Yɩzərayɛlə payuu tə tʋrɩ yoo
10
1 Yɩzərayɛlə lɩ̀à yà yɩ ndə divɛn tɩ̀ʋ́ nə,kʋ nə yàgà kʋ jon tɩa, kʋ ga ləni zəni.
Yá ba lənə tə nə pùlì tə súrí lá zənzən nətʋ,
mə nətʋ nə ba lwə̀ joŋi bwálá kapʋpʋ də.
Ba lʋʋ nii tə zəni nə súrí nətʋ,
mə nətʋ nə ba nànɩ̀ culu kapana* tə də.
2 Ba yɩ pwìí bələ tɩ̀án,
yá sɩ́ʋ́n nə, ba dàń wá na kʋ nətʋ tə ŋwɩ́rán.
Ba-Yígúrə́-Jə-Tiu wá yigu ba jwəŋə bwálá tə ʋ dɩ,
ʋ ga cʋ̀gʋ̀ ba culu kapana tə.
3 Yá sɩ́ʋ́n nə, ba dàń swɩ̀n ba wʋ́:
«Nə ba pɩ̀ʋ́ jə,
nə nə wà Ba-Yígúrə́-Jə-Tiu fən dəri yɩrɩ.
Yá bɛ̀ɛ̀ nə pɩ̀ʋ́ wàá ʋ fwa ʋ pɩn nəba?»
4 Ba swɩ̀n sʋvɛɛ,
də ba dwì kʋ̀nkʋ̀n duri,
ba ma túŋə́ nimarʋ.
Yá yoo tə nə twa cɩ́gá nə,
ndə kʋ nə mɛ nətʋ, yɩ ndə gaʋ nə,
kʋ nə jə cwan,
kárɩ́ wa, ba nə vàrɩ̀ ba tún fwee.
5 Samari tɩ̀án vɩvaga,
Bɛtə-Avɛnə nacɩan nyɩnyɩga tə yɩrɩ.
Cɩ́gá, Samari lalʋʋ tə wulə lúə́ pucʋnɩ wa,
nabiə nyɩnyɩga tə yɩrɩ,
yá ka joŋwana tə nə tʋŋa ba pɩn ka,
kwi ba sisigə,
dʋŋa nə ja ka dun tə ba va yongaʋ,
ba ga yá ba yɩrɩ.
6 Kʋ mʋ̀ nabiə nyɩnyɩga woŋwanʋ təntə də,
ba wá ja kʋ ba va Asiri,
ba ma də́ zìlə́ pɩ̀ʋ́ nəfarʋ tə yuu wa.
Efərayimə dwíí lɩ̀à tə wá də́ cavɩra,
yá cavɩra wá ja Yɩzərayɛlə lɩ̀à,
ba pubʋnkʋkwɩnan tə yɩrɩ.
7 Samari cʋ̀gʋ̀, kʋ pɩ̀ʋ́ tə pàrɩ̀ zwɛ̀,
ndə pùń nə, nɩ́á yuu wa.
8 Culu dədwələn tə
Yɩzərayɛlə lɩ̀à nə tʋn cʋna tə yuu wa,
Bɛtə-Avɛnə nə, wá cʋ̀gʋ̀.
Səni də gəlu wá nan
ba jwəŋə bwálá tə yuu wa.
Ba wá swɩ̀n pɛɛn con, ba wʋ́:
«Á pwíə́ nə yuu nə!»
Ba ga swɩ̀n dədwələn con, ba wʋ́:
«Á twɩa nə yuu nə!»a
Yɩzərayɛlə lɩ̀à wá ca kʋ tə ba nə dùə̀
9 Kʋ nə zɩgɩ yìə̀n tə nə tʋn Gibeyab nə máŋá wa,
Yɩzərayɛlə lɩ̀à tʋn cʋna!
Ba wà lwàń, ba tə wulə tə wa!
Yá kʋ wà mɛ sə kʋ̀ʋ̀ tʋ ba wa, Gibeya nə,
kʋ cʋ̀gʋ̀ lɩ̀à tə nə tʋŋa cavɩyiən naaa?
10 À swə sə à pá ba à kə cwəŋə wa.
Yá dwíə́ wá kə nimarʋ, ba zɩgɩ ba nə,
ba yolwana dəkurən bələ tə yɩrɩ.
11 Efərayimə yɩ ndə nacɩɩn nə,
ba nə ma tʋŋa,
kʋ ga swə mɩna mà.
Yá à mʋ̀ ken bɩan daʋ
kʋ bɩan nəzəŋu tə yuu wa.
À wá kə nɩan bɩan daʋ
Efərayimə dwíí tə pàrà wa.
À wá pa Zwida dwíí tə gwìń tɩa tə,
à ga pa Zwakɔbə dìə̀ tə mà tɩran kukulə tə ba lwa.
12 Á mʋ̀ dwiə cɩ́gá cwəŋə wodwii,
á pa á tɩ̀àn nə,
yá á wá ca sonu lənə!
Á zaga kárá nədʋn!
Máŋá yí sə á twarɩ Ba-Yígúrə́-Jə-Tiu,
kʋ ja va kʋ yí máŋá tə, ʋ nə wá bà,
ʋ pa cɩ́gá cwəŋə bʋ́rɩ́ aba.
13 Á vàrɩ̀ wʋlʋŋʋ,
á cə lwanɩ,
yá á dí gɩgɩra ləni.
Cɩ́gá, á jɩn á tɩntɩan dɩ̀àn,
á ken waa á kwatara babɩran tə nə.
14 Zəzəgu wá zàn á lalʋʋ tə titəŋi wa,
yá á dɩ̀àn dəkuu bwálá tə mama wá cʋ̀gʋ̀,
ndə pɩ̀ʋ́ Swaləman nə cʋ̀gʋ̀ Bɛtə-Arəbɛlə nətʋ,
kʋ̀ʋ̀ tə zaŋʋ dɩɩn nə,
ba nə tɩtaga ninə ba bɩ̀á yuu wa.
15 Mə yoo nə Betɛlə nə wá van kʋ kə á nə,
á wʋlʋŋʋ jalɩʋ tə yɩrɩ.
Tɩbɩlakʋnʋ wa,
Yɩzərayɛlə pɩ̀ʋ́ tə pàrɩ̀ wá zwɛ̀.