Càn tə nə wá yí Mʋabə tɩ̀án
2
1 Nəŋə nii tə, Ba-Yígúrə́-Jə-Tiu nə pɩn.Ʋ swɩ̀n, ʋ wʋ́:
«Mʋabə tɩ̀án tʋn yolwana batwa.
Tə yí banɩa də tətə, tə nə pɩn,
à bá kwɛ̀ càn tə, à nə wá kə ba nə.
Ba nə sʋ̀rɩ́ Edomə pɩ̀ʋ́ kurən tə,
ba pa tə də́, tə jì tʋnan yɩrɩ,
2 à wá dɩ mən Mʋabə lʋʋ nii tə nə,
yá tə wá də́ padii tə nə wulə Keriyɔtə nə.
Yá Mʋabə tɩ̀án wá tɩ bubwiə nəfarʋ wa.
Kʋ wá ya kʋ̀ʋ̀ cə̀rí, də nabwanan zizigu titəŋi wa.
3 À wá lɩ ba pɩ̀ʋ́ tə mɩɩ,
yá à wá gʋ ʋ də ʋ pàbɩ̀á tə mɛ.»
Ba-Yígúrə́-Jə-Tiu nə swɩ̀n kʋ nətʋ.
Càn tə nə wá yí Zwida payuu tə
4 Nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n, ʋ wʋ́:
«Zwida payuu tə lɩ̀à tʋn yolwana batwa.
Tə yí banɩa də tətə, tə nə pɩn,
à bá kwɛ̀ càn tə, à nə wá kə ba nə.
Cɩ́gá, ba vɩga à mʋ̀ Ba-Yígúrə́-Jə-Tiu nii tə.
Ba wà à nii yìə̀n tə nii zìlí.
Ba yá ba pa woŋwanan tə,
ba nyɩna-ba yà nə vwə ba tɩ̀àn tə nə, gɩgarɩ ba, tə dʋgʋ.
5 À wá dɩ mən Zwida payuu tə nə, yá tə wá də́ Zwerizalɛmə padii tə.»
Càn tə nə wá yí Yɩzərayɛlə payuu tə
6 Nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n, ʋ wʋ́:
«Yɩzərayɛlə payuu tə lɩ̀à tʋn yolwana batwa.
Tə yí banɩa də tətə, tə nə pɩn,
à bá kwɛ̀ càn tə, à nə wá kə ba nə.
Cɩ́gá, ba yàá yoli cɩ́gá tíú,
ʋ nə wàrɩ̀ ʋ jɩŋɩ ʋ ŋwɩ́n yɩrɩ,
ba ga yoli zʋrʋ, natɩra kwənə yɩrɩa.
7 Cɩ́gá, ba yàá nɩŋa yinənyɩna, ndə tɩa pùrú nə.
Ba yàá jon cɩ́gá labwana con.
Bìú də ʋ nyɩna mɛ pə̀ní kan nədʋ,
ba ma cʋ̀gà à yɩrɩ tə nə, kʋ nə yɩ parɩ.
8 Ba yàá larɩ gànàn tə, zʋra nə tún ba con talɩma,
ba pə̀ní tə wa, ba woŋwanan tə jwəŋə bwálá nə.
Yá ba yàá nywɩn divɛn tə,
ba nə dɩga bwaan lɩ̀à yuu, ba ma jon,
ba woŋwanan dìì tə wa.
9 Yá à mʋ̀ ga nə cʋ̀gʋ̀ Amɔrə dwíí tə,
ba yà nə dara ndə guŋu nə,
ba ga dà ndə tanyan dàʋ̀ nə.
À cʋ̀gʋ̀ ba dwíí tə mama mɩ́ámɩ́án.
10 Yá à mʋ̀ ga nə pɩn, á nan á yá Ezwipətə lʋʋ nii tə.
À ken aba cwəŋə nə, kasɔɔ lanworu tə wa, bɩna sapwɩlə,
sə à pa á jon Amɔrə dwíí lʋʋ nii tə, á tɩnɩ.
11 Kʋ kwa nə, à kúrí à nii sʋ̀sʋ̀nà, á bɩ̀á tə wa,
à ga kúrí lɩ̀à á balandʋra tə wa,
ba nə kàn nii, sə ba ya à cɩcɩ nyiən.
Kʋ tà nətʋ naaa, Yɩzərayɛlə lɩ̀à-ba?
À bwe aba!
Ba-Yígúrə́-Jə-Tiu nii sʋgʋ nə.
12 Yá á pɩn lɩ̀à tə nə kàn nii,
sə ba ya à cɩcɩ nyiən, nyʋn divɛn.
Yá á dùə̀ súú Yɩɩ nii sʋ̀sʋ̀nà tə nii nə,
sə ba dàn ká swɩ̀n Yɩɩ nii sʋgʋ.
13 Nəŋə, à mʋ̀ Ba-Yígúrə́-Jə-Tiu wá tɩtaga aba,
ndə səsen kòrù nə súə́ də mɩgugunə,
nə nɩŋɩ won, kʋ tɩtaga nətʋ.
14 Lìù tə, ʋ nɛɛ nə lɩŋa tɩa də tətə, bá wànɩ́ ʋ dəri ʋ jɛ́n.
Ladɩa də ma bá wànɩ́ ʋ bɩrɩ ʋ dɩ̀àn.
Yá kwatarʋ də bá wànɩ́ ʋ jon ʋ mɩɩ.
15 Catarʋ bá wànɩ́ ʋ ciŋə ʋ zɩgɩ,
lìù tə də, ʋ nɛɛ nə lɩŋa tɩa, bá wànɩ́ ʋ dəri ʋ jɛ́n,
yá səsədɩrʋ də bá wànɩ́ ʋ jon ʋ mɩɩ.
16 Kʋ dɩɩn tə nə,
kwatara tə wa wʋdanyiən wá dʋgʋ ʋ kwatarɩ zɩla,
ʋ ga dəri.»
Ba-Yígúrə́-Jə-Tiu nii sʋgʋ nə.