Yɩɩ kʋ́ʋ̀ pɩn Oze swe kacwarʋ don
3
1 Ba-Yígúrə́-Jə-Tiu swɩ̀n à con, ʋ wʋ́: «Kʋ́ʋ̀ vəli n sóní kan, ʋ nə jə bwàlʋ́, ʋ ga tʋŋa kacwaan. Sóní wá zənzən, ndə à mʋ̀ Ba-Yígúrə́-Jə-Tiu nə swə Yɩzərayɛlə lɩ̀à tə nətʋ, yá ba ga pìí ba viviri ba yáá ba kə yɩa duən con, tə nə swə divɛn tɩ̀án bɩ̀á, ba nə cili ba kə duən nə, tə kʋ̀.» 2 À swe kan təntə, də wárʋ́ səbilurən* fugə bonu, də dipɛn mɩna yiri don, kilo biənɩa də finu. 3 Yá à dàń swɩ̀n ʋ con, à wʋ́: «Ya à con, sə kʋ dán zənzən, yá kʋ́ʋ̀ dàn ká cwàrɩ̀. Kʋ́ʋ̀ dàn ká ya lìù don mama kan, kʋ súrí à nə, yá à də wá ya n mʋ̀ cɩcɩ barɩ.»4 Cɩ́gá, Yɩzərayɛlə lɩ̀à wá kwɩ̀n pɩ̀ʋ́ nə, də yáá tíú nə, də joŋi fwaŋʋ nə, də culu kapan* nə, də Yɩɩ joŋwana culu gànʋ̀* nə, də dìə̀ woŋwanan nə, bɩna kapʋpʋ. 5 Kʋ kwa nə, Yɩzərayɛlə lɩ̀à wá pìí ba bà, ba twarɩ Ba-Yígúrə́-Jə-Tiu, ʋ nə yɩ ba Yɩɩ, də ba pɩ̀ʋ́ Davidə dwíí tə. Máŋá wa ka nə bɩ̀àn, ba wá dəri ba bà Ba-Yígúrə́-Jə-Tiu yáá con, də ba vɩvaga, ʋ nə yɩ pubwanʋ tíú yɩrɩ.