BA-YIGURƏ-JƏ-TIU SWƖN Ʋ ZƖGA YƖZƏRAYƐLƏ LƖA NƏ
Yɩɩ wá pa ʋ lɩ̀à tə tún ba nii
3
1 Á mʋ̀ Yɩzərayɛlə lɩ̀à-ba,á cʋga sʋ̀ràn tə tə,
Ba-Yígúrə́-Jə-Tiu nə swɩ̀n, ʋ zɩga á nə.
Ʋ swɩ̀n tə ʋ zɩga á dwíí tə mama nə,
ʋ nə pɩn ba nan ba yá Ezwipətə lʋʋ nii tə!
2 Ʋ swɩ̀n, ʋ wʋ́:
«Á mʋ̀ cɩcɩ nə, à kúrí, lʋʋ dwíə́ tə mama wa.
Kʋ mʋ̀ nə pɩn, à wá pa á tún á nii,
yolwana tə mama yɩrɩ á nə tʋn.»
Yɩɩ nə pɩn nii, ʋ nii sʋ̀sʋ̀nʋ̀ wàrɩ̀ ʋ ba kʋ swɩ̀n
3 Lɩ̀à bələ yàá twá duən,
də ba nə wà dí yáá ba vʋrɩ kʋ nətʋ tə naaa?
4 Gəru yàá baa gaʋ wa,
də kʋ nə wà nàŋʋ́ nɩ naaa?
Gəbala yàá ŋʋ̀nɩ̀ ka yipaa bwálɩ́ nə,
də ka nə wà nàŋʋ́ jɩn naaa?
5 Zənbiə yàá tʋ zunjanʋ wa,
də kʋ nə tà won nə ka nɩ lá naaa?
Nyalɩ yàá fa, də kʋ nə wà won jɩn naaa?
6 Ba yàá wúrí kʋ̀ʋ̀ nabwanʋ tɩʋ wa,
də fən wà kʋ tɩ̀án zwɩ naaa?
Yolwan yàá tʋn tɩʋ wa,
də Ba-Yígúrə́-Jə-Tiu yəri kʋ wa yoo naaa?
7 Cɩ́gá mama, Yuu-Tiu Ba-Yígúrə́-Jə-Tiu ba yoo tʋŋa,
də ʋ nə wà dí yáá ʋ bɩrɩ ʋ pubʋŋa,
ʋ tʋ̀tʋ̀nà tə nə, ba nə yɩ ʋ nii sʋ̀sʋ̀nà.
8 Gəru nə báá, wàà nə fən ba janɩ?
Yuu-Tiu Ba-Yígúrə́-Jə-Tiu nə pɩn nii,
wàà nə wá vɩ, sə ʋ jon kʋ, ʋ swɩ̀n ʋ bɩrɩ?
Càn tə nə wá yí Samari tɩ̀án
9 Á bòrə́ Aswədɔdə tɩ̀án padii tə wa,
də Ezwipətə tɩ̀án padii tə wa,
á swɩ̀n, sə ba kun duən nə, Samari pɛɛn tə yuu wa.
Yá ba wá na tʋtʋnkʋkwɩnan tə,
də wʋlʋŋʋ tə nə dáá nətʋ, tɩʋ tə wa!
10 Yá á dàń nəŋə Ba-Yígúrə́-Jə-Tiu nii sʋgʋ nə.
Ʋ swɩ̀n, ʋ wʋ́:
«Samari tɩ̀án yəri ka tʋn yoo, ba pa kʋ twá cɩ́gá nə.
Ba nyɩ́n wiən tə, ba nə vɩrɩ lɩ̀à con,
ba sú ba padii nii.»
11 Kʋ mʋ̀ nə pɩn,
Á nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n á mʋ̀ Samari tɩ̀án con, ʋ wʋ́:
« Á dʋŋa wá pú lʋʋ nii tə ba kə.
Ba wá gwɛrɩ á dɩ̀àn dəkuu bwálá tə,
ba ga pɛ̀ á padii tə wa wiən tə.»
12 Nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n, ʋ wʋ́:
«À wá jon Yɩzərayɛlə lɩ̀à tə,
ba nə wulə Samari nə gɩganɩ,
ndə payɩrʋ nə yàá jon vànɩ́ nakoli bələ,
nə à yə̀ə́ kʋ zɩɩn kɩkaʋ, gəru nii wa nətʋ,
ba mʋ̀ lɩ̀à tə nə tígə́ gədərən yuu, ganpurə wa.»
13 Nəŋə Yuu-Tiu Ba-Yígúrə́-Jə-Tiu, ʋ nə yɩ kwatara Yɩɩ, nii sʋgʋ nə.
Ʋ swɩ̀n, ʋ wʋ́:
«Á cʋga sʋ̀ràn tə tə,
á ga swɩ̀n tə, Zwakɔbə dwíí tə con.
14 Dɩɩn tə, à nə wá kə Yɩzərayɛlə lɩ̀à càn wa, ba cʋna tə yɩrɩ,
à wá cʋ̀gʋ̀ ba jwəŋə bwálá tə, Betɛlə nə.
À wá kɛ́n tə nigwancɩan cələn tə nə yɩ ndə nyʋran nə, à lwá tɩa.
15 À wá mà ba waran máŋá dìì tə,
də ba tɩlʋŋʋ máŋá dìì tə mɛ, à lwá duən yuu.
À wá cʋ̀gʋ̀ ba padii tə, ba nə nàn də won,
kʋ nə yɩ ndə tuu yelə yɩra nə,
yá ba difaran tə mama wá jì dibwərən.»
Ba-Yígúrə́-Jə-Tiu nii sʋgʋ nə.