Lìù tə nə dùə̀ vʋʋ wá ca dwavʋʋ
8
1 Kənə nabwanʋ á nii nə!Lɛɛ twɩ Ba-Yígúrə́-Jə-Tiu dìə̀ tə yuu wa,
ndə zənpuu nə,
ba nə cʋ̀gʋ̀ à nimarʋ tə,
ba ga vɩ sə ba twá à nii yìə̀n tə nə yɩrɩ.
2 Ba wá bubwi ba kə à nə, ba swɩ̀n, ba wʋ́:
«À tíú Yɩɩ, à tíú Yɩɩ, nə mʋ̀ Yɩzərayɛlə lɩ̀à yə̀ə́ mʋ́!»
3 Yɩzərayɛlə lɩ̀à vɩga kʋ tə nə ziən ba dʋgʋ,
kʋ mʋ̀ yɩrɩ, dʋŋʋ wá pú ba kwa, ʋ dɩŋa.
4 Ba tún pɛ̀gá, yá à wà ba nii pɩn,
ba tún yáá tɩ̀án, yá à yəri kʋ yoo.
Ba nyɩan ba wárʋ́ də ba sɩ́án,
ba ma fwa woŋwanan,
yá tə mʋ̀ nə wá cʋ̀gʋ̀ ba mɩ́ámɩ́án.
5 Samari tɩ̀án-ba, à mʋ̀ Ba-Yígúrə́-Jə-Tiu
vɩga á nabiəa tə!
À lɩŋa kwé ba yuu wa ndə mən nə.
Máŋá kwà wa nə ba wá wànɩ́
ba cɩ̀ ba tɩ̀àn nə də durən wiən?
6 Cɩ́gá, ka yɩ ka nan Yɩzərayɛlə,
cɩnayarʋ nə fwa ka, ka tà yɩɩ.
Kʋ mʋ̀ yɩrɩ, Samari tɩ̀án nabiə tə wá nyʋnyʋgʋ.
7 Ba nə dùə̀ vʋʋ tə yɩrɩ,
ba wá ca dwavʋʋ.
Mɩna yun nə ba mɩbɩa jə,
mun wá nan yə̀n nə?
Yá tə nə swə tə zɩn bɩ̀á də,
dʋŋa nə wá də́ tə.
8 Dwíə́ nəkaran* tə lìrì Yɩzərayɛlə lɩ̀à tə!
Ba dàń yɩ ba wulə dwíə́ nəkaran tə wa,
ndə won nə, kʋ fɩra nə kʋ́ʋ̀ ba lìù jə.
9 Cɩ́gá, ba vəli ba pɩ̀à sáŋʋ́ Asiiri lʋʋ nii wa.
Gaʋ bɩ̀nà yɩ ka yàá zɩgɩ ka cɩcɩ,
yá Efərayimə dwíí tə mʋ̀ ŋwɩ́n bwàlá kwənə.
10 Ba nə swə ba ŋwɩ́n kwənə dwíə́ nəkaran tə wa,
sɩ́ʋ́n nə, à tə wá ja ba à pìí à bà duən yáá,
yá máŋá mancɩn wa, ba wá də́ càn
pàbɩ̀á pɩ̀ʋ́ tə vàn də̀ń nə.
11 Efərayimə dwíí tə lwə̀ jwəŋə bwálá kapʋpʋ,
sə ba ma kwɛn cʋna ba lɩ,
yá jwəŋə bwálá təntə pìí tə jì won,
ba nə twá kʋ nə, ba ma tʋŋa cʋna.
12 À nə swə à pʋ́pʋ́nɩ́ à nii yìə̀n* tə
nə yɩ nətʋ tə mama, à pa ba,
ba tə wá jələ tə ndə won nə, ba nə yəri.
13 Ba gwɩ vàná ba ma fwa jwəŋə,
yá ba də́ tə nàŋʋ́:
Ba-Yígúrə́-Jə-Tiu ba tə joŋə.
Sɩ́ʋ́n nə, Ba-Yígúrə́-Jə-Tiu dàń bʋŋa
ba yolwana tə yoo,
yá ʋ wá zɩgɩ ba nə, ba lwanɩ tə yɩrɩ,
yá ba wa pìí ba va Ezwipətə lʋʋ nii.
14 Yɩzərayɛlə lɩ̀à swɛ̀ɛ́ lìù tə nə fwa ba,
yá ba lwə̀ padii.
Zwida lʋʋ lɩ̀à də lwə̀ tɩan kapʋpʋ,
ba kɩkarɩ də biritaŋan.
Yá à wá pa mən tʋ ba tɩan tə wa,
tə də́ ba padii tə.