Zwɩzəreyɛlə dɩɩn nəfarʋ tə yoo
2
1 Yɩzərayɛlə bɩ̀á tə wá jìndə mʋʋ nii kasɩlʋ nə,
kʋ nə wàrɩ̀ kʋ kəri, kʋ ga wàrɩ̀ kʋ gàlɩ̀.
Yá bwálɩ́ tə wa, ba nə swɩ̀n ba con, ba wʋ́:
«Á tà à mʋ̀ lalʋʋ!»
Ba dàń wá swɩ̀n ba con, ba wʋ́:
«Á yɩ Yɩɩ tə ʋ nə wulə mɩɩ wa bɩ̀á!»
2 Zwida dwíí tə də Yɩzərayɛlə dwíí tə wá kə nimarʋ,
ba tún pɩ̀ʋ́ nədʋ,
yá ba wá tɩnɩ ba tɩ̀àn lʋʋ nii tə wa.
Cɩ́gá, Zwɩzəreyɛlə dɩɩn təntə wá ya dɩɩn nəfarʋ.
3 Á swɩan á nubɩa tə con, á wʋ́: «Amia!»
Á ga swɩ̀n á nakwana tə con, á wʋ́: «Ruhamab!»
4 Á swɩan, á swɩan á zɩgɩ á nuu tə nə.
Cɩ́gá, ʋ kʋ́ʋ̀ tà à kan,
à də ga kʋ́ʋ̀ tà ʋ barɩ!
Á swɩan ʋ con,
sə ʋ lɩ ʋ kacwaan bwanzɩla tə ʋ yáá wa,
ʋ ga lɩ mɩmɩnan tə nə bɩrɩ də,
ʋ yɩ kacarʋ tə, ʋ yɩla tə pwə́rə́ wa!
5 Kʋ nə tà nətʋ à wá kʋ̀rɩ̀ ʋ gànàn,
à ga yá wá yaswələ mɩ́ámɩ́án,
ndə ʋ lɩrʋ dɩɩn nə.
À wá pa ʋ jì ndə kasɔɔ lanworu nə,
nə à yə̀ə́ ndə digə nə,
à ga pa ʋ tɩ də nanyʋnɩ.
6 Yá à bá dəri ʋ bɩ̀á tə yinəgə,
ba nə yɩ tənpirə yɩrɩ.
7 Cɩ́gá, ba nuu cwàrɩ̀,
kan tə ʋ nə jɩn ba pùə́,
ken cavɩra ʋ tɩ̀àn nə,
də ʋ nə swɩ̀n, ʋ wʋ́:
«À wá twá à bwàlá tə nə,
ba mʋ̀ nə pɩn nə à nii wodiu də nɩ́á,
də bɔɔ də ganbʋa,
də nʋga də sana.»
8 Kʋ mʋ̀ nə pɩn,
à wá sún ʋ cwəŋə tə də casʋran,
à wá dɩ dagarʋ ka wa,
yá ʋ kʋ́ʋ̀ bá na ʋ coŋi tə nii.
9 Ʋ wá dɩŋa ʋ bwàlá tə kwa,
yá ʋ bá yí ba,
ʋ wá twarɩ ba, yá ʋ bá na ba.
Yá ʋ dàń wá swɩ̀n, ʋ wʋ́: «Kʋ ziən!
À wá pìí à va à təntən barɩ tə con.
Cɩ́gá, à yà nə̀ń à ywánɩ́ lá nə,
à doni zə̀n kʋ tə!»
10 Ʋ yà wà lwarɩ də,
à mʋ̀ nə pɩn wá mɩna,
də divɛn nədʋn, də nʋga nədʋn.
À pɩn wá wárʋ́ də sɩ́án,
yá ba tì tə ba ma də́ zìlə́,
Baalə woŋwanʋ tə yuu wa!
11 Kʋ mʋ̀ nə pɩn, à wá pìí à bà,
à jon à mɩna tə, woceri máŋá wa,
yá à wá jon à divɛn nədʋn tə,
divɛn tɩ̀án bɩ̀á nɩŋʋ máŋá wa,
à ga wá jon à bɔɔ tə, də à ganbʋa tə,
tə yà nə mɛ sə tə pú ʋ cavɩra nə.
12 Yá à dàń wá nyɩn ʋ cavɩra poni nə,
ʋ bwàlá tə yáá con,
yá lìù mama bá jon wá à jɩɩn wa.
