Zowɛlə
1
1 Sʋ̀ràn tə Ba-Yígúrə́-Jə-Tiu nə swɩ̀n Petuwɛlə bìú Zowɛlə con.Kayɩra də dwakʋrɩ púə́ lʋʋ nii tə nə
2 Á cʋga, á mʋ̀ tɩʋ tɩ̀án-ba!
Á gunə á zɩɩn, á cʋgʋ zəni,
á mʋ̀ lɩ̀à tə mama nə wulə lʋʋ nii tə wa!
Kʋ tə yiri tə tʋn á máŋá tə wa,
nə à yə̀ə́ á nɩbara-ba máŋá wa naaa?
3 Á maŋa kʋ á bɩrɩ á bɩ̀á nə,
sə á bɩ̀á də man kʋ ba bɩrɩ ba bɩ̀á nə,
sə ba də bɩ̀á man kʋ ba bɩrɩ ba dwíí nə,
ba nə wá kə lʋʋ wa.
4 Kʋ tə zʋnzʋran nə dí tə ga lá,
jə̀rə̀n dí kʋ.
Kʋ tə jə̀rə̀n nə dí tə ga lá,
cɩrɩbabʋnbwɛ dí kʋ.
Kʋ tə cɩrɩbabʋnbwɛ nə dí tə ga lá,
kayɩra dí kʋ.
5 Á zaŋa dwiən nə, sanyʋra-ba, á kwiə!
Á mʋ̀ lɩ̀à tə mama nə nywɩn divɛn,
á maga bubwiə tantan,
ba nə lɩ divɛn tɩ̀án bɩ̀á nɩ́á, á níə́ wa yɩrɩ.
6 Cɩ́gá, kayɩra púə́ à lʋʋ nii tə nə,
ndə kwatara kapʋpʋ nə, ba nə jə dɩ̀àn.
Tə yələ yɩ ndə gəru yələ nə,
tə nipaa kurən ga yɩ ndə gəkan nipaa kurən nə.
7 Tə cʋ̀gʋ̀ à divɛn tɩ̀án kárá tə,
tə nyʋnyʋgʋ à kapɩra tə.
Tə pʋ̀rɩ́ tɩ̀án lənə tə mama mɩ́ámɩ́án,
tə ga sɛrɩ tə dabwərən tə lwá tɩa.
Tə dí divɛn tɩ̀án naywalan tə, tə pɩ̀rɩ̀.
8 Ŋʋŋwɩn ndə kacɩɩn nə,
ʋ nə ja ganlɔɔ, ʋ ma fwa ganvwiu,
sə ʋ ma kwi ʋ zandʋan barɩ nə!
9 Zìlə́ wiən jwəŋə, də divɛn jwəŋə nyʋan lá,
Ba-Yígúrə́-Jə-Tiu dìə̀ tə wa,
Yɩɩ joŋwana tə nə tʋŋa
ba pɩn Ba-Yígúrə́-Jə-Tiu nə,
wulə lúə́ pucʋnɩ wa.
10 Kárɩ́ tə mama cʋ̀gʋ̀,
tɩa tə wulə lúə́ pucʋnɩ wa.
Cɩ́gá, dipɛn mɩna tə cʋ̀gʋ̀,
divɛn nədʋn zwɛ̀,
nʋga nədʋn wʋa.
11 Vala jɩ̀àn gwarɩ,
lɩ̀à tə nə vàrɩ̀ divɛn tɩ̀án mà bubwiə,
dipɛn mɩna, də dipɛn mɩna yiri don tə yɩrɩ.
Cɩ́gá, ba kwɩn kárɩ́ wiən nə.
12 Divɛn tɩ̀ʋ́ dɩ̀àn zwɛ̀,
kapɩrʋ pɩ̀nɩ̀,
gərenadə tɩ̀ʋ́, də kʋra, də pɔmə tɩ̀ʋ́,
də gaʋ tɩ̀án tə mama kʋa.
Pupwən zwɛ̀ ləzoni con.
13 Yɩɩ joŋwana-ba, á zwɩa pucʋnɩ gànàn,
á ga dɩ lúə́ pucʋnɩ gwaran!
Á maga bubwiə,
á mʋ̀ lɩ̀à tə nə tʋŋa joŋi bwálɩ́ tə wa!
Á bɩ̀àn, á jʋ ganlwɛɛ gànàn wa,
á mʋ̀ lɩ̀à tə nə tʋŋa á pɩn à tíú Yɩɩ nə!
Cɩ́gá, zìlə́ wiən jwəŋə,
də divɛn jwəŋə kʋ́ʋ̀ tə̀lə́ á tíú Yɩɩ dìə̀ tə wa.
14 Á lɩa máŋá, á vwa á nii,
á boŋə lalʋʋ tə, sə á kun duən nə,
á pa nə dun.
Á kənə tɩʋ tɩ̀án tə,
də lʋʋ nii tə lɩ̀à tə mama duən yáá,
Ba-Yígúrə́-Jə-Tiu, á tíú Yɩɩ dìə̀ tə wa,
á ga bubwi á kə Ba-Yígúrə́-Jə-Tiu nə!
Ba-Yígúrə́-Jə-Tiu dɩɩn tə yoo
15 Aaa! Kʋ dɩɩn tə lwara tamʋ!
Cɩ́gá, Ba-Yígúrə́-Jə-Tiu dɩɩn tə bwə́lə́:
Kʋ bɩ̀àn ndə cʋcʋran nə,
Yɩɩ tə nə wulə tə mɛ yuu wa nə ken.
16 Wodiu nyʋan lá, nə yɩ́á tə yuu,
yá pupwən də jwɩa yɩrɩ kʋ́ʋ̀ ba za,
nə tíú Yɩɩ dìə̀ tə wa.
17 Woduri pʋa lwərə wa,
tikələ lwə, pulən zɩga wowee,
mɩna nə zwɛ̀ yɩrɩ.
18 Nə̀ń vàná nə kwi, tə sisigə nətʋ!
Vanfaran ywaŋa tɩa mama,
tə nə kʋ́ʋ̀ ba vàná gaʋ jə yɩrɩ.
Vanmɩnɩ də tətə na càn.
Yɩɩ nii sʋ̀sʋ̀nʋ̀ tə yɩjʋnɩ
19 N mʋ̀ Ba-Yígúrə́-Jə-Tiu nə nə,
à boŋə à kəni!
Cɩ́gá, mən dí vàná gaʋ tə
nə wulə kasɔɔ lanworu wa,
yá mənvwə sʋ̀rɩ́ gaʋ tɩ̀án tə mama.
20 Ganaŋa tə də sìrì tə kəni n con.
Cɩ́gá, nacorən tə kʋa,
yá mən dí vàná gaʋ tə
nə wulə kasɔɔ lanworu wa.