Yɩɩ wulə bʋra wa də ʋ lɩ̀à tə
4
1 Á cʋga Ba-Yígúrə́-Jə-Tiu sʋgʋ, Yɩzərayɛlə lɩ̀à-ba!Cɩ́gá, Ba-Yígúrə́-Jə-Tiu wulə bʋra wa də lʋʋ nii tə lɩ̀à tə,
ba nə ba cɩ́gá nə twá, ndə kʋ nə mɛ nətʋ,
ba nə tà pùə́ nədʋ tɩ̀án,
ba ga ba Yɩɩ yənu jə lʋʋ nii tə wa yɩrɩ.
2 Kʋ yɩ gɩgɩra də zɩra,
lagʋrɩ, ŋwɩ̀rɩ̀ də bacwaan nə súə́ lʋʋ nii tə.
Ba fwa dɩ̀àn duən yɩra,
də ba gwɩ duən máŋá mama.
3 Kʋ mʋ̀ nə pɩn, dwakʋrɩ wá ya lʋʋ nii tə wá,
yá kʋ wa lɩ̀à tə mama dàń wá bwànɩ́,
ba mʋ̀ də ganaŋa tə, də lanworu zuŋi tə mɛ.
Mʋʋ wa filə tə də tətə wá nyʋn lá.
Yɩɩ joŋwana tə tʋn pwìí bələ yoo
4 «Lìù mama dàn ká tʋ́tʋ̀nɩ́,
lìù mama dàn ká caga ʋ don nii nə.
Cɩ́gá, kʋ yɩ á mʋ̀ Yɩɩ joŋwana tə nə nə,
à bʋ̀rɩ̀ à zɩga.
5 Á wá mà á naa yɩcakʋrʋ wa,
Yɩɩ nii sʋ̀sʋ̀nà tə nə wulə də aba
ga mà ba naa tɩtɩn nə,
yá à wá pa á nuu tɩ.
6 Cɩ́gá, à lalʋʋ tə wulə ba tɩ,
ba nə ba yənu jə yɩrɩ.
Á nə vɩga yənu tə yɩrɩ,
à də wá vɩ sə á ya à joŋwana.
Á nə swɛ̀ɛ́ á tíú Yɩɩ nii yìə̀n* tə yɩrɩ,
à də wá swɛ̀ɛ́ á bɩ̀á tə yoo.
7 N nə yə̀ə́ Yɩɩ joŋwana tə nə pùlì zənzən nətʋ,
mə nətʋ nə ba kwɛn ba tʋŋa cʋna də, ba zɩga à nə.
À wá pa ba dun tə jì cavɩyoo.
8 À lalʋʋ tə cʋna tə nə, ba ma kʋ̀nɩ̀ ba tɩ̀àn,
ba ga yigə à lalʋʋ tə,
ba pɩn ba tʋŋa yolwan.
9 Yoo tə nə wá yí lalʋʋ tə,
mə kʋ mʋ̀ nə wá yí Yɩɩ joŋwana tə də.
À wá zɩgɩ ba nə, ba tʋtʋnɛɛ tə yɩrɩ,
yá à wá ŋwɩ́n tə ŋwɩ́rán à pa ba.
10 Ba wá də́, yá ba bá sú,
ba wá cwàrɩ̀, yá ba ba pùlì,
ba yáá nə tə̀lə́ də à mʋ̀ Ba-Yígúrə́-Jə-Tiu yɩrɩ.
11 Cwàrʋ̀, də divɛn, divɛn nədʋn nywɩʋn
pɩn à lɩ̀à tə yuu vìí.
12 À lɩ̀à tə yɩ ba dàʋ̀ woŋwanan con nə ba pwárɩ́,
yá ba dacelə nə yàá bɩrɩ ba jwɩan yìə̀n.
Cɩ́gá, cwàrʋ̀ jə̀rə́ gɩgarɩ ba ka dʋgʋ,
kʋ pa ba va yiŋʋnɩ də ba Yɩɩ tə,
ba ma cwàrɩ̀.
13 Ba fwa jwəŋə pɛɛn yuparɩ wa,
ba sʋ̀rɩ́ wusinə dədwələn yuu,
də sɩsanan də̀ń, də kànàn də̀ń,
də kwə̀lə́n də̀ń, tə ywárɩ́ nə jə fɩra!
Kʋ mʋ̀ nə pɩn, á bwɩ̀ɩ́ ma cwàrɩ̀,
á bikɩna də ga tʋŋa kacwaan.
14 À bá zɩgɩ á bwɩ̀ɩ́ tə nə,
ba nə cwàrɩ̀ yɩrɩ,
à ma bá zɩgɩ á bikɩna tə nə,
ba nə tʋŋa kacwaan yɩrɩ.
Cɩ́gá, Yɩɩ joŋwana tə tətə pə̀ní
də kacwaran, kwa con,
ba ga tarɩ jwəŋə wiən,
ba pɩn ba woŋwanan dìì kacwaran*.
Lalʋʋ tə nə ba wʋbʋŋa jə wá cʋ̀gʋ̀ kʋ tɩ̀àn.
15 Yɩzərayɛlə lɩ̀à-ba, á nə cwàrɩ̀,
á dànà ká pa á cwàrʋ̀ tə pwàrɩ́ Zwida lɩ̀à tə.
Á dànà ká va Giləgalə,
á dànà ká va Bɛtə-Avɛnəa,
á dù, á swɩ̀n, á wʋ́:
«Ba-Yígúrə́-Jə-Tiu wulə!»
16 Cɩ́gá, Yɩzərayɛlə lɩ̀à ba nii sɛ̀, ndə naʋ nə ba nii sɛ̀ nətʋ, yá sɩ́ʋ́n nə, Ba-Yígúrə́-Jə-Tiu wá yɩ̀rɩ̀ ba ndə pəbii nə, vàná gaʋ wa. 17 Efərayimə dwíí tə vwə ba tɩ̀àn woŋwanan nə: Á yágá ba! 18 Ba nə zə́n ba nyʋn divɛn ba zwɛ̀, də kʋ yɩ ba wulə ba cwàrɩ̀. Ba yun tɩ̀án tə swə ka tʋn cavɩyiən. 19 Vʋʋ wá jàn ba, yá ba jwəŋə tə cavɩra wá ja ba.