tə tə, á mʋ̀ Samari tɩ̀án kana-ba,á nə nuən ndə Baswan tɩ̀án nanii nə,
Samari paan tə yuu wa.
Á fɩfɩn zʋra,
yá á kəni labwana càn wa,
á ga swɩ̀n á bana con, á wʋ́:
«Á jana divɛn á bà, sə nə nyʋn!»
2 Yuu-Tiu Ba-Yígúrə́-Jə-Tiu dùə̀ də ʋ tətə, ʋ wʋ́:
«Kʋ yɩ cɩ́gá, à yɩ Yɩɩ tə, à nə yɩ parɩ!
Á nəŋə, máŋá don bɩ̀àn,
á dʋŋa nə wá tùrì aba tɩa, də buyuru yelə,
ba ga tùrì à bɩ̀á də gwalɩ, ndə filə nə.
3 Á dʋŋa wá twá bírə́ lulwərən, ba van aba ba lɩ,
ba pa á lìù mama va ʋ yáá mənəmənə.
Yá ba wá ja aba ba va,
ba dɩlɩ Ɛrəmon paan tə con.»
Ba-Yígúrə́-Jə-Tiu nii sʋgʋ nə.
Càn tə nə wá yí Yɩzərayɛlə lɩ̀à tə, ba nə ba Yɩɩ nə twá zəni yɩrɩ
4 Yɩzərayɛlə lɩ̀à-ba, á kənə dɩ̀àn,
á va Betɛlə Yɩɩ wúlú bwálɩ́ tə wa, á tʋn cʋna!
Á kənə dɩ̀àn, á kɛ̀ń á va Giləgalə Yɩɩ wúlú bwálɩ́ tə wa,
á kwɛn á tʋn cʋna, á súrí lá!
Á fwaga á jwəŋə jɩjʋ mama,
sə á ga pa á fugə nii nyiən batwa nii dɩɩn mama!
5 Á jana wiən tə nə jə sabwarɩ,
á ma fwa á jwii kənu jwəŋə* tə nə bɩrɩ, də á yə̀ə́ jwɩan, á sʋ̀rɩ́!
Á bòrə́ á bɩrɩ də, á pɩn zìlə́ wiən Ba-Yígúrə́-Jə-Tiu nə!
Cɩ́gá, mə kʋ nə, á mʋ̀ Yɩzərayɛlə lɩ̀à swə.
Yuu-Tiu Ba-Yígúrə́-Jə-Tiu nii sʋgʋ nə.
Càn tə nə wá yí zɩbanənyɩna tə
6 À mʋ̀ Ba-Yígúrə́-Jə-Tiu pɩn niən bà á tɩan tə mama wa,
à ga pa wodiu mùrì á dìì tə mama wa.
Yá də kʋ nətʋ mɛ, á wà pìí á bà à con.
À mʋ̀ Ba-Yígúrə́-Jə-Tiu nii sʋgʋ nə.
7 À pɩn dwà goŋə ka vìí,
də á kárɩ́ wiən tə yà ga cànɩ̀ batwa, sə tə ma bɩ.
À pɩn dwà nà tɩʋ don wa, ka ga yá kʋ don.
Kárá don nɩ dwà,
yá kárá tə nə wà dwà nɩ, wiən kʋ̀à.
8 Tɩan bələ, nə à yə̀ə́ batwa lɩ̀à tətəli,
ba va tɩʋ don, sə ba nyʋn nɩ́á,
yá ba nanyʋnɩ wà tɩ.
Yá də kʋ nətʋ mɛ, á wà pìí á bà à con.
À mʋ̀ Ba-Yígúrə́-Jə-Tiu nii sʋgʋ nə.
9 À dɩga mɩna yayɩran á mɩna tə nə,
à pa tə kʋ̀, nə à yə̀ə́ tə pʋ,
sə à ma kə càn á nə.
À pɩn jə̀rə̀n də́ á tɩ̀án kárɩ́ kapʋpʋ tə,
də á divɛn tɩ̀án kárɩ́ tə,
də á kapɩran tə, də á olivə* tɩ̀án tə.
Yá də kʋ nətʋ mɛ, á wà pìí á bà à con.
À mʋ̀ Ba-Yígúrə́-Jə-Tiu nii sʋgʋ nə.
10 À dɩga yayɩpwaran á nə,
ndə à nə dí yá à tʋn kʋ nətʋ, Ezwipətə nə.
À yá à pa, dʋŋa gʋ á balandʋra tə də kwatara sɩ̀ʋ́,
à ga yá à pa, ba ja á səsen, ba vìí.
À pɩn á kárɩ́ tə wa tɩga lwɩ́án dɩ̀ á mɩan.
Yá də kʋ nətʋ mɛ, á wà pìí á bà à con.
À mʋ̀ Ba-Yígúrə́-Jə-Tiu nii sʋgʋ nə.
11 À cʋ̀gʋ̀ aba mɩ́ámɩ́án,
ndə à nə dí yáá à cʋ̀gʋ̀ Sodɔmə də Gomɔrə tɩan tə nətʋ.
Yá á yɩn ndə məndaa nə,
ba nə twarɩ, ba lɩ mən wa.
Yá də kʋ nətʋ mɛ, á wà pìí á bà à con.
À mʋ̀ Ba-Yígúrə́-Jə-Tiu nii sʋgʋ nə.
12 Kʋ mʋ̀ yɩrɩ, Yɩzərayɛlə lɩ̀à-ba,
á wá na yoo tə, à nə wá ma tʋn aba!
Yá à nə wá tʋn yoo təntə á yɩra yɩrɩ,
á dàń tana á tɩ̀àn,
sə á də à mʋ̀, á Yɩɩ tə jəri duən!»
13 Cɩ́gá, ʋ mʋ̀ nə fwa pɛɛn, ʋ ga fwa vʋʋ də.
Yá ʋ mʋ̀ nə yàá pa ləzoni lwarɩ ʋ pubʋŋɩ.
Ʋ mʋ̀ nə yàá lwàń poni, ʋ pa kʋ jì yikunu.
Ʋ mʋ̀ nə vəli pɛɛn nədaran tə yuu, tɩa yuu wa.
Ʋ yɩrɩ nə yɩ Ba-Yígúrə́-Jə-Tiu, ʋ nə yɩ kwatara Yɩɩ.