14
1 Bʋra wá ja Samari tɩ̀án, ba cʋna tə yɩrɩ,ba nə zàn ba zɩgɩ ba tíú Yɩɩ tə nə yɩrɩ.
Kwatara sɩ̀ʋ́ wá gʋ ba kʋ larɩ,
dʋŋa wá tɩtaga ba bisɩmabii,
ba ga kàrɩ́ ba kapwe pwìí.
Yɩɩ kàn nii, sə ʋ kwɛn ʋ lɩ̀à tə, ʋ lɩ pwìí bələ yìə̀n wa
2 Yɩzərayɛlə lɩ̀à-ba, á pìrə́ á bà
Ba-Yígúrə́-Jə-Tiu, á tíú Yɩɩ con.
Cɩ́gá, á yolwan tə pɩn á mà á naa nə.
3 Á jana lwɩa sʋ̀ràn,
á ja bà Ba-Yígúrə́-Jə-Tiu con.
Á swɩan ʋ con, á wʋ́:
«Nə lòrì sə n lɩ nə yolwan yiri mama,
n dʋgʋ, n ga sɛ̀ n jon kʋ tə nə ziən!
Yá nə nii sʋ̀ràn dàń wá jon nabɩran jwəŋə bwálɩ́,
nə ma bʋ n nə.
4 Asiiri tɩ̀án wàrɩ̀ nəba ba joŋə.
Nə kʋ́ʋ̀ bá dɩ̀ səsən yuu,
yá nə kʋ́ʋ̀ bá ja won tə nə jɩ̀àn nə fwa,
nə ma bon “Nə Yɩɩ!”
Cɩ́gá, n mʋ̀ cɩcɩ nə dəri bitarʋ yinəgə!»
5 Ba-Yígúrə́-Jə-Tiu swɩ̀n, ʋ wʋ́:
«À wá pa Yɩzərayɛlə lɩ̀à pwìí bələ yìə̀n tə zwɛ̀,
à ga sóní ba, də à waa mama,
à lɩŋa nə kʋ́ʋ̀ bá zàn ba yuu wa yɩrɩ.
6 À wá ya ndə nyʋ̀nʋ̀ nə,
à pa Yɩzərayɛlə lɩ̀à nə.
Ba wá pùnə̀ ndə gaʋ nə,
ba dəkuu ga zʋ tɩa, ndə Liban pún tɩ̀án nə.
7 Ba naywalan wá yàgà.
Ba wá ja fɩra ndə olivə tɩ̀ʋ́ nə,
ba lwán ga ya ywánɩ́, ndə Liban pún nə.
8 Lɩ̀à tə yà nə jəni ba ywárɩ́ nə,
wá pìí ba bà.
Ba wá pa dipɛn mɩna pìí tə ya lá,
yá ba wá pùnə̀, ndə divɛn tɩ̀án nə.
Ba yɩrɩ wá nan, ndə Liban lʋʋ nii divɛn nə.
9 Efərayimə dwíí lɩ̀à-ba, bɛ̀ɛ̀ nə kʋ́ʋ̀ wulə
à də woŋwanan pwə́rə́ wa?
À mʋ̀ nə le á yɩjʋnɩ,
à ga ywàŋá á yuu.
À yɩ ndə nyənbori tɩ̀ʋ́ nə,
kʋ nə jə vʋlɩran máŋá mama.
À mʋ̀ nə pɩn aba ləni.
10 Lìù tə ʋ nə yɩ wʋbʋnyiən,
ʋ wá ja yìə̀n tə tə yənu!
Lìù tə ʋ nə jə pubʋŋa,
ʋ wá nì tə də̀ń!
Cɩ́gá, Ba-Yígúrə́-Jə-Tiu coŋi tə yɩ mənəmənə.
Cɩ́gá tɩ̀án wá va tə wa də yazurə,
yá cʋna lɩ̀à mʋ̀ wá mà ba nɛɛ tə wa.