Zwakɔbə dwíí tə yɩ cʋna lɩ̀à
12
1 Efərayimə dwíí tə ja kʋ̀nkʋ̀n ba kɩkarɩ nə,Yɩzərayɛlə dìə̀ tə ja gɩgɩra ba ma ba nə.
Yá Zwida dwíí tə mʋ̀ tə vəli də Yɩɩ,
ba twá Yɩɩ tə nə, ʋ nə yɩ parɩ, də pùə́ nədʋ.
2 Efərayimə dwíí tə fɩra won yɩ ndə vʋʋ nə,
ba dəri ba pwí yɩɩ yipɩan con vʋʋa kwa,
dɩɩn mama wuuu.
Ba kʋnɩ kʋ̀nkʋ̀n,
ba ga vɩrɩ lɩ̀à wiən ba súrí lá.
Ba tún nimarʋ də Asiiri tɩ̀án,
ba ga pɩn nʋga lanpo Ezwipətə tɩ̀án nə.
3 Ba-Yígúrə́-Jə-Tiu swɩ̀n ʋ zɩga Zwida lʋʋ lɩ̀à də nə.
Ʋ wá bʋ̀rɩ̀ ʋ zɩgɩ Zwakɔbə dwíí tə nə, ba tʋtʋnɛɛ tə yɩrɩ,
yá ʋ wá ŋwɩ́n tə ŋwɩ́rán ʋ pa ba.
4 Zwakɔbə jɩn ʋ nubiu tə natəli nə,
də ba tə wulə ba nuu pùə́ wa,
yá máŋá tə ʋ nə jìgə̀ bɛɛ, ʋ jan də Yɩɩ.
5 Ʋ jan də malɩka, ʋ də́ dɩ̀àn.
Ʋ kwi, ʋ ga lòrì ka pwəpwə,
sə ka fwa zəni ʋ yɩra.
Betɛlə nə nə Zwakɔbə jəri Yɩɩ,
yá mə lá nə Yɩɩ swɩ̀n də nəba.
6 Ba-Yígúrə́-Jə-Tiu yɩ kwatara* Yɩɩ,
ʋ yɩrɩ nə yɩ Ba-Yígúrə́-Jə-Tiu,
ba nə mɛ sə ba ma bon ba kə ʋ nə.
7 Yá á mʋ̀ mɛ sə á pìí á bà á tíú Yɩɩ con.
Á yana pùə́ nədʋ tɩ̀án,
á ga twá cɩ́gá nə, ndə kʋ nə mɛ nətʋ.
Á jana á tíú Yɩɩ dɩ̀àn máŋá mama wuuu.
8 Kanaan lʋʋ lɩ̀à tə jə gɩgɩra səkəri ba jɩɩn wa,
ba swə gɩgɩra.
9 Efərayimə dwíí tə swɩ̀n, ba wʋ́:
«Cɩ́gá mama, à jìgə̀ jɩjə tíú,
à tún jɩjə à pa à tɩ̀àn nə.
À jɩjə wiən tə mama yɩ à tʋn à na,
gɩgɩra won nədʋ tətə tə̀lə́ tə wa,
kʋ nə yɩ lwanɩ.»
10 Yá à mʋ̀ yɩ Ba-Yígúrə́-Jə-Tiu,
à nə yɩ á tíú Yɩɩ,
kʋ nə zɩgɩ máŋá tə mama,
á nə yɩn Ezwipətə lʋʋ nii wa.
À kʋ́ʋ̀ wá pa á ya gansilə də̀ń,
ndə cànɩ̀ diŋəb máŋá tə wa.
11 À swɩ̀n Yɩɩ nii sʋ̀sʋ̀nà* tə con,
à pɩn ba nɩʋn súrí,
yá à twá də Yɩɩ nii sʋ̀sʋ̀nà tə,
à ma swɩ̀n zwansɩsarɩ.
12 Galadə tɩ̀án nə yɩ yolwafwana
cɩ́gá cɩ́gá tə yɩrɩ, ba jìgə̀ tʋtʋ.
Ba gwɩ nɩan ba ma fwa jwəŋə Giləgalə nə,
yá ba jwəŋə bwálá tə wá jì ndə kapana púlə́ nə,
kárɩ́ wa, ba nə vàrɩ̀.
13 Zwakɔbə dəri ʋ va Aramə kasɔɔ tə wa,
yá lá nə, Yɩzərayɛləc tʋn kan yɩrɩ,
ʋ taa kan yɩrɩ, ʋ jì nayɩrʋ, ʋ ywàŋá vàná yuu.
14 Yá kʋ twá də Yɩɩ nii sʋ̀sʋ̀nʋ̀,
Ba-Yígúrə́-Jə-Tiu ma lɩ Yɩzərayɛlə lɩ̀à
Ezwipətə lʋʋ nii tə wa,
yá kʋ twá də Yɩɩ nii sʋ̀sʋ̀nʋ̀,
Ba-Yígúrə́-Jə-Tiu ma ywàń Yɩzərayɛlə lɩ̀à yuu.
15 Efərayimə dwíí tə cʋ̀gʋ̀ Ba-Yígúrə́-Jə-Tiu pùə́ nə zənzən:
Yá ba Yuu-Tiu tə wá pa ba yolwan tə
yoo pìí kʋ tʋ ba tətə yuu wa.
Ʋ wá ŋwɩ́n ba cʋna tə ŋwɩ́rán ba tətə yɩra.