Ba-Yígúrə́-Jə-Tiu dɩɩn tə bwə́lə́
2
1 Á wúrə́ nabwanʋ Siyon paan tə yuu wa,á maga cə̀rí Yɩɩ paan tə yuu wa, ka nə yɩ parɩ,
sə lʋʋ nii tə wa lɩ̀à tə mama ga vɩvaga!
Cɩ́gá, Ba-Yígúrə́-Jə-Tiu dɩɩn tə bɩ̀àn,
kʋ yí kʋ zwɛ̀.
2 Kʋ yɩ yikunu bərən dɩɩn,
fun də bakwan lələru dɩɩn.
Kayɩra tə bɩ̀àn, ndə tɩbɩlakʋnʋ nə,
kʋ nə bɩrɩ kʋ tɩ̀àn pɛɛn yuu wa.
Tə dáá, tə ga jə dɩ̀àn.
Tə yiri wà dí yáá tə ya lá,
yá tə yiri kʋ́ʋ̀ bá ya lá də mama,
máŋá də máŋá tə mama wa, ka nə bɩ̀àn.
3 Tə də́ won tə mama
nə wulə tə yáá con, ndə mən nə,
yá tə kwa con, kʋ yɩ ndə mənvwə nə dí bwálɩ́.
Də tə yà nə tə wà twi,
lʋʋ nii tə yà yɩ ndə Edɛnə tɩ̀án kárá nə,
yá tə túrí kwa nə, kʋ jìgə̀ digə,
bwálɩ́ kʋ nə cʋ̀gʋ̀ mɩ́ámɩ́án.
Won mama bá tə yáá nə jɛ́n!
4 Tə yɩ ndə səsen nə,
tə dəri ndə səsədɩra nə.
5 Tə faŋa pɛɛn tə yuu wa,
tə ga dwanɩ, ndə səsen kòrə̀n nə.
Tə də́ garan tə,
tə ga dwanɩ, ndə mənvwə nə.
Tə tɩɩn duən nə,
ndə kwatara púlí nə, kʋ nə jə dɩ̀àn,
kʋ ga kə kʋ sírí, sə kʋ ta kʋ̀ʋ̀.
6 Lalʋʋ vɩvaga tə yáá con,
ba mama yɛ́ɛ́ ga cʋ̀gʋ̀.
7 Tə dəri ndə kwatara babɩran nə,
tə faŋa biritaŋʋ tə galɩ, ndə kʋ̀ʋ̀ lɩ̀à nə.
Kʋ nədʋ mama tì kʋ cwəŋə mənəmənə, kʋ vələ,
kʋ ba ywəri kʋ yá kʋ cwəŋə nə.
8 Kʋ nədʋ mama ba kʋ don yugə,
kʋ nədʋ mama yɩ kʋ vəli kʋ cwəŋə wa.
Tə twá wiən tə wa, ba nə ma tɛ tə,
tə kɛ̀ń tə vəli tə yáá wuuu,
yá won mama wàrɩ̀ tə yáá nə kʋ cɩ̀.
9 Tə púə́ tɩʋ tə, tə kə,
tə dəri biritaŋʋ tə yuu wa,
tə dɩ̀ bə́rí, tə twá təkuri tə faŋa
tə zwɩ dìì wa, ndə ŋwɩna nə.
10 Tɩa vuvugu tə yáá con,
lanworu vɩvaga,
yɩcaʋ tə də cànà tə beri,
yá kacɩlacɛɛ tə kwɩ̀n tə poni nə.
11 Ba-Yígúrə́-Jə-Tiu baa kori,
ʋ kwatara púlí yáá con.
Ʋ kwatara púlí tə dáá zənzən,
lɩ̀à tə nə zìlí ʋ nii sʋ̀ràn tə jə dɩ̀àn.
Cɩ́gá, Ba-Yígúrə́-Jə-Tiu dɩɩn tə yɩ dɩɩn nəfarʋ,
kʋ ga jə fən zənzən!
Wàà nə wàá kʋ yáá nə ʋ zɩga?
Máŋá yí, sə Ba-Yígúrə́-Jə-Tiu lɩ̀à tə pìí ba bà ʋ con
12 Sɩ́ʋ́n nə, á kʋ́ʋ̀ pìrə́ á bà à con,
də á waa mama, də nivori,
də kwirə, də lúə́ pucʋnɩ gwaran!
Ba-Yígúrə́-Jə-Tiu nii sʋgʋ nə!
13 Á cɩra á bɩcanɩ,
á ga yá á gànàn nə,
á ga pìí á bà Ba-Yígúrə́-Jə-Tiu, á tíú Yɩɩ con.
Cɩ́gá, ʋ fwa pubwanʋ lɩ̀à yɩra,
ʋ dəri lɩ̀à yinəgə,
ʋ lɩŋa ba lala zaŋa,
ʋ yɩ wʋywanyiən* zənzən,
yá ʋ nə tanɩ sə ʋ tʋn yolwan,
ʋ yàá pìí ʋ lwàń pubʋŋa,
ʋ ba kʋ tʋŋa.
14 Wàà nə yə̀ə́ də ʋ nə bá lwàń pubʋŋa,
ʋ ga fwa zəni nə yɩra,
ʋ pa á wànɩ́ á ja zìlə́ wiən jwəŋə, də divɛn jwəŋə,
á bà á pa Ba-Yígúrə́-Jə-Tiu, á tíú Yɩɩ nə?
