Oze
1
1 Sʋ̀ràn tə Ba-Yígúrə́-Jə-Tiu nə swɩ̀n Beri bìú Oze con, Zwida pɛ̀gá Ozɩasə, də Yotamə, də Ahazə, də Ezekɩasə máŋá wa, də Yɩzərayɛlə pɩ̀ʋ́ Zwerobʋamə, ʋ nə yɩ Zʋasə bìú, máŋá wa.Oze kasweri, də kʋ tə kʋ nə pɩ̀à kʋ bɩrɩ
2 Nə̀ń sʋ̀ràn tə, Ba-Yígúrə́-Jə-Tiu nə twá də Oze ʋ swɩ̀n, nə sinti nətʋ. Ba-Yígúrə́-Jə-Tiu swɩ̀n Oze con, ʋ wʋ́:
«Vəli n tì kacwarʋ tə nə yoli ʋ tɩ̀àn,
n ma fwa n kan,
sə n də wá lɩra tənpibɩ̀á.
Cɩ́gá, lʋʋ nii tə lɩ̀à vɩga à mʋ̀ Ba-Yígúrə́-Jə-Tiu
ba dʋgʋ, ba ga zʋ cwàrʋ̀ wa,
ba wulə ba cwàrɩ̀!» 3 Yá Oze dàń vəli ʋ tì Dibəlayimə bʋ̀á Gomɛrə, ʋ ma fwa ʋ kan. Gomɛrə jɩn pùə́, ʋ lɩra bibɛɛ, ʋ pa Oze nə. 4 Yá Ba-Yígúrə́-Jə-Tiu swɩ̀n Oze con, ʋ wʋ́:
«Dɩ ʋ yɩrɩ Zwɩzəreyɛləa.
Cɩ́gá, máŋá mancɩn wa,
à wá zɩgɩ pɩ̀ʋ́ Zwehu dìə̀ tə nə,
jana tə yɩrɩ tə nə lwá Zwɩzəreyɛlə nəb,
yá à wá pa Yɩzərayɛlə dìə̀ tə payuu tə zwɛ̀.
5 Kʋ dɩɩn tə nə, à wá kɛ́n Yɩzərayɛlə lɩ̀à
twan tə Zwɩzəreyɛlə vara tə wa.»
6 Gomɛrə kʋ́ʋ̀ jɩn pùə́, ʋ lɩra bʋ̀á, yá Ba-Yígúrə́-Jə-Tiu swɩ̀n Oze con, ʋ wʋ́:
«Dɩ ʋ yɩrɩ Lo-Ruhamac.
Cɩ́gá, à kʋ́ʋ̀ bá dəri Yɩzərayɛlə dìə̀ tə yinəgə,
sə à kwɛn ba cʋna tə à lɩ à də ba pwə́rə́ wa,
máŋá mama wuuu.
7 Yá à tə wá dəri Zwida dìə̀ tə mʋ̀ yinəgə,
à mʋ̀ Ba-Yígúrə́-Jə-Tiu, à nə yɩ ba Yɩɩ, ga wá jon ba.
Yá kʋ tà kʋ wá twá də twan,
nə à yə̀ə́ də kwatara sɩ̀ʋ́,
nə à yə̀ə́ də kʋ̀ʋ̀ tɛgʋ, nə à yə̀ə́ də səsen,
nə à yə̀ə́ də səsədɩra, à ma jon ba.»
8 Gomɛrə nə lɩ Lo-Ruhama yɩlɩ nə kwa nə, ʋ kʋ́ʋ̀ jɩn pùə́, ʋ lɩra bibɛɛ. 9 Yá Ba-Yígúrə́-Jə-Tiu swɩ̀n Oze con, ʋ wʋ́:
«Dɩ ʋ yɩrɩ Lo-Amid.
Cɩ́gá, á tà à mʋ̀ lɩ̀à,
à də ga tà won mama, à pa aba.»