À yə̀ə́ də Ba-Yígúrə́-Jə-Tiu dáá
135
1 Á bwɩa Ba-Yígúrə́-Jə-Tiu nə!Á bwɩa Ba-Yígúrə́-Jə-Tiu yɩrɩ tə nə!
Á bwɩa ʋ nə, á mʋ̀ Ba-Yígúrə́-Jə-Tiu tʋ̀tʋ̀nà tə,
2 á nə zɩga Ba-Yígúrə́-Jə-Tiu dìə̀ tə wa,
á nə zɩga nə tíú Yɩɩ dìə̀ dəwoo tə wa!
3 Á sənə Ba-Yígúrə́-Jə-Tiu!
Cɩ́gá, Ba-Yígúrə́-Jə-Tiu ziən!
Á dɩa gwaran á ma bʋ yɩrɩ tə nə!
Cɩ́gá, ʋ yɩ pubwanʋ tíú!
4 Cɩ́gá, Ba-Yígúrə́-Jə-Tiu kúrí Zwakɔbə,
yá ʋ pɩn Yɩzərayɛlə jì ʋ tətə lɩ̀à.
5 Kʋ yɩ cɩ́gá, à yə̀ə́ də Ba-Yígúrə́-Jə-Tiu dáá,
yá nə Yuu-Tiu tə wulə yɩa tə mama yuu wa.
6 Won tə mama Ba-Yígúrə́-Jə-Tiu nə swə,
ʋ yàá tʋn kʋ lanworu wa, də tɩa yuu wa,
də mʋʋ wa, də bʋran nəfaran tə wa, tə də̀ń nə lu.
7 Ʋ pɩn bakwan naŋa tɩa tə yígúrə́ wa,
ʋ pɩn dwà pɩpɩlɩ ka ma nɩ̀,
ʋ pɩn vʋʋ naŋa bwálɩ́ tə wa, ʋ nə cɩ̀gà kʋ ʋ kə.
8 Ʋ mʋ̀ nə gʋa Ezwipətə təntən bɩ̀á tə,
kʋ nə zɩgɩ ləzoni bikwɩna nə,
kʋ va kʋ yí vàná təntən bɩ̀á nə.
9 Ʋ pɩn mɩmɩnan də yogwaran tʋn, n mʋ̀ Ezwipətə lʋʋ nii tə wa,
tə zɩgɩ pɩ̀ʋ́ Farawon* də ʋ tʋ̀tʋ̀nà tə mama nə.
10 Ʋ cʋ̀gʋ̀ dwíə́ nəkaran* zənzən,
ʋ ga gʋ pɛ̀gá nəfaran.
11 Kʋ yɩn Amɔrə dwíí pɩ̀ʋ́ Sihon,
də Baswan pɩ̀ʋ́ Ogə,
də Kanaan pɛ̀gá tə mama.
12 Yá ʋ pɩn ba lʋʋ nii tə ndə tori nə,
sə kʋ ya Yɩzərayɛlə lalʋʋ tə nə yɩ ʋ mʋ̀ nə tɩ, tori.
13 Ba-Yígúrə́-Jə-Tiu, n yɩrɩ tə wulə máŋá mama wuuu!
Ba-Yígúrə́-Jə-Tiu, ba lìí n yoo máŋá də máŋá mama wuuu!
14 Cɩ́gá, Ba-Yígúrə́-Jə-Tiu wá bʋ̀rɩ̀ ʋ lalʋʋ tə bʋra,
yá ʋ wá dəri ʋ tʋ̀tʋ̀nà tə yinəgə.
15 Dwíə́ nəkaran tə woŋwanan tə yɩ wárʋ́,
nə à yə̀ə́ sɩ́án nə ba ma fwa,
tə ga yɩ ləzoni jɩ̀àn tʋtʋŋɩ.
16 Tə jə nii, yá tə wàrɩ̀ tə swɩ̀n,
tə jə yɩ́á, yá tə ba là na!,
17 tə jə zɩan, yá tə ba nə̀ń,
vʋʋ mancɩn tətə ba tə nii wa naŋa!
18 Lɩ̀à tə nə fwa tə, də ba tə mama
nə jələ tə yuu wa, wá jì ndə tə nə!
19 Á mʋ̀ Yɩzərayɛlə lɩ̀à tə, á bwɩa Ba-Yígúrə́-Jə-Tiu nə!
Á mʋ̀ Aron dìə̀ lɩ̀à tə, á bwɩa Ba-Yígúrə́-Jə-Tiu nə!
20 Á mʋ̀ Levi dwíí tə, á bwɩa Ba-Yígúrə́-Jə-Tiu nə!
Á mʋ̀ lɩ̀à tə nə dəri Ba-Yígúrə́-Jə-Tiu fən,
á bwɩa Ba-Yígúrə́-Jə-Tiu nə!
21 Á zɩga Siyon tɩʋ tə wa,
á bʋ Ba-Yígúrə́-Jə-Tiu nə, ʋ nə wulə Zwerizalɛmə wa!
Á bwɩa Ba-Yígúrə́-Jə-Tiu nə!