Nivori də ka lori Yɩɩ máŋá
15 Á wúrə́ nabwanʋ Siyon tɩʋ tə wa!
Á lɩa dɩɩn á vwa nii,
á ga bon lalʋʋ tə á kun duən nə,
sə á pa dun Yɩɩ nə!
16 Á kənə lalʋʋ tə duən yáá nə,
á pɩan ba kwɛn ba tɩ̀àn ba lɩ durən yìə̀n wa,
ba ga kun duən nə, ba pa dun Yɩɩ nə!
Á kənə nəkwɩna də bìsɩ́ná mɛ, duən yáá nə,
də bìsɩ̀nɩ́ də tətə, ba nə ŋʋ̀à ba ninə nyʋnɩ nə!
Kanbarɩ mɛ sə ʋ nan ʋ dìə̀ wa,
sə kan də nan ʋ gansili wa.
17 Yɩɩ joŋwana tə nə tʋŋa ba pɩn Ba-Yígúrə́-Jə-Tiu nə,
napakolu tə də joŋi bwálɩ́ tə pwə́rə́ wa kwíə́,
ba ga lòrì Ba-Yígúrə́-Jə-Tiu, ba wʋ́:
«Ba-Yígúrə́-Jə-Tiu, dəri n lalʋʋ tə yinəgə!
Dàn ká yá n pa cavɩra yí n lɩ̀à tə nə yɩ n tori,
sə ba jí dwíə́ nəkaran* tə mʋmʋn won,
kʋ nə wá pa ba bwe, ba wʋ́:
“Ba Yɩɩ tə wulə yə̀n nə?”»
Ba-Yígúrə́-Jə-Tiu le ʋ lalʋʋ tə
18 Ba-Yígúrə́-Jə-Tiu jə badoli zənzən, ʋ lalʋʋ tə yɩrɩ,
ʋ dəri ʋ lalʋʋ tə yinəgə.
19 Ba-Yígúrə́-Jə-Tiu le ʋ lalʋʋ tə, ʋ wʋ́:
«À kʋ́ʋ̀ wá pa aba dipɛn mɩna,
də divɛn nədʋn, də nʋga nədʋn, á də́ á sú,
yá à kʋ́ʋ̀ bá kə cavɩra á nə, lʋʋ níə́ tə wa.
20 À wá pa á jɩzən saparʋ con dʋŋʋ ya yiŋʋnɩ də aba,
à wá dɩŋa wá à kə tɩkʋrʋ wa,
kʋ nə cʋ̀gʋ̀ mɩ́ámɩ́án.
À wá dɩŋa ʋ yáá con kwatara,
à kə yɩɩ yipɩan con mʋʋ tə wa,
à dɩŋa ʋ kwa con kwatara,
à kə yɩɩ yizwɩa con mʋʋ tə wa,
yá ba dàń wá pʋ́, ba lwán dɩ̀ yɩɩ.
Cɩ́gá, ba tʋn yolwan nəfarʋ.
21 Tɩa, dàn ká pa fən ja mʋ́!
Ya pupwən wa, n ga jwɛ.
Cɩ́gá, à mʋ̀ Ba-Yígúrə́-Jə-Tiu tʋŋa yofaran.
22 Ganaŋa-ba, á dànà ká pa fən ja aba!
Cɩ́gá, vàná gaʋ tə, kasɔɔ lanworu wa, wá pìí kʋ twà.
Cɩ́gá, tɩ̀án tə wá zɩn lənə,
kapɩra də divɛn tɩ̀án wá pa tə jɩjə.
23 Yá á mʋ̀ Siyon tɩ̀án-ba, á yana pupwən wa,
á ga jwɛ, à mʋ̀ Ba-Yígúrə́-Jə-Tiu, á tíú Yɩɩ yɩrɩ.
Cɩ́gá, à pɩn aba síí dwà, ka nə wá jon aba,
à pɩn dwà cwí ka pɩn aba,
síí dwà, də talɩkwa dwà, ndə fuən tə nə.
24 Tʋa wá sú də mɩna,
kwara ga sú də divɛn nədʋn, də nʋga nədʋn.
25 À wá pìí à pa aba wiən tə jə̀rə̀n tə,
də cɩrɩbabʋnbwɛ tə, də kayɩra tə,
də zʋnzʋran tə nə dí, bɩna tə wa tə nə kɛ̀ń.
Tə yɩn ndə à kwatara púlí nəfarʋ nə,
à nə sugu à kə á nə.
26 Á wá də́ á sú,
yá á wá bʋ à mʋ̀ Ba-Yígúrə́-Jə-Tiu, á tíú Yɩɩ nə,
ʋ nə tʋn yogwaran ʋ pa aba.
Yá à lalʋʋ tə kʋ́ʋ̀ bá pìí
ba də́ cavɩra də mama.
27 Yá á dàń wá lwarɩ də
à wulə Yɩzərayɛlə lɩ̀à titəŋi wa,
yá à mʋ̀ nə yɩ Ba-Yígúrə́-Jə-Tiu, á tíú Yɩɩ tə,
à don tə̀lə́.
Yá à lalʋʋ tə kʋ́ʋ̀ ba pìí
ba də́ cavɩra də mama.»