Yɩzərayɛlə lɩ̀à karnyɩna kʋkwɩnan tə yoo
5
1 Á cʋga yoo kʋ tə, Yɩɩ joŋwana*-ba!Á cʋga zəni, Yɩzərayɛlə dìə̀ tɩ̀án-ba!
Á gunə á zɩɩn á cʋgʋ, pɩ̀ʋ́ dìə̀ lɩ̀à-ba!
Cɩ́gá, á mʋ̀ yà nə mɛ sə á bɩrɩ cɩ́gá cwəŋə,
yá á pìí á ya ndə nyalɩ nə Misəpa nə,
á ga ya ndə gəgəlu nə,
ba nə ken Tabɔrə paan tə yuu wa.
2 Pwìí bələ tɩ̀án kʋa bʋʋ, kʋ də̀ń nə lu,
yá à mʋ̀ wá van ba mama zɩɩn nə.
3 À mʋ̀ yə̀ə́ Efərayimə dwíí tə,
yá Yɩzərayɛlə lɩ̀à wà à yáá nə səgə.
Cɩ́gá, sɩ́ʋ́n nə, Efərayimə, n cwàrɩ̀,
yá Yɩzərayɛlə tʋn durən yìə̀n.
4 Ba tʋtʋnɛɛ tə pɩn ba kʋ́ʋ̀ wàrɩ̀
ba Yɩɩ tə con ba pìí ba twi,
cwàrʋ̀ jə̀rə́ tə nə wulə ba titəŋi wa,
yá ba yəri Ba-Yígúrə́-Jə-Tiu yɩrɩ.
5 Yɩzərayɛlə lɩ̀à fwìə́ tə swɩ̀n kʋ zɩga ba nə.
Yɩzərayɛlə lɩ̀à də Efərayimə dwíí tə
wá mà ba nɛɛ ba tətə yolwana tə nə,
yá Zwida dwíí tə də wá twá ba nə,
ba mà ba nɛɛ.
6 Ba wá ja ba vanmɩnɩ də ba vanfaran,
ba va ba ma fwa jwəŋə,
ba ma twarɩ Ba-Yígúrə́-Jə-Tiu,
yá ba bá na wá.
Cɩ́gá, ʋ pwɛ̀ ʋ tɩ̀àn ʋ yá ba yiŋʋnɩ.
7 Ba tʋn pwìí bələ yoo
Ba-Yígúrə́-Jə-Tiu yɩra.
Cɩ́gá, ba lɩrɩ tənpirə.
Sɩ́ʋ́n nə, yəbə də candʋan tə naŋʋ wa,
ba də ba kárɩ́ tə mɛ wá cʋ̀gʋ̀.
Kʋ̀ʋ̀, Efərayimə də Zwida dwíə́ tə pwə́rə́ wa
8 Á wurə nabwanvunu Gibeya nə,
á ga wuri nabwanpɩan Rama nə!
Á maga bubwiə Bɛtə-Avɛnəa nə!
Cɩ n tɩ̀àn nə Bɛnzwamɛn dwíí:
Dʋŋa wulə n kwa con!
9 Efərayimə wá jì dibwərən,
dɩɩn tə nə, à nə wá kə ba càn wa.
Yoo tə à nə swɩ̀n Yɩzərayɛlə dwíə́ tə con,
yɩ yoo kʋ nii nə wá sú, kʋ ba tʋ́tʋ̀ná jə.
10 Zwida dwíí yun tɩ̀án tə yɩ ndə lɩ̀à nə,
ba nə fwarɩ sɩswɩan.
À wá pa à lɩŋa nəfarʋ tə
curi ba yuu wa ndə nacoru nə.
11 Bʋra wá fɩfɩn Efərayimə dwíí tə kʋ cʋ̀gʋ̀,
ba nə kúrí ba tì sə ba twarɩ
wiən tə nə ba funə jə yɩrɩ.
12 Yá à mʋ̀ wá ya ndə sabadaʋ nə,
à pa Efərayimə dwíí tə nə,
à ga ya ndə wòpʋ́pʋ́nʋ́ nə,
à pa Zwida dìə̀ tə nə.
13 Efərayimə dwíí tə na ba yayɩgʋ tə,
yá Zwida dwíí tə də na ba nʋʋ tə.
Efərayimə dwíí tə vəli Asiiri lʋʋ nii wa,
ba tʋn tʋntʋna pɩ̀ʋ́ nəfarʋ tə con,
yá pɩ̀ʋ́ təntə bá wànɩ́ aba ʋ ywarɩ,
ʋ pa á yayɩgʋ tə, nə à yə̀ə́ á nʋʋ tə zwɛ̀.
14 Cɩ́gá, à tətə wá ya ndə gəru nə,
à pa Efərayimə dwíí tə nə,
à ga ya ndə gəbala nə,
à pa Zwida dìə̀ tə nə.
À mʋ̀, à mʋ̀ nə wá van ba à vuri,
à ja vìí, yá lìù mama bá jon ba.
Yɩɩ lɩ̀à tə kúrí ba tì, sə ba pìí ba bà ʋ con
15 À wá pìí à bà à bwálɩ́ tə nə,
kʋ ja vələ máŋá tə ba nə wá sɛ̀,
də ba tʋn yolwan,
ba ga pìí ba twarɩ nə.
Ba jɩgwarʋ tə wa, ba wá pɩ̀à à sáŋʋ́.