Yɩɩ lɩ̀à tə wá kwɩ̀n mɩ́ámɩ́án
9
1 Yɩzərayɛlə lɩ̀à-ba, á dànà ká fwa pupwən,á ja lɛ tɩa nə, ndə dwíə́ tə duən nə.
Cɩ́gá, á vɩga á tíú Yɩɩ tə à dʋgʋ,
á ga pìí á cwàrɩ̀ də yɩa duən,
yá á sóní ka jon kʋ nətʋ tə ŋwɩ́rán,
mɩna twɛɛ tə mama wa!
2 Mɩna tə ba nə mà tʋa wa,
də divɛn tɩ̀án bɩ̀á tə ba nə nɩŋɩ gwàlʋ́ wa, bá yí ba,
divɛn nədʋn bá sú ba yii.
3 Ba kʋ́ʋ̀ bá ya Ba-Yígúrə́-Jə-Tiu lʋʋ nii tə wa.
Efərayimə dwíí tə wá pìí ba va Ezwipətə,
yá ba wá də́ durən wodirən Asiiri lʋʋ nii wa.
4 Ba kʋ́ʋ̀ bá twɛ́n divɛn jwəŋə,
ba pa Ba-Yígúrə́-Jə-Tiu nə,
ba ga kʋ́ʋ̀ bá wànɩ́ ba fwa jwəŋə,
tə nə jə fɩra, ba pa wá.
Ba wodiu wá ya ndə lúə́ wodiu nə,
lɩ̀à tə mama nə wá də́ kʋ, wá jì durən lɩ̀à.
Cɩ́gá, ba wodiu yɩ ba wá də́,
ba kə ba pùə́ wa,
kʋ bá zʋ Ba-Yígúrə́-Jə-Tiu dìə̀ tə wa.
5 Bɛ̀ɛ̀ nə á wá fwa jə́rə́ dɩɩn tə nə,
Ba-Yígúrə́-Jə-Tiu cànà dɩɩn tə nə?
6 Cɩ́gá, nə̀ń ba nə ba dəri cʋcʋran tə yáá nə,
Ezwipətə lʋʋ nii tə wá jon ba,
kʋ kə duən yáá nə,
yá Mɛnfisə tɩʋ tə nə wá ya ba libəri.
Səni wá pú ba wárʋ́ tə nə jə funə yuu nə,
casʋran ga nan tə jon ba gansilə.
7 Máŋá yí, sə Yɩɩ zɩgɩ ba nə,
ba tʋtʋnɛɛ tə ŋwɩ́rán máŋá yí:
Yɩzərayɛlə lɩ̀à mɛ sə ba yəni kʋ nətʋ tə!
Yɩɩ nii sʋ̀sʋ̀nʋ̀ tə jìgə̀ nyɩnyaŋʋ,
lìù tə nə jə Yɩɩ Siŋu tə swɩ̀n sʋvɛɛ,
á cʋna tə nə dáá zənzən,
yá á ga culi wá yɩrɩ.
8 Lìù tə nə ywàŋá Efərayimə dwíí tə yuu,
Yɩɩ nii sʋ̀sʋ̀nʋ̀ tə wulə də à tíú Yɩɩ tə.
Ba kəni zunjanʋ ʋ coŋi mama yuu,
yá ba zɩga ʋ nə, ʋ Yɩɩ tə dìə̀ tə də tətə wa.
9 Ba tʋa yokʋkwɩnan fwaŋʋ wa zənzən,
ndə ba nə tʋn nətʋ fuən nə, Gibeya nə.
Ba-Yígúrə́-Jə-Tiu wá lìí ba yolwan tə yoo,
yá ʋ wá zɩgɩ ba nə, ba lwanɩ tə yɩrɩ.
Yɩzərayɛlə lɩ̀à cʋ̀gʋ̀ Ba-Yígúrə́-Jə-Tiu pùə́ nə
10 À nɩ Yɩzərayɛlə lɩ̀à,
ndə divɛn tɩ̀án lənə nə, kasɔɔ lanworu wa,
à nɩ á nɩbara-ba,
ndə təntən kapɩrɩ nə, kapɩrʋ yuu wa.
Yá ba nə twi Baalə-Pewɔrəa,
ba tì ba tɩ̀àn ba pa kʋ Wolwan tə nə,
yá ba də dàń jìgə̀ ləzwənlwana,
ndə ba fɩra won təntə nə.
11 Efərayimə dwíí tə dun tə wá piri
kʋ vìí, ndə zuŋə nə.
Lɩrʋ kʋ́ʋ̀ bá ya lá,
pùə́ janʋ kʋ́ʋ̀ bá ya lá,
pùə́ zwɩʋ də ma kʋ́ʋ̀ bá ya lá.
12 Ba nə kʋ̀nɩ̀ ba bisɩmabarɩ,
à wá pa ba kwɩ̀n ba nə,
də ba tə wà bara jì.
Yá dàń nə̀ń lɛɛ nə wá yí ba nətʋ,
máŋá tə wa, à nə wá kɛ̀ń, à ga yá ba!
13 Fuən nə, à yà na Efərayimə dwíí tə
ndə kʋra tɩ̀án nə, ba nə cwɛn nɩ́á nii nə.
Yá Efərayimə dwíí tə wá ja ba bɩ̀á,
ba nan ba kə lagʋrʋ jɩɩn wa.
14 Pa ba, Ba-Yígúrə́-Jə-Tiu!...
Bɛ̀ɛ̀ nə n wá pa ba?...
Pa ba lɩra tə nə càrɩ̀,
də yɩla tə nə ba yɩlɩ nɩ́á jə!
15 Ba bɩrɩ ba wʋlʋŋʋ tə
nə yɩ nətʋ mama, Giləgalə nə,
yá mə lá nə, à waa nan ba.
À wá dɩŋa ba à lɩ à dìə̀ tə wa,
ba tʋtʋnɛɛ tə nə lwara yɩrɩ.
À kʋ́ʋ̀ bá sóní ba,
ba yáá tɩ̀án tə mama yɩ zɩbanənyɩna.
16 Mà yí Efərayimə dwíí tə,
ba dəkuu kʋa,
ba kʋ́ʋ̀ ba zɩn lənə.
Yá ba nə swə ba lɩra bɩ̀á də,
à wá pa ba kwíə́ də̀ń bìú tə, ba nə swə tɩ.
17 À tíú Yɩɩ wá vɩ ba ʋ dʋgʋ,
ba nə wà ʋ sʋgʋ cʋgʋ yɩrɩ,
yá ba wá twá lá ba ywan, dwíə́ nəkaran* tə wa.