Amɔsə
CAN TƏ NƏ BƖAN YOO
1
1 Sʋ̀ràn tə tə yɩ Amɔsə, ʋ nə yɩ Tekʋa tɩ̀án vàná tíú don sʋ̀ràn. Tə yɩ Yɩzərayɛlə payuu tə yìə̀n, Yɩɩ nə bɩrɩ wá. Kʋ bɩna bələ kwa nə nə, tɩa tə vuvugu, lʋʋ nii təntə wa. Kʋ yɩn Zwida payuu tə pɩ̀ʋ́ Ozɩasə pàrɩ̀ tə máŋá wa. Kʋ máŋá təntə wa, də Zʋasə bìú Zwerobʋamə də nə yɩ Yɩzərayɛlə payuu tə pɩ̀ʋ́.2 Amɔsə swɩ̀n, ʋ wʋ́:
«Ba-Yígúrə́-Jə-Tiu zɩgɩ Siyon tɩʋ tə wa, ʋ báá.
Ʋ zɩgɩ Zwerizalɛmə nə, ʋ pa ba nì ʋ kori.
Yá payɩra vàná gaʋ cʋ̀gʋ̀,
Karəmɛlə paan tə yuu mama ga kʋ̀.»
Càn tə nə wá yí Yɩzərayɛlə payuu tə, də kʋ jənduən tə
Càn tə nə wá yí Siiri tɩ̀án
3 Nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n, ʋ wʋ́:
«Damasə tɩ̀án tʋn yolwana batwa.
Tə yí banɩa də tətə, tə nə pɩn,
à bá kwɛ̀ càn tə, à nə wá kə ba nə.
Ba tɩtaga Galadə nagwanaa lɩ̀à tə,
ndə ba nə mà mɩna də lugu màlɩ́.
4 À wá dɩ mən Siiri tɩ̀án pɛ̀gá sàń tə nə,
yá tə wá də́ pɩ̀ʋ́ Hazayɛlə, də pɩ̀ʋ́ Bɛn-Hadadə padiə tə.
5 À wá kɛ́n Damasə tɩʋ tə mimii borusɔɔ tə.
Yá à wá gʋ Avɛnə varaa lɩ̀à tə,
à ga gʋ lìù tə nə də́ pàrɩ̀ Bɛtə-Edɛnəb tɩʋ tə wa.
Yá ba wá ja Siiri tɩ̀án, ba va yongaʋ, Kirə nə.»
Ba-Yígúrə́-Jə-Tiu nə swɩ̀n kʋ nətʋ.
Càn tə nə wá yí Filisi tɩ̀án
6 Nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n, ʋ wʋ́:
«Gaza tɩ̀án tʋn yolwana batwa.
Tə yí banɩa də tətə, tə nə pɩn,
à bá kwɛ̀ càn tə, à nə wá kə ba nə.
Cɩ́gá, ba jɩn Yɩzərayɛlə tɩan duən ləzwənbɩa mama,
ba yoli Edomə tɩ̀án yuu wa.
7 À wá dɩ mən Gaza tɩʋ tə nə,
yá tə wá də́ kʋ padii tə.
8 À wá gʋ Aswədɔdə tɩ̀án pɩ̀ʋ́ tə,
à ga gʋ lìù tə nə də́ pàrɩ̀ tə, Aswəkelon tɩʋ tə wa.
À wá zɩgɩ Ekəron tɩ̀án nə,
yá à wá gʋ Filisi tɩ̀án tə gɩganɩ tə mama.»
Yuu-Tiu Ba-Yígúrə́-Jə-Tiu nə swɩ̀n kʋ nətʋ.
Càn tə nə wá yí Tirə tɩ̀án
9 Nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n, ʋ wʋ́:
«Tirə tɩ̀án tʋn yolwana batwa.
Tə yí banɩa də tətə, tə nə pɩn,
à bá kwɛ̀ càn tə, à nə wá kə ba nə.
Cɩ́gá, ba jon Yɩzərayɛlə tɩan duən ləzwənbɩa mama,
ba yoli Edomə tɩ̀án yuu wa.
Yá ba wà nimarʋ tə jələ,
kʋ yà nə wulə ba də Yɩzərayɛlə lɩ̀à pwə́rə́ wa.
10 À wá dɩ mən Tirə tɩʋ tə nə,
yá tə wá də́ kʋ padii tə.»
Càn tə nə wá yí Edomə tɩ̀án
11 Nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n, ʋ wʋ́:
«Edomə tɩ̀án tʋn yolwana batwa.
Tə yí banɩa də tətə, tə nə pɩn,
à bá kwɛ̀ càn tə, à nə wá kə ba nə.
Cɩ́gá, ba púə́ ba nubɩa, Yɩzərayɛlə lɩ̀à tə kwa,
ba dɩŋɩ də kwatara sɩ̀án, sə ba gʋ.
Ba wà ba yinəgə dəri mancɩn tətə.
Cɩ́gá, ba jə wʋgwɩʋ də Yɩzərayɛlə lɩ̀à tə,
kʋ pa ba lɩŋa zaŋa ba yuu wa wuuu, tə ba twɩ.
12 À wá dɩ mən ba tɩʋ tə nə, ba nə boŋə Teman,
yá tə wá də́ padii tə nə wulə Bɔsəra nə.»
Càn tə nə wá yí Amon dwíí tə
13 Nəŋə nii tə, Ba-Yígúrə́-Jə-Tiu nə pɩn.
Ʋ swɩ̀n, ʋ wʋ́:
«Amon dwíí tə tʋn yolwana batwa.
Tə yí banɩa də tətə, tə nə pɩn,
à bá kwɛ̀ càn tə, à nə wá kə ba nə.
Cɩ́gá, ba kàrɩ́ kapwe pwìí, Galadə nagwanaa tə wa,
sə ba ma wàlɩ̀ ba lʋʋ nii tə.
14 À wá sʋ̀rɩ́ mən Raba tɩʋ tə nə,
yá tə wá də́ kʋ padii tə.
Kʋ wá yà kʋ̀ʋ̀ cə̀rí titəŋi wa, catarɩ dɩɩn nə,
kùlì nəfarʋ titəŋi wa, dwavʋʋ nəfarʋ dɩɩn nə.
15 Yá dʋŋa wá ja ba pɩ̀ʋ́ tə, də ʋ pàbɩ̀á tə mɛ, ba va yongaʋ.»
Ba-Yígúrə́-Jə-Tiu nə swɩ̀n kʋ nətʋ.