Cʋcʋran tə nə bɩ̀àn Yɩzərayɛlə lɩ̀à yuu wa
7
1 Máŋá tə à nə pɩ̀à sə à ywarɩ Yɩzərayɛlə lɩ̀à,à pa ba na yazurə,
Efərayimə dwíí tə yolwan tə,
də Samari tɩ̀án tʋtʋnkʋkwɩnan tə nyɩn tə tɩ̀àn.
Cɩ́gá, ba tʋn gɩgɩra,
ŋwɩna kɛ́n dìì,
ŋwɩna tə nə gwɩ lɩ̀à vɩrɩ lɩ̀à kàrá wa.
2 Ba ba bʋŋa ba waa con,
də à lìí ba wʋlʋŋʋ tʋ̀tʋ̀nán tə mama yoo.
Sɩ́ʋ́n nə, ba tʋtʋnɛɛ tə dàń kɩkarɩ ba,
tə wulə à yáá con.
3 Ba poli pɩ̀ʋ́ pùə́ də ba wʋlʋŋʋ tə,
ba ga poli yáá tɩ̀án pùə́ də ba gɩgɩra tə.
4 Ba mama yɩ bacwaran,
ba yɩ ndə kurisaʋ nə, dipɛn wòrú nə lɩŋɩ.
Ʋ yá, ʋ kʋ́ʋ̀ ba mən kwɛn ʋ kəni lá,
kʋ nə zɩgɩ ʋ nə bùə̀ dipɛn mun tə ʋ zwɛ̀ kwa nə,
kʋ va kʋ yí máŋá tə, dipɛn mun tə nə zàn.
5 Nə pɩ̀ʋ́ tə cànà diŋə dɩɩn nə,
yáá tɩ̀án tə yàá jì ndə yayɩŋa nə,
sana nə bʋbʋnɩ ba yɩrɩ.
Pɩ̀ʋ́ tə larɩ ʋ jɩɩn bɩyɩrɩ də́rə́ con.
6 Ba jə yawala,
ba ma tʋŋa ba gɩgɩrɩ yìə̀n tə,
də ba waa mama, ndə dipɛn kurisaʋ nə.
Tɩtɩn tə mama, ba dipɛn wòrú tə yàá dwɛ̀,
yá jɩjʋ nə, kurisaʋ tə yàá jə mən kə̀lə̀kə̀lə̀.
7 Ba mama lɩŋa ndə dipɛn kurisaʋ nə,
ba ma gwɩ ba yáá tɩ̀án tə.
Ba pɛ̀gá tə mama twɩ,
yá ba lìù mama ba boŋə ʋ kəni à nə.
8 Efərayimə dwíí tə pugu ba zʋ dwíə́ nəkaran* tə,
ba jìgə̀ ndə ŋʋ̀nʋ́ bìú nə,
ba nə wà viviri.
9 Vərə də́ Efərayimə dwíí tə dɩ̀àn,
yá ba ba lwarɩ.
Kʋkwɩnɩ ja ba kʋ zwɩ,
yá ba yəri.
10 Yɩzərayɛlə lɩ̀à fwìə́ tə swɩ̀n kʋ zɩga ba nə,
yá də kʋ nətʋ mɛ, ba ba Ba-Yígúrə́-Jə-Tiu,
ba Yɩɩ tə twarɩ, sə ba pìí ba bà ʋ con.
11 Efərayimə dwíí tə yìgí ndə gunpwənə nə,
ba ba pubʋŋa jə.
Ba bon ba kə Ezwipətə tɩ̀án nə,
ba vəli ba pɩ̀à sáŋʋ́ Asiiri lʋʋ nii wa.
12 Yá máŋá tə ba nə vələ,
à wá dɩlɩ à gəgəlu ba yuu wa,
à pa ba tʋ kʋ wa, ndə lanworu zuŋi nə.
À wá pá ba à kə cwəŋə wa,
ndə à nə dí yáá à swɩ̀n kʋ ba con,
ba púlí tə wa, də à wá tʋn kʋ nətʋ.
13 Lɛɛ wá yí ba,
ba nə dəri ba va yiŋʋnɩ də nə yɩrɩ!
Cʋcʋran wá tʋ ba yuu wa,
ba nə zàn ba zɩgɩ à nə yɩrɩ!
À mʋ̀ yà nə yɩ ba jonu,
yá ba kʋ̀nɩ̀ kʋ̀nkʋ̀n ba kə à nii nə.
14 Ba ba bubwi ba kəni à nə, də ba waa mama.
Ba yàá mà nii ba yipaa bwálɩ́ wa,
ba ga bɩ̀rɩ̀ gwɛɛn ba yɩra,
sə ba ma na dipɛn mɩna, də divɛn nədʋn,
yá ba viviri ba kwa ba ma sà nə.
15 À mʋ̀ nə ken ba cwəŋə wa,
à ga dàn ba jɩ̀àn,
yá ba ja pubʋnlwan ba zɩga à nə.
16 Ba pìí ba bɩ̀àn,
kʋ dàń nə tà à mʋ̀ Baan Yɩɩ con.
Ba yɩ ndə twan nə dʋgʋ ka tíú.
Ba yáá tɩ̀án tə wá tɩ kʋ̀ʋ̀ wa,
ba nii nə ba ywán tə yɩrɩ,
yá kʋ wá pa ba mʋn ba,
Ezwipətə lʋʋ nii tə wa.