Siyon tɩʋ tə yɩ Ba-Yígúrə́-Jə-Tiu wúlú bwálɩ́
132
1 Gwaran ba nə nuŋə ba ja dɩ̀ Ba-Yígúrə́-Jə-Tiu dìə̀ tə wa.
Ba-Yígúrə́-Jə-Tiu, lìí Davidə yoo
də ʋ càn tə mama yoo!
2 Ʋ dùə̀ durə ka tə də Ba-Yígúrə́-Jə-Tiu,
ʋ poli nii kʋ tə də Zwakɔbə Yɩɩ tə
ʋ dɩ̀àn nə dwə tə mɛ, ʋ wʋ́:
3 «À bá zʋ à gansili wa,
à bá pə̀ń à gədo yuu,
4 à bá pa dwiən zʋ à yɩ́á,
à bá zílí mancɩn tətə,
5 də à nə wà bwálɩ́ nɩ à pa Ba-Yígúrə́-Jə-Tiu nə,
də à nə wà dìə̀ nɩ à pa Zwakɔbə Yɩɩ tə nə,
ʋ dɩ̀àn nə dwə tə mɛ!»
6 Nə nì də Yɩɩ nimarʋ culu daka tə wulə Efərata nə,
nə nɩ ka Yarə tɩ̀án kárɩ́ tə wa.
7 Nə zwɩa Ba-Yígúrə́-Jə-Tiu wúlú bwálɩ́ tə wa,
nə tʋ nə nadwana yuu, ʋ naa túŋú bwálɩ́ tə yáá con!
8 Ba-Yígúrə́-Jə-Tiu, zàn n bà n sìə́ bwálɩ́ wa!
Zàn də n nimarʋ culu daka tə, n dɩ̀àn nə wulə ka wa!
9 Pa n joŋwana tə zʋ cɩ́gá cwəŋə wa,
n ga pa n lɩ̀à tə nə yɩ pùə́ nədʋ tɩ̀án mà pupwən cə̀rí!
10 Taa n tʋtʋnʋ Davidə yɩrɩ,
dàn ká vɩ̀ pɩ̀ʋ́ tə n nə kúrí, n dʋgʋ!
11 Ba-Yígúrə́-Jə-Tiu dùə̀ kʋ durə də Davidə,
yá kʋ yɩ cɩ́gá, ʋ bá pìí ʋ kwɩ̀án ʋ nii. Ʋ swɩ̀n, ʋ wʋ́:
«Kʋ yɩ n bɩ̀á tə wa bìú don nə, à wá tún n padaʋ tə yuu.
12 N bɩ̀á tə nə zìlí à nimarʋ* tə nii,
də à yìə̀n tə à nə kàrɩ̀ ba, sə ba tʋn,
ba də bɩ̀á wá jə̀ń n padaʋ tə yuu, máŋá mama wuuu.»
13 Cɩ́gá, Ba-Yígúrə́-Jə-Tiu kúrí Siyon tɩʋ tə,
ʋ ga swə sə ʋ ya bwálɩ́ təntə wa.
14 Ʋ swɩ̀n, ʋ wʋ́: «Kʋ wá ya à sìə́ bwálɩ́, máŋá mama wuuu,
à ga wá ya kʋ wa, à nə kúrí kʋ yɩrɩ.
15 À wá fwa zəni Siyon tɩ̀án yɩra,
à pa wodirən bʋ́rɩ́ ba,
à ga pa ba zʋra də́ ba sú.
16 À wá ja sáŋʋ́ à piri ʋ joŋwana tə, ndə gànʋ̀ nə,
yá ʋ lɩ̀à tə nə yɩ pùə́ nədʋ tɩ̀án wá mà pupwən cə̀rí.
17 Mə lá nə, à wá pa Davidə dɩ̀àn súrí,
à ga tanɩ lìù sə ʋ jon à pɩ̀ʋ́ tə à nə tún*, yuu nə.
18 À wá pa ʋ dʋŋa də́ cavɩra zənzən,
yá payupuu wá pɩpɩlɩ ʋ mʋ̀ yuu wa.»