13 À wá pa ʋ cànɩ̀ diŋə tə,
də ʋ candʋra diŋə tə, də ʋ sìə́ dɩan tə,
də ʋ jə́rí nəfaran tə mama zwɛ̀,
ʋ pupwən tə mama ga nyʋn lá.
14 À wá cʋ̀gʋ̀ ʋ divɛn tɩ̀án tə, də ʋ kapɩran tə,
ʋ yà nə swɩ̀n tə yoo, ʋ wʋ́:
«Tə mʋ̀ nə yɩ à ŋwɩ́rán,
à bwàlá tə nə pɩn nə!»
À wá pa tə jì pún,
yá ganaŋa wá də́ tə.
15 À wá zɩgɩ ʋ nə, dɩan tə yɩrɩ,
ʋ nə sʋrɩ wusinə,
ʋ pa Baalə woŋwanan tə nə.
Kʋ máŋá tə wa, ʋ yàá nàn ʋ tɩ̀àn
də zɩnkwana, də bɩan zanan,
yá ʋ dəri ʋ pwí ʋ bwàlá tə kwa,
ʋ ga swɛ̀ɛ́ à mʋ̀ yoo.
Ba-Yígúrə́-Jə-Tiu nii sʋgʋ nə!
16 Kʋ mʋ̀ nə pɩn, à wá gɩgarɩ wá,
à ja va kasɔɔ lanworu wa,
yá à wá swɩ̀n ʋ bɩcan wa.
17 Mə lá nə à wá zɩgɩ,
à pìí à pa wá ʋ divɛn tɩ̀án tə,
yá à wá pa Akɔrə vara tə jì yala mimii,
ʋ nə wá sɛ̀ à nii lá nə,
ndə kʋ nə yɩn nətʋ, ʋ zandʋan máŋá wa,
ndə dɩɩn tə nə, ʋ nə pìí
ʋ nan Ezwipətə lʋʋ nii tə wa, ʋ vìrí.
Ka pìí ka kə duən yuu dɩɩn tə yoo
18 Kʋ dɩɩn tə nə,
n wá bon nə: «À barɩ!»
Yá n kʋ́ʋ̀ bá bon nə:
«À yuu-tíú Baalə!»
Ba-Yígúrə́-Jə-Tiu nii sʋgʋ nə!
19 À wá lɩ Baalə woŋwanan tə yɩrɩ ʋ nii wa,
yá ba kʋ́ʋ̀ bá lìí tə yɩrɩ də tətə.
20 Kʋ dɩɩn tə nə, à wá tún nimarʋ,
à də ganaŋa tə, də lanworu zuŋi tə,
də tɩa yuu wiən tə nə vəli tə pùə́ baan
pwə́rə́ wa, à lalʋʋ tə yɩrɩ.
À wá kɛ́n twan, də kwatara sɩ̀ʋ́,
à ga pa kʋ̀ʋ̀ zwɛ̀ lʋʋ nii tə wa.
Yá à dàń wá pa à lalʋʋ tə pə̀ń ba sìí də yazurə.
21 Yá à wá càrà mʋ́ à swe,
sə n ya à kan máŋá mama wuuu.
Kʋ wá twá də cɩ́gá cwəŋə,
də kʋ tə nə yɩ mənəmənə,
də sonu də bɩcabwanʋ,
à ma càrà mʋ́ à swe.
22 À wá càrà mʋ́ à swe, də pùə́ nədʋ,
yá n dàń wá yəni Ba-Yígúrə́-Jə-Tiu.
23 Kʋ máŋá təntə wa, à wá le.
Ba-Yígúrə́-Jə-Tiu nii sʋgʋ nə!
À wá le lanworu tə yɩlori,
yá lanworu tə də wá le tɩa tə yɩlori.
24 Yá tɩa tə wá le də mɩna,
də divɛn nədʋn, də nʋga nədʋn,
yá tə də dàń wá le Zwɩzəreyɛlə yɩlori.
25 À wá mɩ́n à wodwii lʋʋ nii tə wa,
yá à wá dəri Lo-Ruhama yinəgə.
À wá swɩ̀n Lo-Ami con, à wʋ́:
«N yɩ à lalʋʋ!»
Yá ʋ wá swɩ̀n, ʋ wʋ́:
«N yɩ à Yɩɩ!»