Efərayimə dwíí tə tɩan yoo
13
1 Efərayimə dwíí tə yà nə swɩ̀n,lɩ̀à mama yɩ ba vɩvaga:
Dwíí təntə yà nə jə dɩ̀àn Yɩzərayɛlə wa,
yá ba twá də Baalə* woŋwanʋ tə,
ba kə ba tɩ̀àn cʋna wa,
kʋ pa ba tɩ.
2 Yá də sɩ́ʋ́n mɛ,
ba tə yɩ ba tʋŋa lwanɩ ba súrí lá:
Ba nyɩan ba wárʋ́, ba ma fwa lugu woŋwanan,
woŋwanan tə nə yɩ ba tətə pubʋŋa fɩra wiən,
yá tə mama ga yɩ cɩnayara nə fwa.
Mə ba mʋ̀ yoo nə ba swɩ̀n, ba wʋ́:
«Lɩ̀à tə nə fwa ləzoni jwəŋə,
wàá dun nabii nə ba pɩn!»
3 Kʋ mʋ̀ nə pɩn ba wá ya ndə jɩjʋ fun nə,
ndə jɩjʋ nyʋ̀nʋ̀ nə, kʋ nə wulə kʋ warɩ,
ndə wopulə nə, vʋʋ nə jànɩ̀ kʋ lɩ tʋa wa,
ndə ŋwɩn nə, tə nə naŋa nətwən wa.
4 Yá à mʋ̀ yɩ Ba-Yígúrə́-Jə-Tiu,
à nə yɩ á tíú Yɩɩ,
kʋ nə zɩgɩ máŋá tə mama,
á nə yɩn Ezwipətə lʋʋ nii wa.
Á yəri Yɩɩ don, də kʋ nə tà à mʋ̀,
yá jonu don tə̀lə́, də kʋ nə tà à mʋ̀.
5 À mʋ̀ yəni aba kasɔɔ lanworu tə wa,
lʋʋ nii wa, kʋ nə yɩ tɩkʋrʋ.
6 Ba nə nɩ wodirən, ba yàá də́ ba sú.
Yá ba nə dí ba sú, ba bɩcan yàá sú də fwìə́.
Kʋ mʋ̀ nə pɩn ba ma swɛ̀ɛ́ à yoo.
7 À dàń jìgə̀ ndə gəru nə, à pa ba,
ndə gwiə nə cwəŋə yuu wa,
à pàlɩ̀ ba.
8 À wá ja ba ndə kənyenkuru nə,
ba nə jɩn kʋ bɩ̀á, ba ga yá kʋ.
À wá kàrɩ́ ba bɩcan tə lɔ́ɔ́ tə,
à ga van ba à vuri lá nə, ndə gəkan nə.
Ganaŋa wá jʋjwalɩ ba tɩga tə.
9 Yɩzərayɛlə lɩ̀à-ba,
yoo tə yɩrɩ à nə wá cʋ̀gʋ̀ aba,
kʋ mʋ̀ nə yɩ, á nə zɩgɩ à nə tə.
Cɩ́gá, á zɩgɩ à mʋ̀ lìù tə nə,
à yà nə wàá aba à joŋə.
10 Á pɩ̀ʋ́ tə wa yə̀n nə?
Ʋ bàá ʋ jon aba, á tɩan tə mama wa!
Á lɩ̀à tə nə bʋ̀rɩ̀ bʋra tə wa yə̀n nə?
Á yà swɩ̀n ba yoo à con, á wʋ́:
«Pa nəba pɩ̀ʋ́ də yáá tɩ̀án!»
11 À pɩn aba pɩ̀ʋ́ à lɩŋa tə wa,
yá à wá pìí à jon wá,
à lɩŋa tə wa, tə nə fʋrɩ.
12 À tún Efərayimə dwíí tə yolwan tə,
à tún ba lwanɩ tə vàn nə, à ma dànɩ̀ ba.
13 Càn wá yí ba, ndə kan nə,
ʋ pùə́ nə yɩ̀ sə ʋ lɩra.
Yá bìú tə dàń nə yɩ ləyigə:
ʋ naŋʋ máŋá yí,
yá ʋ ba sɛ̀ sə ʋ nan ʋ nuu pùə́ wa.
14 Kʋ mɛ sə à jon ba ciru jɩɩn wa naaa?
Kʋ mɛ sə à yə̀ ba à jon tɩan jɩɩn wa naaa?
Ooo tɩan, n yayɩpwaran tə wa yə̀n nə?
Sə n mʋ̀ ciru, n cʋcʋran tə wa yə̀n nə?
À kʋ́ʋ̀ bá dəri ba yinəgə!
15 Efərayimə dwíí tə nə swə
ba na ba tɩ̀àn ba doni ba nubɩa tə,
kʋ yáá yiri mama wa,
Yɩɩ yipɩan con vʋʋ wá bà.
Kʋ yɩ Ba-Yígúrə́-Jə-Tiu siŋu tə,
nə nyɩ́n kʋ zaŋa kasɔɔ lanworu wa.
Kʋ wá pa ba nabuliyii tə
nə bùlì kʋ naŋa tɩa wʋ,
kʋ ga pa ba vɩlɩ tə kʋ̀.
Kʋ mʋ̀ nə wá jàn ba jɩjə wiən tə,
də ba wiən tə mama nə jə funə.