Yɩɩ sonu nəfarʋ tə yoo
11
1 Yɩzərayɛlə dwíí tə də̀ń laŋʋ wa, à sóní ba ndə à bìú nə,
yá à bon à bìú à lɩ Ezwipətə lʋʋ nii wa.
2 Yá ba pwɛ̀ ba tɩ̀àn ba kə yiŋʋnɩ
də lɩ̀à tə nə boŋə ba.
Ba fwa jwəŋə ba pa Baalə* woŋwanan nə,
ba ga sʋ̀rɩ́ wusinə ba pa woŋwanan nə,
ba nə sə̀.
3 À mʋ̀ ga nə jɩn Efərayimə dwíí tə jɩɩn nə,
à ma kwè ba vəlu,
yá ba wà jwɩan yəni,
sə ba lwarɩ də à ywàń ba yuu.
4 À zuri à yɩra à van ba də pubwanʋ ŋoni,
à van ba də sonu banzala.
À yɩn ndə lìù nə, à nə zɩ̀n ba bɩan daʋ,
à pɩn ba sìí, à ga pɩn ba wodiu ba də́.
5 Yɩzərayɛlə lɩ̀à bá pìí ba va Ezwipətə lʋʋ nii wa,
yá kʋ dàń nə yɩ Asiiri tɩ̀án
nə wá də́ pàrɩ̀ ba yuu wa,
ba nə vɩga sə ba pìí
ba bà à mʋ̀ Ba-Yígúrə́-Jə-Tiu con yɩrɩ.
6 Kwatara sɩ̀ʋ́ wá tʋ ba tɩan tə wa,
kʋ wá kɛ́n ba mimien bwə̀rə̀n tə,
kʋ zʋ kʋ də́ tɩan tə wa lɩ̀à tə,
ba pubʋnkʋkwɩnan tə yɩrɩ ba nə tanɩ.
7 À lɩ̀à tə tʋŋa pwìí bələ yìə̀n à yɩra.
Ba boŋə ba, sə ba viviri ba yáá
ba kə à mʋ̀ Baan Yɩɩ con,
yá ba lìù mama ba yɩɩ nə zaŋa.
8 Bɛ̀ɛ̀ nə à wá ma fwa mʋ́, Efərayimə dwíí?
À wàá aba à janɩ à pɩn á dʋŋa nə naaa,
Yɩzərayɛlə lɩ̀à-ba?
Kʋ mɛ sə à tʋn kʋ tə à nə tʋn
Adəma tɩʋ tə yɩra, á də yɩra naaa?
Kʋ mɛ sə à pa á də jì ndə Seboyimə tɩʋ tə nə naaa?a
À pùə́ cʋ̀gʋ̀ zənzən,
yá à ga dəri ba yinəgə də zənzən.
9 À bá twá à lɩŋa tə nə, tə nə fʋrɩ, à ma tʋn,
à bá pìí à bà, à cʋ̀gʋ̀ Efərayimə dwíí tə.
Cɩ́gá, à mʋ̀ yɩ Yɩɩ, à tà ləzwənə,
à yɩ parɩ*, á titəŋi wa,
à bá bà də lɩŋa.
10 Ba wá twá Ba-Yígúrə́-Jə-Tiu nə,
ʋ ga wá baa ndə gəru nə.
Cɩ́gá, ʋ wá baa,
yá ʋ bɩ̀á wá nan mʋʋ vàn con,
ba dəri ba bà də ba vɩvaga.
11 Ba wá dəri ba nan Ezwipətə lʋʋ nii wa,
ba bà, də ba vɩvɩga ndə zuŋə nə,
ba ga dəri ba nan Asiiri lʋʋ nii wa, ba bà,
də ba vɩvɩga ndə gunpwənə nə.
Yá à dàń wá pa ba ya ba dìì tə wa.
Ba-Yígúrə́-Jə-Tiu nii sʋgʋ nə!