6
1 Á bɩ̀àn nə pìí nə va Ba-Yígúrə́-Jə-Tiu con,ʋ mʋ̀ nə van nəba ʋ vuri,
yá ʋ mʋ̀ nə wá ywarɩ nəba,
ʋ pa nə na yazurə.
Ʋ mʋ̀ nə mà nəba,
yá ʋ mʋ̀ nə wá vwa nə nʋran tə.
2 Ʋ wá pa nəba mɩɩ dɩan bələ pwə́rə́ wa,
yá batwa nii dɩɩn tə nə, ʋ wá pìí ʋ zɩ̀n nəba,
yá nə kʋ́ʋ̀ wá pìí nə ya mɩɩ wa, ʋ yáá con.
3 Nə kənə dɩ̀àn nə lwarɩ Ba-Yígúrə́-Jə-Tiu.
Ʋ túrí tə ba tʋ́tʋ̀ná jə,
ndə tɩbɩlakʋnʋ túrí nə ba tʋ́tʋ̀ná jə nətʋ.
Ʋ wá bà nə con ndə dwà nə,
ʋ wá bà ndə talɩkwa dwà nə yàá bà
ka gàrɩ̀ tɩa tə nətʋ.
4 Bɛ̀ɛ̀ nə à wá ma tʋn aba,
Efərayimə dwíí lɩ̀à-ba?
Bɛ̀ɛ̀ nə à wá ma tʋn aba,
Zwida dwíí lɩ̀à-ba?
Á fààn tə yɩ ndə jɩjʋ fun nə,
ka yɩ ndə jɩjʋ nyʋ̀nʋ̀ nə, kʋ nə kwɩ.
5 Kʋ mʋ̀ nə pɩn, à twá də Yɩɩ nii sʋ̀sʋ̀nà tə,
à ma mà ba,
à ga ja á nii sʋgʋ à ma gwɩ ba,
yá à bʋra wá pwin ndə poni nə.
6 Cɩ́gá, à swə fààn à doni joŋi,
à ga swə sə ba zìlí à nii,
à doni jwəŋə tə ba nə sʋ̀rɩ́*.
yobalwaran tʋŋa Yɩzərayɛlə wa
7 Yá ba mʋ̀ cʋ̀gʋ̀ nimarʋ* tə,
ndə ba nɩbɛɛ Adamə nə.
Mə nətʋ nə ba tʋn pwìí bələ yoo à yɩra.
8 Galadə yɩ yolwafwana tɩʋ,
kʋ nə súə́ də jana.
9 Yɩɩ joŋwana púlí gwɩ lɩ̀à,
Siswɛmə cwəŋə yuu, ndə lagʋra nə,
ba nə səgə ba dànɩ̀ lìù.
Kʋ yɩ culu nəfarʋ nə ba cʋ̀gà!
10 À nɩ yobalwaran Yɩzərayɛlə dìə̀ tə wa.
Mə lá nə Efərayimə dwíí tə cwàrɩ̀,
yá Yɩzərayɛlə lɩ̀à tʋn durən yìə̀n.
11 N mʋ̀ Zwida dwíí tə də, à tanɩ sə à mʋ mʋ́,
máŋá tə wa, à nə wá pìí à kwɛn à lɩ̀à tə jaa,
à pa ka ya zəni.